کۆردیناسیۆنی پاژک بە بۆنەی نەورۆز راگەیەندراوێکی بڵاوکردەوە.

کۆردیناسیۆنوو پاژکی ئاماژەش پانەی کەردەن، کە سەرمەشقایەتی و کۊشیای ژەنا پۍ جەنگی، جە سیاسەت و هۊرچەرخنای کۆمەڵایەتینە سەردەمێوە تازە کەرۆوە؛ ژەناو کوردی کە نەورۆزی پیرۆز کەرا بە ۋیەرنای سنوورە نەتەوەییەکا فاڕایۆی کۆمەڵایەتی خوڵقنا و ئانەیچش وستەن ڕووە، "گەلەکەما کە هوشیاری نەتەوەییش بەدەس ئاردەن، جە دژوو تاکپەرسی، نەژاڎپەرسی، رەگەزپەرسی و دماکۊتەیی ئایینی سەروو بنەماو بنیاڎنیای نەتەوەی دیموکراتیکی چنی گەلاو هەرێمەکەی و جەهانی یۆگێرۆ و کۊبۆوە".

دەقوو ئەرەیاۋناکەی پی جۆرەنە:

"ئێمە جە سەرانسەروو کوردسانینە چنی راسی گەلی کە بە ۋێڕاگریۆ ۋێش ڕازنانۆ مژیومۍ. مدرامانی شکۆدار کە گەلەکەما، ژەنا و دۆساما چنڎین ڕووێن جە چوارپارچەو کوردسانی و فرەو مەنتیقا جەهانینە جە مێڎانەکانە نیشانەش مڎا، مزانی ئانەی مڎۆ کە بە رۆحوو سەرکۆتەی قۆناغێوە تازۍ کۊشیای بەرزە بۊوە و گەشە کەرۆ.

جە حۆت ساڵۆ تا ٧٠ ساڵ، ژەنا، گەنجا و زاوڵا بە جۆش و خرۆشۆ کۊشیایشا فاڕان پۍ ئیراڎێوە جە ئاێری، ئێمە سەرەتا جەژنەو نەورۆزی جە ئەندازیار و بناغەدانەروو ئی ڕووا واتە جە رابەر ئاپۆی، گەلەکەیما کە مێڎانەکا چۆڵ مەکەرا، ژەنا و گرڎوو دۆساما پیرۆز کەرمۍ. جە کەسایەتی گەشمەرڎا ئێژاینە مەزڵوم دۆغان، زەکیە ئاڵکانە، رەهشان دەمیرەلە، رۆناهی و بێریڤانەکانە کە نەریتوو مدرامانیشا جە کاوەی ئاسنگەریۆ هۊرگێرتەبۍ، گرڎوو گەشمەرڎاما بە وەشةسیای، رێز و پنەزانایۆ یاڎۍ کەرمۍ. 

گەلەکەما، ژەنا و گەنجا کوردسانی کە ۋێشا بە گیانوو نەورۆزیوە ڕازنانۆ، مدرامانی بێهامتاو ۋێشا بە دۆس و دوژمنی نیشانە مڎا کە ڕێوگارا ڕاپیمای ئێژاو ئازاڎینۍ کە بە مەزڵوم دۆغانەکا دەسشا پنەکەردەن. راسی ئێمە پێسە ژەنۍ و گەلی بە ئاێر تاقیکریۆوە، بە شێوێوە ئاشکرا بەرش وزۆ کە سەرە جە ۋەرا ۋەروو هیچ ستەمکارێوەنە مەنامنارە. بە دروشمەو ئازاڎیی جەستەیی رابەر ئاپۆی، کوردسانی ئازاڎ و ژەنی، ژیۋای، ئازاڎیی نەخشە ڕاو سەڎەی دیاری کەرۆ. ئا سەرهۊردایەی بە گرڎوو مێڎانەکارە وەڵا بۆوە، ڕای بنچینەیی هۊرچەرخیای گەورە دیاری کەرۆ. گەریلاکاو هەپەگەی و یەژاستاری کە بە رۆحوو نەورۆزی پێشوازییشا جە ساڵەو ٢٠٢٤ کەرد، پا جەنگە گۊرەی کە جە کەشەکا کوردسانینە کەراش ئاستوو سەرکەوتەیشا دیاری کەرا. جەنگوو گەریلای کە بە هەڵمەتەی سەرکەوتانۍ دوژمنی وێران کەرۆ و هجوومی ئەرەگیری پوچ کەرۆوە، جە تەماموو کوردسانی، هەرێمەکەی و جەهانینە وەڵابۆوە و قۆناغەکۍ دیاری کەرۆ. گەریلاکاو مۆدێرنیتەی دیموکراتیکی پێسە نەورۆزیشا پنە مۍ، بە ئیرادەی گەورەو کۊشیایۆ بەرەو قۆناغێوە تازۍ ملا، بە ماڕای ئەرەگیرا و بە دەسکۊتەی تازۆ مزانی سەرکۊتەی مڎا.

