کۆمیتەو گەلی و ئاینەکا کەجەکەی ئەرەیاۋناش، "داوا جە گەلەکەیما کەرمۍ مانگەو ڕەمەزانینە خەباتوو ۋێشا زیاتەر بکەرا. چونکی پۍ ئاموسڵمانا کە ئینۍ چێروو هجوومی و قڕکەردەی و دلێنەشیەینە، مدرامان پێسەنە عیبادەتی ".
کۆمیتەو گەلی و ئاینەکا کەجەکەی بۊنەو ئامای مانگەو مبارەکەو ڕەمەزانیۆ ئەرەیاۋنێوەش وەڵا کەردۆ و چنەشەنە داواو زیاڎکەردەی خەباتیش کەردەن.
جە ئەرەیاۋناکەینە ئامان، "بە تایبەتی موسڵماناو کوردسانی کە چی مانگەو ڕەمەزانینە دەس جە خاسەی و حەقیقەتی هۊرمەگێرا و ڕۊچۍ گێرا، ئێمە داوا جە گرڎوو موسڵمانا کەرمۍ کە بەرەو بنیاڎنیای واڵەو برایەتی گەلا و ئاینەکا هەنگامە بنیا، یۊبیەی گەلا حێقم کەرا ". قینی وزا لاوەو ئا مانگۍ کەرا بۊنێوە پۍ پەشتیوانی و هامکاری." کەجەکە داوایچش جە جەهانی ئیسلامی کەرد کە هەستوو یەکڕیزی، یۊگێرتەیی، واڵەو برایەتی گەلا هێقم کەرا.
ئەرەیاۋناکەو کەجەکەی پی جۊرەنە:
"جەهانی ئیسلامی دەس بە مانگێوە تازۍ رەمەزانی کەرۆ، کە گرنگتەرین بۆنەو ئیسلامیا و عیبادەتێوە پەڕ جە خێرێن. گەلاو ۋەرکەوتوو دلێڕاسەی و گلێرگە ئیسلامییەکۍ ئێساڵ دلۍ جەنگی و دلۍ هجوومی ئێژاو قڕکەردەینە دەسشا بە ڕۊچۍ رەمەزانی کەردەن. ملۋێنان مسوڵمانۍ بە ئێشۍ ئێژا، بە دژواریۍ فرۆ، دلۍ کاولکاری و جەنگینە ڕۊچۍ گێرا. ئێمە هیواڎارێنمۍ کە مانگەو مبارەکەو رەمەزانوو ئێساڵی بۊ بە بۆنێوە کە جەهانی ئیسلامی زیاتەر ویر جە دژواری و تەنگوچەڵەمەکا کەراوە، چارەسەری خوڵقنا و بانگەواز کەرا پۍ هێقم کەردەی رۆحوو یۊگێرتەیی، یەکڕیزی و واڵە و برایەتی دلۍ گەلانە.
هجوومەکا دەوڵەتوو تورکی پۍ سەروو ۋەرنیشتی، سەرنیشتی و شەنگالی و جە حەر یاگێوەنە کە کوردش ئینا چنە و جە دژو گەلوو کوردی ئەنجامش مڎۆ، هجوومەکا دەوڵەتوو ئیسرائیلی کە چێروو نامۍ جەنگینە جە دژوو حەماسی هجووم کەرۆ سەروو گەلوو فەلەستینی پەنج مانگێن بەردەوامێنۍ و بیێنۍ بە ماڵامەتوو مەرگەساتی و کۊکوشی، ئینێچ حیج پەیوەندیێوەشا بە ئیسلامیەتی و یەهودیەتیوە نییا، حیچ پەیوەندیێوەشا بە کولتوروو قەڎیمی ۋەرکەوتوو دلێڕاسەیۆ نییا. پێسە گلێرگەکا ۋەرکەوتوو دلێڕاسەی جە دژوو ئا هجووما تەنیا چارەما ئانەنە کە یۊبیەی، یەکسانی، واڵە و برایەتی، ئازاڎ و دیموکراسی گەلا، ئایین و ئایینزاکا پەرەپنە بڎەیمۍ. پۍ بنیاڎنیای نەتەوەی دیموکراتیکی کۊشیانە. بۊنەو مانگەو رەمەزانیۆ ئێمە داوا جە مسوڵمانا و گرڎوو باوەڕمەندا کەرمۍ دژوو فریووو نەمرودەکا ئی سەردەمیە کە پیرۆزییە ئایینیەکا بەکار مارا، دوژمنایەتی گەلا کەرا، گەرەکشانە گلێرگەکا جە ۋەرا ۋەروو یۊترینینە بڎا جەنگ، هەڵوێس هۊرگێرا. دەوڵەتوو ئیسرائیلی جە دژوو گەلوو فەلەستینی، دەوڵەتوو تورکیچ جە دژوو گەلوو کوردی جە دوژمنایەتینە رۆچۍ و مانگە پیرۆزەکا مەشناسا، چی ڕووە مبارەکایچەنە ژەنا، گەنجا، زاوڵا، بەتەمەنەکا کوشا. ژمارێوە فرە پەیماننامە و هامکاری سەروازی، هەواڵگری، ئابوری و کولتوری بەینوو هەردووە دەوڵەتینە هەنۍ. وەختۍ مژارەکە بۆ بە مەسڵەحەت هەردووە دەوڵەتەکە زەرەر و قوربانیدای هەردووە گەلوو کوردی و فەلەستینی جە دژوو یۊترینی بەکارمارا. حەرپۊکەی بۊنەو ئی مانگە مبارەکێوە ئێمە جارێوەتەر داوا جە گرڎوو مسوڵمانا تورکی و گەلوو ئیسرائیلی کە خاوەن هەستوو ۋەرپرسیارینۍ کەرمۍ کە جە دژوو مەژگوو دەوڵەتی کە ئایینە پەڕ جە ئەخلاقی و دادپەروەرییەکاما بەکارمارا، بە پارادایموو نەتەوەی دیموکراتیکی کۊشیانە.
