ئوستڕالیانە پارتوو کرێکارا (ئەی ئێڵ پی) ئینا دەسەڵاتەنە و پەرلەمانتارەو بازنەو سیدنی ئا پارتەیە چاریهما کالیاندە پەی چارەسەری سیاسی و دیموکراتیکی پرسوو کوردی داواش کەرڎە کە ڕابەروو گەلوو کوردی عەبدوڵا ئۆجالان ئازاڎ بکریۆ.

پەرلەمانتارەو پارتوو کرێکاراو ئوستراڵیای چاریهما کالیاندە بەشداریش جە چالاکی 'ڕۊو جەهانی کتێبەکا ئۆجالان'ینە کەرڎ و پەیامێوە ڤیدیۆییش وەڵاکەرڎۆ، کە چنەشەنە ئامان: "من بەشوو ١٥ەمینوو کتێب و 'پېسە بیرمەندێوە جەبارەو یەکانگیری تیۆری و پراتیکی ئۆجالان'ی وانووە کە بیرمەند و کۆمەڵناسی ئەمریکی دەیڤید گرەیبەری نویستەن. گەرەکما جەبارەو ئاژەو عەبدوڵا ئۆجالانیوە چن چېوېوە وزوو ڕووە. بەرهەمۍ فرېش جە چنڎین بەرگېنە هەنۍ، بەڵام بېجگە جە کوردەکا و جەهانوو بەری پۍ ئەنەیاوای چا بەرهەما تووشوو دژواری بانۍ.

بە تایبەتی جە ماوەو زینڎانیشەنە بە وتارەکاش جە بارەو میکانیزمی دیموکراسی راستەوخۆی تا ئەگەروو وەشبیەو گلېرگېوە کە پەشتی بە فیزیاو کوانتۆمی بەسۆ و جەهانێوە فرە توێژ، یەکانگیری تیۆری وینیۆ کە مەتاویۆ جە پۊلېنکەردەییەکا ئیسەو ڕۊشنفکرانە خوڵقیۊنە. قورساییش وست سەروو ۋەرکەوتوو دلېڕاسەی. گرڎوو ئا نویستەیاشە دلۍ هەلومەرجۍ پا جۆرەینە نویستۍ کە ڕاو بەکارئارڎەی ئینتەرنێتیش نییا، پېسە کەرەسەو ئەوەکۊڵیایچ تەنیا ئیسفاڎەش جە یەرۍ کتێبا هۊرگېرتەن، کە ڕا دریېنە پارێزنەرەکېش بەین بەین پنەش بیاونا. ئانە ئاژېوە سەرنجکېشا. حەرپاسە ڕاش پنەدریېنە کە ئا فکرا ۋەروودەم و داڎگاینە وزۆ ڕووە کە چنەشەنە بە خیانەت چا وڵاتەنە تۆمەتبارکریابۍ.

جگە جە بڕۍ بازنۍ تایبەتۍ توندڕەوی، کە ئا بەرهەماشە پەشتگۊش وزا، زانایا تەری پەیوەسۍ بیۍ بە ئەندێشە و فکرەکاشۆ. جە ڕاو ئی قسایچمۆ حۊڵ مڎەو ئانەی هۊرسەنگنوو".