مدرامان جە هەرێمەکاو پارێزنای مێدیاینە بە سەرمەشقایەتیی گەریلاکاو یەژاستاری بەرڎەواما. گەریلاو یەژاستاری زەلال جزیرە یوە چا گەریلایانە، کە بەشدارییش جە مدرامانەکەینە کەرڎەن، بارەو دمایین دوایین دۊخوو جەنگیوە  ورسەنگنایش کەرد.

'سەروو ئا خەتێوە هامڕا بێریتانۍ خوڵقنێنە ملمۍ ڕارە'

گەریلا زەلال جزیرە ئەرەیاوناش، کە گەریلاکاو یەژاستاری ئاڤاشیننە کە جەنگ دلێشەنە دژوار بۍ، دەور و ئەرکێوە گرنگشا گێرت گەرڎەن و واتش، "وەراوەروو هجوومە بەرڎەوامەکاو دوژمنی، ئێمەیچ بەشداریما جە جەنگی و مدرامانینە کەرد. بەتایبەت هامڕا سارا و روکەنە نیشانەو گرد لاێشا دا، کە کۊشیای ژەنا یاوان چە قۊناغێوە. جەنگ چندەیچ دژوار بۊ ئێمە مدرامانیما میاونمۍ ئاستوو سەرکەوتەی و هەرگیز شکس قبووڵ  مەکەرمۍ. پێسە ژەنا ئێمە ئانەیە بە ئەرک و وەرپەرسبییەی وێما مزانمۍ. سەروو ئا خەتێوە گنمۍ ڕا، کە هامڕا بێریتانە خولقنانش. گەشمەرڎە بێریتانە دژوو خەتەو  خیانەتی چالاکیی گەورەش کەرد. ئارۊیچەنە بە هەزاران بێریتانۍ دژوو خەتەو خیانەتی بە هەمان شێوە وێگێری کەرا. جە هەرێمو بۊتانینە هامڕا داستان بۊتانیچ خەتەو مدرامانوو گەشمەرڎە بێریتانێش بە بنەما گێرت و تا نەگنۊ دەسوو دوژمنی گیانو وێش بەخت کەرد. سوپاو ژەنۍ جە سایەو هامڕا گیانبازەکامانە یاوۍ ئی قۊناغە".

گەریلا زەلال جزیرە ئانەش وست ڕووە،  ئانە کە ئارۊ چندین مەنتێقاو  کوردستانینە بەتایبەت ئاڤاشیننە، زاپنە و مەتینانە مدرامانێوە گەورە  هەن ئارانە و پێسە بەرڎەوام بی: "ژەنە گەریلاکۍ چی مدرامانەنە بەشدارێنۍ و دژوو دوژمنینە چالاکیی کاریگەر کەرا. ئانە کە ئێمەش وەراوەروو دوژمنینە یاونێنۍ ئاستێوە قەوەتی چینە، ڕابەر ئاپۊن. پێسە گەریلاکاو یەژاستاری پەی ئێمە گرنگ و مانادرا، کە بیمۍ بە هێزی سەرمەشقو کۊشیای دژوو دوژمنی. دوژمن پەشتیش بە تەکنەلۊژیای بەستێنە، وەلۍ ئیرادەو گەریلای تەکنەلۊژیاو دەوڵەتو تورکی شکس پەنە مارۊ. ئێمە تا دما دڵۊپەو ونێما پەی ئازادیی ڕابەر ئاپۊی و کوردستانی کۊشیەیمۍ، ئێمە دوژمنی ماڕمۍ و سەرکەوتەی مسۊگەر و یەکلایی کەرمێوە"