ئا دەنگدەرۍ کە ئیستەنبوڵ-نە تۊمار نەکریېنۍ و گەرەکشانە جە شارەکاو ۋېشانە پۍ ھورچنیەکا دەنگ بڎا، داواشا ۋنەکریان تا ١٠ و ئایاری سەردای بنکەکا هەدەپەی و پارتو چەپی سەوزی جە شارەکانە و مەنتیقەکانە کەرا.
بەعزۍ جە چالاکیی پارتەکا پۍ فاڕایۊ دەنگدەران پۍ شارەکا ۋێشا، یان ھەڵای نامېشا جە تۊمارو دەنگدەرا ئا مەنتیقەینە نییا، کە چنەش مژیۋا. پارتو دیموکراتیکی گەلان (هەدەپە)ی جە ھورچنیە دلېینەکا ساڵەو ٢٠١٩ینە ١٣ هەزار کەسېش جە ئەستەنبوڵۊ فاڕېۋە پۍ ٧٠ مەنتیقا کورڎسانی. ئیسەیچ هەدەپە ئا ھەرمانۍ چنی پارتو چەپی سەوزی مکەرۊ. ئا دەنگدەرۍ کە ھەڵای تۊمارو ۋېشا وەش نەکەرڎەن، متاۋا حەتا ۱۰و ئایاری سەردای بنکەکا هەدەپەی و پارتو چەپی سەوزی جە شار و مەنتیقەکانە کەرا پۍ ئانەی جە تۊمارکەرڎەو نامەکاشانە هامکاری کریا.
محەمەد ئوچار ڕاوەبەرو شارو ئیستەنبول و هەدەپەی جە بارەو ھەرمانەکاشۊ جە ئیستەنبوڵ پۍ ئاژانسو هەواڵی فورات (ANF)ی دوا.
ئوچار ئەرەیاۋناش، جە ٣٩ مەنتیقېنە تۊمارەکا وەش کەرا و ۋاتش، "ئا دەنگدەرۍ کە ئیستەنبوڵ-نە تۊمار نەکریېنۍ فاڕمېشاوە پۍ ئا شارا، کە نامېشا پۍ ھورچنیەکا تۊمار کریان. پۍ ئانەیچ ئێمە ترۊمبېل پۍ فاڕایۊ دەنگدەرا پۍ گرڎو شارەکا کورڎسانی حاصڵ مکەرمۍ. جە ٣٩ مەنتیقۍ ئیستەنبول-ینە نامەکا تۊمار کەرمۍ.داوا جە دەنگدەرا مکەرمۍ سەردای میدیای دیجیتاڵی و ماڵپەڕو پارتەکەیما بە نامۍ "دەنگو من ئینا چکۊ؟"ی کەرا. جە ماڵپەڕەکەنە بەستەرێوە بە نامۍ "دەنگدەری گېڵایۊ" هەن. دەنگدەرۍ متاۋا زانیاریی ئشناسنامەکاشا و ژمارە تەلەفۊنەکا ۋێشا تۊمار کەرا. ئی ھەرمانۍ تا ۱۰و ئایاری وەردەوامیش بۊ. فاڕایۊ دەنگدەرا جە ۱۲ و ۱۳و مانگۍ دەسپنەکەرۊ. ئێمە دەنگدەرا، کە شۊنەکېشا دوورەنە دوۋۍ ڕوۋۍ زووتەر فاڕمېۋە پۍ مەنتیقەکا ۋېشا".
ئوچار ۋاتیچش: "بەدڵنیایۊ بەعزە کەسېچ هەنۍ، کە مشۊ فاڕیاوە پۍ ئا مەنتیقا کە بومەلەرزەکە چنەشانە کۊت ، بەڵام ئا داواکارییۍ کە پۍ ئێمە مەیا بە گرڎی پۍ کورڎسانینۍ. ئانە هاتای-چ گېرۊۋە. حەرپاسە ئێمە پەیۋەنڎی پا کەساوە کەرمۍ، کە ملا پۍ شارەکا ۋەرنیشتی، یان شارەکا دۊروبەری. ئەگەر پاسشا پۍ حاصڵ نەکریۊ ئێمە متاومۍ بلیتەکاشا پۍ بسانمۍ، بەڵام ھەرمانەکۍ ئێمە پۍ کورڎسانین. فرەو کرێکارەکا ھەرمانەو بیناسازی مکەرا. فرەیشا خەڵکو وانی و گەڤەری و مێردینی و ئاماڎینۍ. ئامانجما ئانەن ئېساڵ فڕۊکە بەکرۍ گېرمۍ. ئێمە خەرجییەکەیش مڎەیمۍ. پۍ نموونەی; ئەگەر ٥٠٠ کەسۍ بلا پۍ یاگېوە و جیای ئانەی ئێمە ١٠ پاسۍ گېرمۍ، ئێمە بلیتو فڕۊکېوە، کە یاگۍ ٥٠٠ کەساش هەنە مسانمۍ و بە کەرەتۍ فاڕمېشاوە.
جە ئیسەنە پاس پۍ فاڕایۊ دەنگدەرا جە یەنی قاپی و حەرپاسە مەنتیقەکا توزلای و پەندیکی حاصڵ کریان".
ھ.ش
