کۊمیتەو ۋېڕاوەبەری پەکەکەی، قارەمانەکۍ کۊشیای ئازاڎیی کورڎسانیش ۋیرئاوردۍ کە جە مانگەو ئایارینە گەشمەرڎۍ بیېنۍ و ۋاتش، " خوڵقەما پۍ گەلی و دۊسەکاما ئانەن کە مانگەو ئایارینە کۊشیای ئازاڎیی سەرو خەتەو گەشمەرڎاوە فراوانتەر کەرا و گرڎ ڕوۋۍ پۍ یاڎکەرڎەیۊ گەشمەرڎە قاڕەمانەکاما چالاکی ئەنجام بڎا."

جە ئەرەیاۋناکەو کۊمیتەو ۋېڕاوەبەری پەکەکەینە ئامان، سەرەتا "حەقی کارەر، دەنیز گەزمیش، حسێن ئینان، یوسف ئاسلان، شیرین عەلەمهۊلی، فەرزاد کەمانگەر، ئۊزان مزگین و ئولاش بایراکدارئۊغلۊ" یاڎو گرڎو کەسایەتییە قارەمانەکا کەرمېوە کە جە مانگەو ئایارینە گەشمەرڎۍ بیېنۍ.

یاونەریەکەو پەکەکەی پی جۊرەنە:

"گولچییا گابارە و پەلشین نەورۊز"ە

" ئێمە پېسە جمیەری و گەلی، ئینایمۍ مانگێوە تازۍ گەشمەرڎانە. جە گرڎ ڕوۋۍ مانگەو ئایارینە دەیان گەشمەرڎۍ قاڕەمانېما هەنۍ. بە رێز و وەشەویسیۊ یاڎو گرڎو گەشمەرڎەکاما کەرمېوە کە بە گەشمەرڎەی گۊرەما حەقی کارەر دەسش پنەکەرڎ و یاوا هەڤاڵ گوڵچیا گابارۍ. جارێوە تەر وەعد مڎەیمۍ کە خۊتانکەرڎەی جە یاڎکەرڎەیۊیشا کەرمۍ و ئامانجەکاشا بیاۋنمۍ بە سەرکۊتەی. سڵامو ۋېما پێشکەش بە گەلی ۋڵاڎپارێز و دۊسە دیموکراتەکاما مکەرمۍ کە سەرو خەتەو رابەر ئاپۊی و گەشمەرڎاوە خەبات کەرا. ئێمە قەناعەتما چانەن کە چی مانگەو گەشمەرڎانە کۊشیای پۍ دیموکراسی و ئازاڎیی زیاتەر بەرا وەڵېوەو جە ١٤و ئایارینە فاشیزمی ئاکەپە و مەهەپەی ھورشېۋنا و ڕا پۍ کورڎسانی ئازاڎی و تورکیای دیموکراتی کەراوە.

جە مانگەو گەشمەرڎانە، ئشناسنامەو گەشمەرڎۍ تازۍ و قاڕەمانېما ئەرەیاۋیا: ئشناسنامەو ئەنڎاما فەرمانڎەیی قەرارگەو ناۋەنڎی هەپەگەی، دەسەی فەرمانڎەیی یەژەئاستاری، ئەنجومەنو پاکی و میلیتانەکا وەڵېوەبیەی پەکەکەی "گولچیا و پەلشین نەورۊز"ە، حەرپاسە میلیتانەی قارەمانەو پەکەکەی "دڵخواز گابار"ە  کە جە فەرمانڎەیی هەرێمەکاوە حەتاوەکو ریزەکا هەپەگەی جە گرڎ ئاستېوەنە فەرمانڎەییش کەرڎ، حەرپاسە نامۍ هەڤاڵا سۊزدا بۊتانۍ و جوان ئۊرەمارۍ، ئەرەیاۋیا. بە رێز و وەشەویسیۊ یاڎو ھامڕایاما "گوڵچیا، پەلشین، دڵخواز، سۊزدا و جوانا"ی کەرمېوە و وەعد مڎەیمۍ ئامانجەکاشا سەروزمۍ. خوڵقە جە گەلی ۋڵاڎپارێزی و دۊسەکاماو، ژەنا و جوۋانا کورڎسانی و بە تایبەتی جە مێردین و بۊتانەنە مکەرمۍ کە حەقیقەتو گەشمەرڎە قاڕەمانەکاما عال بزانا و بە بەقوەتی خۊتانکەرڎەیشا ۋنە کەرا.