گەلاو مسوڵمانی ئێژای!
بەپاو قورئانی جە ۋەرا ۋەروو هجوومەکا نکۆڵیکەردەی و راسی گەلێنە بە بەکارئاردەی ئیسلامی، گرڎوو چالاکیەکاو گەلێوە ۋێڕاگری پێسە ڕۊچۍ چانەن. پۍ ئانیشا کە بەپاو ئی ئەمرۍ جماوە پاداشتێوە ئێژا دیاری کریان. ۋەروو ئی پێودانگەو ئیسلامی، بەتایبەتی گەلەکەما جە سەرنیشتوو کوردسانی، پۍ گرڎوو کوردا مانگەو رەمەزانی بە ۋەرپرسیاریێوە ئێژاوە دەسشپنەکەردەن. گەلوو کوردی ئینا چێروو هجووم و قورسوو قڕکەردەینە. زۋانەکەش قەڎەغە و یاساخا، کولتورەکەش رووبەڕوو هجووم و تاونایۊی کولتوری بیەنۆ. گرڎ ڕووۍ رۆڵەکۍ گەلوو کوردی بە چەکی قەڎەغەکریا کوشیا کە ئینە دلۍ مرۆڤایەتینە ڕاش مەبۆوە. رابەروو گەلوو کوردی ئینا چێروو گۆشەگیری و ئەشکەنجەینە. جە زینڎانەکانە گەلوو کوردی مانیشا جە واردەی گرتەن. جە ۋەرنیشت، شەنگال، پانیشت، حەر مەنتیقێوەنە کە کوردش ئینا چنە، هجوموو قڕکەردەی پۍ سەریشا بەردەواما. وەختۍ چا ڕووانگۆ هۊرسەنگنایش پۍ کریۆ، مدرامان و چالاکیەکاو کوردا جە ۋەرا ۋەروو ئا هجوومانە ئنڎەو ڕۊچۍ خێرەنە. جە دژوو کۊکوشکاری، نکۆڵی، ئەشکەنجەی و زۆرداری دەوڵەتوو تورکی ئێمە داوا جە گەلەکەیما کەرمۍ کە چی مانگەو رەمەزانینە زیاتەر گوڕ بە کۊشیای بڎا. ۋەروو ئانەی پۍ ئا مسوڵمانا کە ئینۍ چێروو نکۆڵی و ئەسڕیەیۊی و دلێنەبەردەینە، مدرامان پێسە عیبادەتی و خوڎاپەرساین.