ژەناو کوردی بە سەرمەشقایەتی زەکیە، رەهشان، سەما، رۆناهی و بێریڤانەکا نەورۆزی پیرۆز کەرا جە گرڎ مێڎانێنە، جە وەڵۍ وەڵێوە سەرمەشقایەتی  پۍ کۊشیای کەرا. رابەرایەتی و کۊشیاو ژەنا جە جەنگ، سیاسەت و هۊرچەرخنای کۆمەڵایەتینە سەردەمێوە تازە کەرۆوە. حەقەتینێوە کە هۆشمەندی پیا سالاری زیاتەر چنەش تەرسۆ، بەرزبیەیۆ کۊشیایۍ کۆمەڵایەتیا کە ژەنی سەرمەشقایەتیش کەرا. وەختۍ راسی گەلوو کوردی جە مبارەکبایی نەورۆزینە هوشیاری نەتەوەیی خوڵقنۆ، ژەناو کوردی کە نەورۆزی پیرۆز کەرا بە ۋیەرنای سنورە نەتەوەییەکا هۊرچەرخنای کۆمەڵایەتی خوڵقنا. ئا هۊرچەرخنایە چنی ۋێش کۊشیای ئێمەیچش جە سنوورەکا کوردسانینە ۋیەرنان.

مدرامانوو رابەر ئاپۆی و هێزوو پاڕادایموو ئازاڎیی ژەنان کە کۊشیایش یاۋنان بە ئارۊی و کاراکتەرێوە گەردوونیش پنەدان. هەڵمەتەو "ئازاڎیی پۍ رابەر ئاپۆی، چارەسەری پۍ پرسوو کوردی" کە جە جەهانەنە دەنگش دانۆ، گرنگتەرین دەرەنجاموو ئی هۊرچەرخنا ئێژاینە.

٥٢ەمین ساڵەو کۊشیای ئێمە جە کەشەکانە، زینڎانەکانە، شارەکانە، دەشتەکانە جە گرڎ شۊنۍ کوردسانی و جە چوار لاو جەهانینە بەر وزوو سەرجە نۆ ژیۋایۊین. دەس وزۆ سەروو دڵوو هەر کوردێوە، هەستی وڵاتپارێزی هوشیار کەرۊوە. گەلەکەما کە هوشیاری نەتەوەییش بە دەسئاردەن، جە دژوو تاکپەرسی، نەژاڎپەرسی، رەگەزپەرسی و دماکۊتەیی ئایینی سەروو بنەماو بنیاڎنیای نەتەوەی دیموکراتیکی چنی گەلاو هەرێمەکەی و جەهانی یۆگێرۆ و کۊبۆوە.

 چی مەعنێنە نەورۆز قەسەم و پارێزنای بیەو ۋێما و مسۆگەرکەردەی ئازاڎییا. نەورۆز بە رۆحی ئاپۆیی و ئیراڎەو پۆڵایینی مەزڵوم دۆغانەکاوە کە ۋنەپەرسایۆ و حیساب پەرسایۊی جە فاشیزمی کەرۆ. نەورۆز راسی رابەر ئاپۆین کە نیم سەڎەن جە دژوو دەسەڵاتداری کۆلۆنیالیستی هەزاران ساڵێن، هوشیاری ئازاڎییش خوڵقنان. نەورۆز هەڵوێسوو ئاپۆیی گەلی، جمیەری و گەریلاین کە جە تەرەفوو رابەر ئاپۆیۆ خوڵقیان.

سەروو بنەماو ئانەی نەورۆزوو ٢٠٢٤ سەرکۊتەیش چنە گنۆوە، ئێمە نەورۆزوو گرڎوو گەلوو کوردسانی و بەتایبەتی ژەنا پیرۆز کەرمۍ. ئێمە داوا جە گەلا مێزۆپۆتامیای  و لایەنە دیموکراسیوازەکا کەرمۍ کە خاوەنداری چا ئیرادەیە کەرا کە جە نەورۆزەنە ئامان ئاراوە، بەرەو کۊشیای دیموکراتیکی بنیاڎ بنیا، هەڵمەتەو ئازاڎیی پۍ رابەر ئاپۆی، چارەسەری پۍ پرسوو کوردی فراوانتەر کەرا و ساڵەو ٢٠٢٤ کەرا بە ساڵەو کۊشیای و ئازاڎیی جەستەیی رابەر ئاپۆی".