هەڤاڵە "گولچیا گابار"ە، عمر و قوەتو ۋېش گرڎش بە کۊشیای ئازاڎیی ژەنا و کورڎی بەخشا. جە چوۋار پارچەو کورڎسانینە پۍ ئازاڎیی جەنگش کەرڎ، چا ڕوۋۊ کە بەشڎاریش جە ئەرەکۊشاینە کەرڎ و حەتاوەکو ئاخرو عمریش جە گەریلایەتینە دوورە نەکەوتۊ. جە ئاستو ئیمانینە قەناعەتش بە سەرکۊتەی ئازاڎیی ئاپۊیی بۍ. بە راسی پېسە نامۍ ۋېش بیە بە گوڵو کەشی. بە بەقوەتی سەرو خەتەو مدرامانی و ژیای ئازاڎینە کۊشیا، حیچ وەختۍ چی خەتۍ لاش نەڎا، حیچ حەزێوە دوور کۊتەیۊیش چی خەتۍ قبوڵ نەکەرڎ جە گرڎ ئاژېۋەنە بە عەقڵیەتو خوڵقناو چارەسەری، بە ئیراڎۊ جماوە. حیچ وەختۍ سەرەش نەنامنارە، گرڎ وەختۍ سەربەرزە بۍ، بە قوەتېوە گۊرۊ بەشڎاریش جە کۊشیای پارتیبیەی و گەریلایەتیمانە کەرڎ. نیشانەو ئېمەشدا نەک زانابیەیۍ فرە بەڵکم حەزش پۍ ئازاڎیی متاۋۊ سەرگنۊ، پی جۊرە میلیتانی راسەقینوە ئاپۊییش نیشانەدا.

ھامڕېما "دڵخواز"ەیچ دلۍ مەردمو مێردینیمانە ھورکەوتە و ژیای ۋېش بە جەنگو ئازاڎیی بەخشا. جە گرڎ یاگېنە شەڕڤانیش کەرڎ، جە گرڎ ئاستێنە فەرمانڎەییش کەرڎ. پېسە رەنجدەرېوە ئاخېزی جە گرڎو مەیڎانەکانە بە هێزو گەریلای خەباتش کەرڎ. بە پراکتیکی ۋېش گورزۍ قورسېش جە دوژمنی فاشیستی و قڕکەری شانۍ.

بێگۆمان جەمەو ژەنا، جوۋانۍ گەلوو کورڎسانی، بە تایبەتی ژەنۍ مێردینی، جە  ڕۊڵە قارەمانو، شەڕڤان و فەرمانڎە گۊرەکا ئارگەکەی و هەپەگەی بە شێۋېوە راس یاۋانە، بە جۊرېوە بەقوەت خۊتانکەرڎەیش ۋنە مکەرا، حیچ وەختۍ جە ۋیرشا مەکەرا، گرڎ وەختۍ وەڵېشا وزا و جە ئەرەکۊشای ئازاڎیی گەلوو کورڎی و ژەنانە خۊتانکەرڎەی جە یاڎەوریشا مکەرا.

دەنیز ئەۋەڵ گولېش تەقنا

ئێمە ٥١ ەمین ساڵیاڎو جە قەنارەداو شۊڕشگێڵا قارەمانی "دەنیز گێزمشی و یوسف ئەسڵانی و حوسەین ئینان"ی کەرمېوە، ئاڎۍ قارەمانانە دژوو کودەتای فاشیستی ١٢ و ئاداری جەنگیۍ و جە ٦ و ئایارو ١٩٧٢ېنە جە قەنارە دریۍ.

