سوپاو ئەرەگیرو تورکی و چەتەکێش جە ٢٣ۍ تشرینو یوەمیۆ هرووژمو ئەرەگیریەکێشا پەی سەرو هەرێمەکاو سەرنیشت و ۋەرکۆتوو سوریای دەسپنە کەرڎێنۍ. بە کاولکەردەی چێرخانی و کەرتە خزمەتگوزارییەکا و بە ئامانج گێرتەی ناوەندە مەدەنییەکا، ئامانجش دلێنەبەردەی سەروەری و سەقامگیری هەرێمەکەین کە بیەن بە جوگرافیاو پێوەرە ژیۋای و سەقامگیری پەی گەلاو هەرێمەکەی. چا بارۆ ئەرەنیشتۍ هەرێمەکەی پەی ئاژانسوو فوراتی قسێشا کەرڎۍ و جەختشا چانەی کەرڎۆ کە سەرەڕاو گرڎو هرووژمەکا گەل بەردەوام بۆنە جە مڎرامانی و ۋێڕاگری.

'ئامانج پڕۆژەو نەتەوەی دیموکراتیکین'

عوبێد عەتێیە هاموڵاتیێوە هەرێمەکەین و ئاماژەش پانەی دا کە ئی هرووژمۍ دۆڵەتو تورکی تازۍ نیەنۍ، ئامانج چنەشا قڕکەردەی و ئاوارەکەردەی گەلاو هەرێمەکەین، بەتایبەت سەرو گەلوو کوردی و واتش: "هەرێمەکە جە سوریانە تاکە جوگرافیێوەن کە جە ڕاو پڕۆژەو نەتەوەی دیموکراتیکیوە گرڎو گەلی پێوەرە مژیۋا، پۊکەی ئی هرووژمۍ پەی دلێنەبەردەی ئا پڕۆژەینۍ." عوبێد یاڎش ئارڎۆ کە گەلاو هەرێمەکەی بە ۋنەو گەشمەرڎا یاۋێنۍ پی ژیۋای و سەردەمیە پۊکەی گەل بە مڎرامان و یەکڕیزی ئامانجو ئی هرووژما هاڵی مکەراوە و سەرکۆتەی پەی گەلین.

'شکس بەشو دۆڵەتو تورکین'

ئیحسا قەسابییانەی ئەرمەنیە ئەرەنیشتۍ هەرێمەکەی دەسنیشانش کەرڎ کە دۆڵەتو تورکی پی هرووژما جارێوەتەر ئاستو ستەماکاری ۋێش بەروستۆ، کە نیشانۍ بێهێزی و بێچارەیشا ۋەرا ۋەر بە گەلی و واتش: "دۆڵەتو تورکی شکسو ۋێش قبوڵنمەکەرۆ، بەڵام بە ۋێڕاگری و ئەرەکۆشای گەلی توشو شکسی بیەن. هەرچڼە ئی هرووژمۍ بەردەوامۍ با گرڎو پێكئامایەکا هەرێمەکەی دژش مرداوە و شکس پەی دۆڵەتو تورکین."

'ژەنی بە مڎرامان جوابو هرووژمەکا مڎاوە'

فاتمە قاسم-ە هاموڵاتیەو هەرێمەکەی بە ئاماژەدای بە هرووژمەکا دۆڵەتو تورکی ئەرەیاۋناش مەرامو هرووژمەکا جە بەینبەردەی ژیۋای هەرێمەکەین و وەڵاکەردەیۆ تەرسی و کۆچبەرین و واتش: "گرڎو گەلا هەرێمەکەی پێوەرە پەی بنیاڎنیای وڵاتەکەیما کارمکەرمۍ و ژەنیچ سەرمەشقی ئی مڎرامانەیە مکەرا. پېسە چنی ڕابەر ئاپۆ ڕاو ئازادیش بە ژەنا نیشانەدا، پۊکەی گرڎ کاتۍ ژەنی ئامانجۍ دۆڵەتو تورکینۍ و دژو ژەنان و گەرەکشا ئیراڎەو ژەنا ماڕۆنە. بەڵام ژەنۍ ۋەرنیشتوو کوردەسانی جە گرڎ مێڎانێنە سەرمەشقی ئەرەکۆشای مکەرا و بە مڎرامانیشا جوابو هرووژمەکا مڎاوە."