چالاکییەکۍ 'ئیشکگیری داڎپەروەری' جە ٢٨ەمین ڕۆنە بەردەوامېنۍ، کە جە چوارچێوەو هەڵمەتەو 'ئازاڎیی پۍ عەبدوڵا ئۆجالانی، چارەسەری پۍ پرسوو کوردی' و حەرپاسە پۍ پەشتیوانی جە مانگرتەی واردەو زینڎانیا دەسشپنەکەرڎەن. یۆ چا چالاکییا جە شاروو وانیەنە ملۆڕاوە، کە ڕووانە سەڎان کەسۍ سەردای چالاکوانا کەرا. چالاکوانەکۍ پاگیرێنێ سەروو بەردەوامی چالاکییەکاشا هەتا هۊرگێرتەی گۆشەگیری سەروو ڕابەروو گەلوو کوردی عەبدوڵا ئۆجالانی.

"گۆشەگیری تاوانەنە دژوو مرۆڤایەتی"

محەمەڎ نوری چیچەک ئەرەیاۋناش، کە رۆڵەکەش جە زینڎانەنە مانیش جە واردەی گرتەن و ئانەش وست ڕووە، کە مەبەس جە بەشداریکەردەی جە ئیشکگیری داڎپەروەری پەشتیوانیکەرڎەین جە زینڎانیا مانگرتەی و واتش:"پېسە ئانیشا کە بەشدارېنۍ جە ئیشکگیری داڎپەروەریینە، ئێمەیچ بەشداریما کەردەن، ئێمە چالاکی ئەڎایا بەرز نرخنمۍ و سڵامشا ۋنەکەرمۍ. گۆشەگیری تاوانێوەنە دژوو مرۆڤایەتی، مشۊم یاسا پۍ گرڎ کەسێوە ڕەوا بۊ، بەڵام چېگە یاسا بە پاو کەسێوە جابەجێ کریۆ، ئێمە مزانمۍ بەپاو یاسای مەبۆ گۆشەگیری کریۆ، ئاڎۍ جە 'ئاشتی' تەرسا، بەڵکم بەپاو سیاسەتوو دلېنەبەردەی و ئینکاری مامەڵە کەرا. حەتا دەنگوو بەڕێز ئۆجالانی نە ژنەویۆ، ئاشتی وەش مەبۆ."

"سی پی تی شەریکوو تاوانەکێن"

محەمەڎ نوری چیچەک جە درێژەو قسەکاشەنە واتش:"بەپاو یاساکا، سزاکۍ حەرچیېوە بۆ، گرڎ زیندانیېوە مشۊم بنەیانەکەیش وینۆ، مافوو ئانەیش هەن بە تەلەفۆن و نامە کیانای چنی پارێزنەرەکاش کۆبۆوە. داخەم مەشۊ دەسەڵات مافەکاشا پاشێل کەرۆ و گۆشەگیری مسەپنۆ، ئاڎۍ فرە عال مزانا ئەنجامەکۍ گۆشەگیری قەیرانەی ئابووری و سیاسیش شۊنەو ۋېشەرە ئاردەن، بە تایبەتی کۆمیتەو ڕاگیریکەردەی جە ئەشکەنجەی(سی پی تی) چەمڎاری نادادیەکەی کەرۆ وبێدەنگا پۍ چی؟، چونکە شەریکوو تاوانەکېن، ئێمە پېسە بنەیانەو زنیڎانیا ۋەروودەموو مانگرتەی زارۆڵەکامانە بێدەنگۍ مەبیمۍ، مافوو دیموکراتیکی ۋېما بەکار مارمۍ، تا ئا وەختەی گۆشەگیری دمایش مۍ، بەردەوامۍ بیمۍ جە چالاکییەکاما."

'زینڎانەکانە ستەم هەن'

سیما گوربوزە ئەرەیاۋناش، بە ئامانجوو پاڵپەشتیکەرڎەی ئەڎایا ئاشتی، ئاڎېچ بەشدارۍ ئیشکگری داڎپەروەری با و واتش:"سڵاموو ۋېم پۍ گرڎوو ئەڎایا کیانوو، چی وەختەنە پێویسا گرڎ پەشتگیری ئەڎایا کەرمۍ، ستەم و گۆشەگیری زینڎانەکانە هەن، پۊکەی ڕۆڵەکېما دەسشا بە مانگرتەی جە واردەی کەردەن، ئێمە گەرەکمانە گۆشەگیری سەروو بەڕێز ئۆجالانی و زینڎانیەکا هۊرگیریۆ."

'شمە پۍ چی داڎپەروەری خوڎای جابەجێ مەکەردۍ؟'

خانم ڤارلی-ە ئاماژەش پانەی کەرڎ، ئانۍ ۋېشا بە موسڵمان پێناسە کەرا، پیمەر و داڎپەروەری دینی مەبەرا ڕاوە و واتش:"شمە ماچدۍ داڎپەروەری خوڎای بەرمۍ ڕاوە، مزگی وەشکەردۍ ، ڕۊچۍ گێردۍ، نما کەردۍ، ئەی پۍ چی داڎپەروەری خوڎای جابەجێ مەکەردۍ؟ مادام ئەگەر ئینە وڵاتێوە ئیسلامییا، مشۊم بە پاو ئیسلامی و قورئانی مامەڵە کەردۍ ئەی چی داڎپەروەری چی وڵاتەنە نییا؟ بەڵام ئێمە .بەردەوامېنمۍ جە چالاکییەکاما و جە چوارچێوەو مافی و یاساینە شۊنەو ئاشتیرە گېڵمۍ."

'پۍ دمایی ئارڎەی بە گۆشەگیری پێویسا گرڎ پېوەرە هەرمانە کەرمۍ'

عەبدوڕەحمان ئەکینجی ئەرەیاۋنۆش کە کوڕەکەش زینڎانی کریان و سزاو ٥٧٠ ساڵا زینڎانیش سەرەرە سەپیان و واتش:"گەرەکمانە ئی گۆشەگیرییە دمایش پنەبۍ و بەشدارۍ چالاکی ئیشکگیری داڎپەروەرینمۍ پۍ ڕۆڵەکاما، کوڕەکەم تەلەفونش پۍ کەردا، واتش تاتە ئەگەر گەلەکەما پەشتیما نەگېرا گردما مرمۍ، حەر پۊکەی پێویسا گرڎ پېوەرە پۍ هۊرگېرتەی گۆشەگیری سەروو عەبدوڵا ئۆجالانی و زینڎانیا هەنگامە بنیەیمۍ."