بە ڕێز و ئیحترامۊ یاڎو شۊڕشگێڵا قارەمانی "دەنیز گێزمش و یوسف ئەسڵان و حوسەین ئینان"ی کەرمېوە، ئاشکران ئاڎۍ پۍ ئەۋەڵجاری ۋەران وەر پا سیاسەت و زیهنیەتە فاشیستی وئۊلیگارشییە مرڎېوە کە ٥٢ ساڵۍ چېوەڵتەر بە کودەتېوە سەروازی فاشیستی جە ١٢ و ئادار ینە دەسشپنەکەرڎ و ئیسەیچ جە شېوەو فاشیزمی ئاکەپە و مەهەپەینە وەردەواما، ئاڎۍ یوۋەم گولېشا تەقنا، ئاڎۍ ئەۋەڵجار قافڵەو کورڎسانۍ ئازاڎیی و تورکیایۍ دیموکراتیکیشا دەسپنەکەرڎ، بیۍ بە قوەتۍ گۊرە و یەکلای کەرەوە پۍ وەڵېوستەو هەنگامەکۍ ڕابەر ئاپۊی و پەکەکەی.

یاڎکەرڎەیۊ ئی گەشمەرڎە قارەمانا وەردەواما جە ئەرەکۊشا شۊڕشگېڵییە یۊگېرتەکەمانە دژوو فاشیزمی ئاکەپەی و مەهەپەی، ئی کۊشیا تاریخیە، بۊ بە مەڵامەتو کاولکەرڎەو زیهنیەت و سیاسەتی فاشیستی و کوشندەی جە تورکیا جە کەسایەتی ئاکەپە و مەهەپەینە. جە ھورچنیەکاو ١٤ و ئایارینە گورزۍ حېقمە جە فاشیزمی دریۊ، ڕاو سەرکۊتەی کریۊوە پۍ ئەرەکۊشای ئاخېزی دیموکراتیکی کە گەشمەرڎەکېما ٥٠ ساڵۍ چېۋەڵتەر دەسشا پنەکەرڎ. سەرو ئی بنەماۍ، داوا جە گرڎو گەلا تورکیای، بەتایبەت گەلوو کورڎی، حەرپاسە ژەنا و جوۋانا و کرێکارا و ڕەنجدەرا کەرمۍ چی ڕاسییە یاۋانە، بەشڎارۍ با جە ھورچنیەکا ١٤ و ئایارینە، هامکارۍ با جە وڕناو فاشیزمی ئاکەپە و مەهەپەینە، ئەگەر هێزەکۍ ڕەنج و ئازاڎیی بلا پەرلەمان، ڕېوە وەردەمو کورڎسانی ئازاڎیی و تورکیای دیموکراتیکینە کریۊۋە کە ئامانجو دەنیزی و یوسفی و حوسەینی بۍ.