گەلەکەما جە سەرنیشتەنە بە قۆناغێوە گرنگەو کۊشیاینە دەس بە مانگەو رەمەزانی کەرۆ کە ئی قۆناغۍ ۋەرپرسیاریی و ئەرکی گرنگ وزۆ سەروو شاناشا. بەتایبەتی گەرەکمانە پرۆسەو هۊرچنیەی ویروو گەلەکەیما بارمێوە کە پۍ کوردا و گەلا تورکیای متاوۆ دەورێوە گرنگ گێڵنۆ. ئێمە چەمەڕێنمۍ کە شمە جە ۋەرا ۋەروو ئیسلامێوەنە کە دماکۊتەی سەروو گلێرگەیرە سەپنۆ و جە چوارچێوەو مەسڵەحەتە سیاسیەکا دەسەڵاڎدارینە دەور گێڵنۆ، مردێوە و چنی ئا تەرەفا کە جەوهەروو دیموکراتیکی ئیسلامی وەڵۍ وزا، خاوەنداریش ۋنەکەرا، تەرەفڎارۍ دیموکراسی و ئازاڎینۍ، کۊشیانە. پێسە هەر مسوڵمانێوە خاوەن ئەخلاقی و بە ویژدانی، ئێمە قەناعەتما پاسەن کە زانایا ئیسلامی و مامۆسایا ئایینی کوردی جە دژوو ئا کەسا کە کتێبی پیرۆزی و نامۍ ئیسلامی پۍ پەردەپۆشکەردەی خراپەکارییەکاشا بەکارمارا، پیرۆزییەکا مسوڵمانا پۍ هۊرخەڵەتنای و کوشتەی مسوڵمانا بەکارمارا، ئەرەکۊشایۍ بەقوەتتەر ئەنجام بڎا. بە بڕواو ئێمە، عالتەرین و ئەخلاقیتەرین هەڵوێس چی مانگێنە ڕۊچێوۍ پی جۆرەیە بۆ. وەڵۍ گرڎ چێوێنە ئێمە چەمەڕێنمۍ کە جە ۋەرا ۋەروو ئانیشانە کە پەیوەندیشا بە دەوڵەتوو ئەرەگیریوە هەن، جە ۋەرا ۋەروو جاشەکا پێسە هوداپاری کە دوژمنۍ گەلانۍ و جە ڕاو ناشیرینکەردەیۆ ئیسلامی پۍ مەسڵەحەتوو ۋێشا بەکارمارا، هەر چێوۍ کە چێروو نامۍ خێرێنە گەرەکشانە جە کوردسان و جە مانگەو رەمەزانینە بەشش کەرا حەراما و پا ئەنەیاوایۆ مشۊم مامەڵەشا چنی کریۆ. حەر چێوۍ کە ئا دووڕووۍ و دزۍ، تاڵانکارۍ و درۆزنۍ مڎاش بە گەلی، ئا چێوۍ جە گەلی دزیێنۍ و ئارۆ پۍ ئانەی جە هۊرچنیەینە سەرۍ گنا ئا چێوۍ کە جە گەلیشا دزیێنۍ سەروو گەلیرە بەششا کەرا. ۋەروو ئانەی هەڵوێسی راسوو ئیسلامی ئانەنە کە مسوڵمانا جە خوانوو سفرەو ئانیشا نزیکۍ نەباوە، ئا چێوۍ ئاڎۍ بەششا کەرا، هۊرشا نەگێرا. ۋەروو ئانەی ئا چێوۍ کە چێروو نامۍ خێرێنە بەششا کەرا، ڕەشووەن. ڕەشوو هۊرگێرتەیچ ئێژاتەرین گوناحا، ئێژاتەرین حەراما. حەرپۊکەی ئێمە بڕوواما هەنە کە کوردسانیا مسوڵمانی جە دژوو ئاکەپەی و هێزوو تیرۆری کۆنترای پێسە هوداپاری هەڵوێسێوە ویژدانی، ئەخلاقی، هەڵوێسێوە ئیسلامی حەقەتینە نیشانە بڎا.
ئێمە گەرەکمانە ویرش بارمێوە کە سەرفترە و زەکاتیچ ئەگەر بڎریۆ بە دامودەزگاکاو هامکاری کلۆنیالیزمی تورکی بە پاو ئیسلامی حیچ خێرێوەش نییەنە. ۋەروو ئانەی گرڎ هامکاریێوە پۍ ئا ئەرەمەرزیایا، پێسە کەرەستەو کوشتەی بە شێوەو چەکی دژوو گەلوو کوردی بەکارمۍ. بۆنەو ئی مانگەو رەمەزانیوە ئێمە داوا جە گەلە مسوڵمانەکەیما جە سەرنیشت و بەروو وڵاتی کەرمۍ، کە نەلانۍ مزگیەکا سەربە ئەرەمەرزیاکا دیانەتوو تورکی. جە مزگیەکا دیانەتوو تورکینە بێجگە جە نکۆڵی، دروۍ، تۆمەت، گەندەڵی و کۆکوشی جە دژوو گەلوو کوردی، جگە جە دووڕوویی هیچ چێوۍ تەرشا نیا چەنە. مەلدۍ ئا مزگیا، کە گرڎ ڕووۍ سوکایەتی بە ئشناسنامەی نەتەوەیی شمە، هەستی ئایینی شمە، بەها ویژدانیەکاتا کەرا و جە کەسایەتی شمەنە نکۆڵی جە ئایەتەکا کەرا. نماکاتا جە یانەکاتانە، جە کۊڵانەکاتانە، بە مەجالەکاتا چا یاگانە کە چنەویەردەیش چنە کەردێشا، قەناعەتما پاسەن کە مامەڵێوە پا جۆرە خێردارتەر بۆ.
