پارتوو چەپی کە داکۊکی جە کۊماروو ئیکۊ-سۊسیالیستی کەرۊ، ناڕەزایەتییش وەراوەروو ئۊپراسیۊنوو پاکتاوی سیاسی نیشانە دا، کە جە ٢٥وو نیسانینە جە دەیان شارێنە کە چەقەکەش  ئامەدنە بۍ، لوا ڕاوە و چا بارۊ واتش، "دووۍ حەفتۍ وەڵی ورچنیەی سەرۊکایەتیی کۊماری و پەرلەمانی تورکیاینە، سەرۊککۊمار-دیکتاتۊروو ئیسەی ئەرڎۊغان تەرسۊ".

پارتوو چەپی ئەرەیاونانش، کە ڕژێموو ئەرڎۊغانی "بە گرڎ نۊعە هجوومێوە ونەو گلێرگەی مجۊ" و واتش، "سیاسەتی ئابووری کارەساتێوەن و ڕاوەبەرڎەی قۊناغوو بوومەلەرزەی، کە یۊ سەروو چواروو تورکیایش چێروچوەر کەرد، گەندەڵیی دەسەڵاتداری فاشیستی ئیسلامی، کەمتەرخەمی وەراوەروو بەرژەوەندیی گەلی فرە بە وەرەچەمی وست وەروو چەما".

پارتوو چەپی ئانەیچش وستەن ڕووە، کە بە دەیان هونەرمەنڎۍ، ئەنداماو سەندیکایەکا، ئەکادیمیۍ، ڕۊنامەوانۍ و سیاسەتمەدارۍ گیریێنۍ واتەنیچش: " ئی ئۊپراسیۊنەو پاکتاوی سیاسییە بە چنڎ حەفتێوە دماو ئانەیە مۍ، کە پارتوو کرێکاراو کوردسانی (پەکەکە) پەی ڕاوەلوای ورچنیەی جە کەشێوە  ئارامنە ئویربەسش ئەرەیاونابێ".

پارتوو چەپی پەی ورچنیەی ١٤و ئایاری تا جە کەشێوە  پارێزیانە بلۊ ڕاوە، داواش جە حوکمەتوو فەڕەنسای کەرڎێنە، کە هەم ڕاستەوخۊ دژوو ئەرڎۊغانی و هەمیچ چا ڕووەوە کە پێسە ئەندامێوە ئەنجوومەنوو ئەوروپای، کە تورکیایچ ئەنداما دلێشنە، گنۊ جموووجووڵۊ.

 ئێن ئی ئێس ئێس: ئێمە پەشتیوانی چا هێزا دەکەرمۍ، کە دژوو ڕژێموو ئەرڎۊغانی مرڎاوە.

گرووپوو پەشتیوانی جە سەرنیشت و وەرکەوتوو سوریای (ئێن ئی ئێس ئێس) جە ئوستراڵیانە خەبات کەرا واتش، کە ئادۍ جە دژوو ڕژێموو ئەرڎۊغانی ئینی دلۍ یۊگێرتەیۍ بەقووەتینە.

هامسەرۊکیی گرڎینوو ئێن ئی ئێس ئێس فیۊن سکیوتیسی ئەرەیاوناێش وەڵا کەرڎۊ کە: "ئێمە پاڵپەشتیی گەورە جە تۊمەتباراو دۊسیەو کۊبانۍ و گرڎوو ئا کەسا کەرمۍ، کە  دژوو ڕژێمی ستەمکار و نادیموکراتیکوو ئەرڎۊغانی وەرگێریی کەرا".

س.ز