پەنج شۊڕشگێڵۍ کورڎی جە ٩ و ئایارینە دریۍ قەنارە

١٣ ساڵ چېۋەڵتەر ، دەوڵەتو ئێرانی جە ٩ و ئایارو ٢٠١٠ینە، پەنج شۊڕشگێڵۍ و ۋڵاڎپارێزۍ کورڎیش جە داردۍ، ئاڎېچ پېکئامېبێنۍ جە:" شیرین عەلەمهولی و فەرزاد کەمانگەر و عەلی حەیدەریان و فەرهاد وەکیلی و مەهدی ئیسلامیان". جە یاڎو ١٣ ساڵەو گەشمەرڎەبیەیشانە، بە ڕێز و ئیحترامۊ یاڎو ئی گەشمەرڎا کەرمېوە کە بەبۍ ئانەی چەمۍ پرتنا ڕوۋەشا جە پەتەو قەنارەی کەرڎ. سیێنزە ساڵۍ سەرو گەشمەرڎەبیەیشارە ۋیەرڎ، ئینە چېش بەروزۊ...؟ بەرش وزۊ قەنارە حیچ خزمەتێۋەش بە دەوڵەتو ئێرانی نەکرڎەن و مەتاۋۊ گەلوو ئێرانی جە ویستو ئازاڎیی دوور وزۊوە، بەتایبەتی ژەنا ۋەرکەوتوو کورڎسانی و ئێرانی؛ گەنجان و گەلۍ ئێرانی بە چەمکەرڎەی چی گەشمەرڎا هەشت مانگېن ئاخېزېوە گۊرە ڕاۋەبەرکەرا چېرو درووشمەو «ژەنۍ، ژیای، ئازاڎیی»نە، ئاشكران یاڎو گەشمەرڎاما چی ئاخېزەنە زینڎەن کە تەئسیرش سەرو گرڎو جەهانیۊ یانەرە. پی بۊنۊ، داوا جە حکومەتو ئێرانی کەرمۍ جە ڕاسییەکان یاۋۊنە و بەعالی ۋینۊ کە، قەنارە مەتاۋۊ گەلی و ژەنا مرڎنۊ جە حۊلدای پۍ ژیایۍ ئازاڎی؛ پێۋیسا حکومەت دەس ھورگېرۊ جە سەرکوتکاری و ستەمی بۍ جوۋابو شۊڕشگێڵا بڎۊۋە، حەرپاسە داوا جە هێزە ئازاڎیوازەکا ۋەرکەوتوو کورڎسانی کەرمۍ بەعالی جە ڕاسی گەشمەرڎا یاۋانە، خۊتانکەرڎەی جە گەشمەرڎا کەرا و ئامانجەکاشا بارا دی و جە کۊشیای ئازاڎینە جابەجېش کەرا.

ئولاش کە جە ڕەقە گەشمەرڎە بی

ڕۊو ٩ و ئایاری، یاڎو گەشمەرڎەبیەو هەڤاڵ و هامڕای ئازیزیما، جوۋانی قارەمانو گەلا تورکیای و پارتو کۊمۊناری شۊڕشگێڵی/ هێزە یۊگېرتەکا ئازاڎیی (DKP-BOG)، ئولاش بایراکدارین، ئاڎ جە ڕەقەنە دژوو چەتە تیرۊریستیەکا داعشی جەنگیا. پی بۊنۊ، بە ڕێز و ئیحترامۊ یاڎو ئی شۊڕشگێڵە گۊرەیە کەرمېوە کە فەرمانڎەیی خەتەو مدرامانیش کەرڎ چی سەردەمەنە دژوو کودەتای فاشیستی ١٢ و ئاداری. "ئولاش بایراکدار" دەورۍ گۊرەش بۍ جە پەرپنەداو ئاخېزو ۋەرنیشتی و ئەرەمەرزناو جمیەری شۊڕشگڵیی یۊگېرتەی گەلا (HBDH)، یاڎش گرڎ وەختۍ مەنۊوە جە پنەداو نەتەوەی دیموکراتیکی جە سەرنیشتو و ۋەرکەوتوو سوریای و ئەرەکۊشا شۊڕشگێڵییە یۊگېرتەکەما جە تورکیا. گەلوو کورڎی و گەلا تورکیای جە ھورچنیەکا ١٤ و ئایارینە فاشیزمو ئاکەپە و مەهەپەی بەزنا و، ڕا کەراوە ۋەردەمو دیموکراسینە و ئامانجەکا هەڤاڵ ئولاشی زینڎە کەراوە و بەدیش مارا.