گەلوو ئێمە جە پانیشتەنە چێروو هجوومەکا دەوڵەتوو تورکی قڕکەری کۆلۆنیالیستینە دەس بە مانگەو رەمەزانی کەرۆ. ئێمە جارێوەتەر گەرەکمانە ویروو گەلەکەیماش جە پانێشتنە وزمۍ، کە جە هجوومەکا دەوڵەتوو تورکینە پۍ سەروو هەرچوار پارچەو کوردسانی، بەتایبەتی جە سەرنیشت، ئا پەشتیوانییە ئابوری، سەروازی و هەواڵگریەی کە جە پانیشتیۆ هۊرگیریۆ پشکێوە گرنگش هەن. دەوڵەتوو تورکی کە دوژمنوو گەلوو کوردیا، بە ئیسفاڎە هۊرگێرتەی جە بەها ماددییەکا و رەنجوو گەلەکەیمان جە پانیشتەنە، جە ڕاو هامکاری و داردەسەکا ۋێشۆ پۍ ئەرەگیرکەردەو پانیشتی و گەلەکەیما جە پارچەکا تەرینە، هجووم ئەنجام مڎۆ. جە دژوو ئا هجوومە کۆلۆنیالیستیا ئانەی وڵاتپارێزی، ئایین، باوەڕ، ئەخلاق و ویژدان جە گرڎ وەختۍ زیاتەر هەڵوێسێوە بەقوەت و ۋێبەڕێکوستە کەردەی سەپنۆ. ئێمە قەناعەتما پاسەن کە شمە ئی مانگیەو رەمەزانیە بە مدرامانێوە ئێژا کەردۍ بە بۆنێوە پۍ قەرارداری پۍ دمایی ئاردەی بە ئەرەگیری و هەڵوێس جە دژوو ئەرەگیری دەوڵەتوو تورکی.
گەلەکەما جە ۋەرکەوتوو کوردسانیەنە بە مدرامانوو ژەنا 'ژەنی، ژیۋای، ئازاڎیی' کە دووۍ ساڵێن بەردەواما، پێشوازی جە مانگەو رەمەزانوو ئێساڵی کەرۆ. چی وەختەنە کە بە مەڵامەتوو فشارەکا رژێمیوە، کۊشیایۍ بەقوەت هەن، هیواڎارێنمۍ کە هەستوو یەکڕیزی و یۊگێرتەیی بەقوەتتەر کەردۍ، بڕوابیەی بە ئازاڎیی و کۊشیای زیاتەر پەرەپنە بڎەیدۍ و بەردەوامۍ بیدۍ جە مدرامانی.
گەلاما جە ۋەرنیشتوو سەرنیشتوو-ۋەرکەوتوو سوریای چێروو هەڕەشا و هجوومەکا دەوڵەتوو تورکی فاشیستی قڕکەرینە دەس بە مانگەو رەمەزانوو ئێساڵی کەرا. ئێمە چەمەڕا کەرمۍ کە گەلەکەما جە مەنتیقەکەنە بە پاو ساڵا ۋیەردەی بە کۊشیایۍ بەقوەتتەر، بە خەباتوو ۋەرفراوانی جابەجێکەردەی پەیماننامەو کۆمەڵایەتی، سەروو بنەماو ۋێپارێزنای جە ڕاو رێکوستەیۍ بەقوەتیوە پێشوازی جە مانگەو رەمەزانوو ئێساڵی کەرا. ئێمە داوا جە گەلاما جە پێکئاماکا مسوڵمانا هەرێمەکەینە کەرمۍ کە بە قووڵبیەیۆ سەروو بنەماو هوشیاری نەتەوەی دیموکراتیکی، سیستموو دیموکراتیکی و رێکوستەی بەقوەت کەرا.
مسوڵمانا بەقیمەتوو کوردسانی
بە تایبەتی موسڵماناو کوردسانی کە چی مانگەو ڕەمەزانینە دەس جە خاسەی و حەقیقەتی هۊرمەگێرا و ڕۊچۍ گێرا، ئێمە داوا جە گرڎوو موسڵمانا کەرمۍ کە بەرەو بنیاڎنیای واڵەو برایەتی گەلا و ئاینەکا هەنگامە بنیا، یۊبیەی گەلا حێقم کەرا . قینی وزا لاوەو ئا مانگۍ کەرا بۊنێوە پۍ پەشتیوانی و هامکاری. هیواڎارێنمۍ کە مانگەو رەمەزانی پۍ گرڎوو مسوڵمانا بە تایبەتی مسوڵماناو کوردسانی بۆ بە مایۍ خێرۍ، ڕۊچۍ و دوعا و عیبادەتەکێتا قبوڵۍ کریا".
