ڕاوەبەری پلاتفۆرموو هۆرام-ی بە بۆنەو جەژەنەکێ ڕۆو جیهانی کۆبانێ و جەژنەو ‘خاوەنکار’ی ئەرەیاونایوش دان و سەرەڕاو پیرۆزکەردەی، هەر دوێ جەژنەکێش پەوەستێ هەنتری کەردێنێوە و ئاشکراش کەردەن: کۆبانی درێژەو پەیام و مدرامانوو ‘خاوەنکار’یەن جە وەرانوەر بە نەیارا ئازادیەنە.
بەیاننامەو پڵاتفۆرموو هۆرام-ی بە بۆنەو ئاماو یەسناو خاوەنکاری و ساڵرۆ سەرکەوتەو کۆبانی. 
پلاتفۆرمەکە دەستنیشانش کەردەن: ‘خاوەنکار’ ئاڕۆ بەشێن جە شناسنامەو کۆمەڵگاو یارسانی و هۆرامانی جە وەرانوەروو زۆڵم و چێردەسەینە و ئانەکە ئا جەژنێشە جە ٧٠٠ ساڵێ چێوەڵتەرەوە تا ئاڕۆ ئاستەنێنەوە، پنەوازی کۆمەڵگاو یارسانییەن پەی یاوای بە مافەکاو وێشا، چێروو فەلسەفەو ‘خاوەنکار’ یەنە.

تەمامی ئەرەیاوناکەو ڕاوەبەری پلاتفۆرموو هۆرام-ی:

ئێساڵ جە وەختێنە یەسناو خاوەنکاری یاد کەرمێوە کە هاموەختا چەنی ڕۆو جیهانی کۆبانی . ئانە کە یاگێ باس کەردەینە نزیکی پەیاموو خاوەنکاری و مدرامانوو کۆبانیا. ئانە کە پەیاموو خاوەنکاریش جە ٧٠٠ ساڵێ چێوەڵتەر تا ئاڕۆ ئاستەنۆ پنەوازی کۆمەڵگاو یارسانیا پێ یاوای بە مافەکا وێشا چێروو فەلسەفەو خاوەنکارینە.
٧٠٠ ساڵێ چێوەڵتەر ‘سۆڵتان سەحاک’ و یاوەرەکێش پەی سەروستەی باوەڕی یاری کە باوەڕیە ئینسانی و ئازادیوازیا، جە وەرانوەروو نەیارەکاشا پێسەو سپاو چیچەکی کە دژوو گرد باوەڕیە و پێوەرەژیوایە بێنێ، چێردەسیشا پەسەند نەکەرد مدرماناشا هۆرچنی. بە جیائاستەو و دەشتەو شارەزووری پەنابەردەی بە کەشەکا هۆرامانی قۆناخێ تاریخیەشا پێ پارێزناو ویر و  فەلسەفەو یاری دەست پنەکەرد. جەژنە (یەسنا)و خاوەنکاری کە ئەنجامو مدرامانوو (سوڵتان سەهاک-سان سەهاک)یەنە، ئارۆ بەشێن جە شناسنامەو کۆمەڵگاو یارسانی و هۆرامانی جە وەرانوەروو زوڵم و چێردەسەینە.
مدرامانوو سوڵتان سەهاکی و یاوەرەکاش پێسەو داود، بنیامین و پیرمووسی’ که به ‘یەری تەن’ ئەژناسیانێ، بیێ بە بنەڕەتوو  فەلسەفێوە کە جە دماو ٧٠٠ ساڵان، جارێوتەر جە کۆبانێ رەنگشداوە. مەنەیۆ سوڵتانی و یاوەرەکاش جە مەڕە نۆ جە کەشەکاو هۆرامانینە پەی ماوەو یەرێ ڕوا نیشانەو ئا ویر و فەلسەفەینە کە پێ یاوای بە ئازادی و ژیوایە تازە جە وەرانوەروو تەسلیم بییەی، مشیۆم مدرامانی هۆرچنمێ. یاد کەردەیۆ یەسناو خاوەنکاری جەلاو واڵە و برا یارسانەکاما سووربیەیا سەروو یاوای بە مافەکاو یارسانا جە چێروو دەسەڵاتوو جمهوری ئیسلامی ئێرانی کە بە زوڵم و ستەمیش بە گرد جۆرە دژایەتی یارسانەکا مەکەرۆ. گێرتەی یەرێ ڕوا ڕۆچێ و جەم بییەی باوەڕدارا یارسانی جە جەمخانەنە، وەفایەن پێ مدرامانوو سوڵتان سەحاکی و یاوەرەکاش.

پێسەو پلاتفۆرموو هۆرام-ی، سەرەڕاو موبارەکبایی جە ئی یادە پیرۆزەیە، بە یادکەردەی سوڵتان سەهاکی و یاوەرەکاش، هەر پاسە شەهیداو ڕاو ئازادی کۆبانێ و چەنی فەلسەفەو خاوەنکار-ی و مدرامانوو کۆبانێ، پەیمان تازە مەکەرمێوە تا یاوای بە ئازادی یەکجاری و ژیوایە ئازاد، درێژەدەرێ ویر و فەلسەفەو خاوەنکاری و کۆبانێی بێمێ.