"هۊزان مزگین"ە، هونەرمەنڎە و گەریلۍ بۍ

ڕۊو ١١ و ئایاری، یاڎو ٣١ ساڵەو گەشمەرڎەبیەو هەڤاڵە مزگین-ېن، کە ساڵەو ١٩٩٢ جە مدرامانەنە دژوو سوپاو ئەرەگیری تورکی فاشیستینە گەشمەرڎە بیە. جە یاڎو گەشمەرڎەبیەیشەنە، بە ڕێز و وەشەویسییۊ یاڎو هەڤاڵە مزگینۍ کەرمېۋە و وەعد مڎەیمۍ بە بەدیئارڎەو ئامانجەکاش، هەڤاڵە مزگینە پېسە ژەنېوە ئازاڎیوازۍ و هونەرمەنڎە و گەریلۍ، ئانەش نیشانە دایمۍ ئینۍ جەیۊی جیا نیەنۍ، بەڵکم بەپێچەوانۊ یۊترینی تەمام کەرا. سەرو ئی بنەڕەتیە، گورزێوە تنەش ئەشاو جە حۊلەکاش پۍ جیاکەرڎەیۊ هونەری کورڎی جە جەنگو ئازاڎیی و گەریلایی. پی جۊرە، خەتەو ئاپۊچیش بەروست، حەرپاسە خەتەو ھەرمانەی شۊڕشگێڵیەش پەرەپنەدا، ئی خەتۍ ٣١ ساڵۍ ژیۋا، بیە بە ڕۊشنکەرەوەو  ڕاو ئانیشا کە گەرەکشانە سەرحاڵو هونەری و جەنگی با، چڕۊشا پۍ هونەری و جەنگی تەمامی. ئێمە قەناعەتما هەن کە جەمەو ژەنا و جوۋانا ئازاڎیوازی کورڎی، بەعالی چی خولقۍ میاۋانە، سەرو ڕاو هەڤاڵ مزگین-یۊ ملا بەرەو سەرکۊتەی.

پراکتیکو ٥٠ ساڵۍ ۋیەرڎەی بەرش وزۊ، داواو ئازاڎیی و دیموکراسی و ڕێکوستەی و پراکتیک جە کورڎسان و تورکیانە، بە وەڵېوەبیەو گەشمەرڎا وەڵۍ کۊتەن و بیەن بە میراسو گەشمەرڎا؛ جە دەنیز گێزمشیۊ حەتا حەقی قەرار، جە هونەرمەنڎ مزگینېوە حەتا چیا گابارە، ئینە ڕاسیین، گەشمەرڎەکېما بیېنۍ بە شۊڵە چراوەو ڕۊشنکەرڎەیۊ ڕېما، ئاڎۍ ئاینڎە و ئیسە و ۋیەرڎەو ئێمەنۍ، ئاڎۍ سەرچەمەو قوەتی ئەساسی ئێمەنۍ، جە گرڎ وەخت و شۊنېوەنە. دۊزو گەشمەرڎا، دۊزێوە گۊرەن، قەت مەگنۊ و گرڎ وەختۍ سەرگنۊ؛ ھېزی پاسە بۍ، ئارۊیچ حەرپاسەن، صەبایچ حەر پاسە بۊ؛ ئا کۊشیایەی فاشیزمی بەزنۊ و گۊشەگیریی دلېنەبەرۊ و ئازاڎیی جەستەیی ڕابەر ئاپۊی مسۊگەر کەرۊ، بە وەڵېوەبیەو گەشمەرڎا سەرگنۊ.

سەرو ئی بنەڕەتیە، ھەمڎیسان بەڕێز و وەشەویسیۊ یاڎو گرڎو گەشمەرڎا مانگەو ئایاری کەرمېوە، داوا جە گرڎو گەلی و دۊساما کەرمۍ، گرڎ ڕوۋۍ ئایاری کەرانۍ بە ڕۊو چالاکی، ئەرەکۊشای ئازاڎیی چڕتەر کەراوە و سەرو ڕاو گەشمەرڎە قارەمانەکاماوە با».

ھ .ش