پەژاک: ژەعراویکەرڎەی تەلەبا تاوانا دژوو ژەنا و ئەرەیاونای جەنگوو دەسەڵاتین، دژوو گرڎوو گلێرگەی
پەژاک بۊنەو ژەعراویکەرڎەی تەلەباوە، جە مەکتەبەکاو وەرکەوتوو کورڎسانی و ئێراننە ئەرەیاوناێش وەڵا کەرڎۊ.
پەژاک بۊنەو ژەعراویکەرڎەی تەلەباوە، جە مەکتەبەکاو وەرکەوتوو کورڎسانی و ئێراننە ئەرەیاوناێش وەڵا کەرڎۊ.
دەقوو ئەرەیاوناکەو پەژاکی:
ژەعراویکەرڎەی تەلەبا تاوانا دژوو ژەنا و ئەرەیاونای جەنگوو دەسەڵاتین دژوو گرڎوو گلێرگەی.
ئانە ئارۊ چێروو نامۍ ژەعراویکەرڎەیی دڵڕەقانەو تەلەباوە جە مەکتەبەکاو سەرتاسەروو ئێرانینە ڕووە مڎۊ، جەڕاسینە تۊڵەو دەسەڵاتین جە گلێرگەی ئازادیوازی. ڕژێمی فاشیست و دژەژن گەرەکشا بە سیاسەتوو "سەرکەوتەی بە تۊقنای" گلێرگەی بەتەمامەتی سەرکوت کەرۊ و ڕاگێری جە شکۊمەندانەتەرین شۊڕشی، یانی شۊڕشوو "ژەنی، ژیوای، ئازادی" کەرۊ.
هجوومکەرڎەی سەروو ژنان و کناچە تەلەبا هجوومکەرڎەین سەروو گرڎوو گلێرگەی و یۊ بە یۊ بنەیانە و خێزانەکانا. هەڕەشێنە دژوو گرڎوو ئانیشا، کە جە وەلێوەبەرڎەی شۊڕشوو ئازادیوازینە سەرتاسەروو ئێرانینە دەورشا هەن. ئی ئاستە جە دڵڕەقی و بێبەزەییبییەی تەنیا جە دەزگای زاڵمانەو دەسەڵاتێوە و دەوڵەتێوە گەندەڵی گنۊوە، کە گرڎ چێوۍ بەتایبەتی ئاسایشش قۊرخ کەرڎەن.
پەی وەرگێرتەی چا هجووما، کە ڕژێم هەوڵۍ مڎۊ کەرۊشا ڕوانە و ئاسایی نیشانە بڎۊ، کردێوە دژەژەنا و مەبۊ گلێرگە و بنەیانەکۍ چەمەڕوانییشا جە دەزگا ئەمنییەکاو دەوڵەتی بۊ، کە پەی وێشا بەشڎارێنۍ چا پڕۊسە تاوانکارییەینە. جە ڕژێمە دەوڵەتگەرا و فاشیستییەکانە تەنیا خودوو گلێرگەی تاوۊ وەرگێری جە وێش کەرۊ.
بە دڵنیاییوە هجوومکەرڎەی سەروو تەلەبا، سیناریۊیۍ دڵڕەقانە و تاوانکارانەو ڕژێمین بۊنەو راگێریکەرڎەی جە وەلێوەبییەی وەڵیکەوتەی ژەنە کۊشیایا و ئازادیوازا گلێرگەی ، جە ڕۊو جیهانیی ژەناوە تا نەورۊزوو مدرامانی. تۊڵەی زاڵمانە جە شۊڕشی هەقەتینوو ژەنی، ژیوای، ئازادی. پا کرڎەوە تۊقنەرا گرڎوو گلێرگەی و چینەکاو کۊمەڵا خەڵکی وزۊ تەرسۍ جیددیێوە. ئی ڕەوتە بە شێوەی فەرمی پڕۊسەو ژەنکوشتەی سەروو دەسوو دەزگاکاو دەسەڵاتی و ئیسەیچ سەرباروو تەمامیای چند مانگۍ حیچ یۊ جە بکەرا و ئا تاوانا نەگیریێنۍ و سزا نەدریێنۍ، ئانەیچ بە ماناو ئانەینە خودوو دەسەڵاتی دەسش چا تاوانانە هەن. ژەوعراویکەرڎەی تەلەبا تاوانا دژوو ژەنا و ئەرەیاونای جەنگی بایۊلۊژیی تایبەتوو دەسەڵاتین دژوو گرڎوو گلێرگەی، ئی سیناریۊ قێزەون و ترسناکە بە ئامانجوو کۊتو بەندکەرڎەی ژنان جە زەنجیروو دیلی و کۊیلایەتیی دایمی، کە ڕژێم هەرمانەش پەی کەرۊ و گەرەکشا کەرۊش.
پارتوو ژیوای ئازادوو کورڎسانی (پەژاک) جگە ئیدانەکەرڎەی تاوانوو ژەعراویکەرڎەی تەلەبانو دژەژەنیی دەسەڵاتی، داوا جە گرڎوو چینەکا، کۊمەڵاو خەڵکی، بنەیانەکا، پیشەوەرە مەدەنییەکا و بەتایبەتی چینوو مامۊسایا و تەلەبا کەرمۍ، کە ڕا نەڎا سیاسەتوو ژەنکوشتەی ڕژێمی بۊ بایسوو ڕاگێریکەرڎەی جە وەڵێوەبییەی ژەنا جە شۊڕشوو ژەنی، ژیوای، ئازادینە. چێگەوە پەژاک پەشتیوانی جە کۊبییەیۊ ناڕەزایەتییەکاو مامۊستایا پەی پارێزگاریکەرڎەی جە شکۊ و کەرامەتوو تەلەبا و ژەنا کەرۊ. بێگومان گلێرگەو ئێرانی بە ئاستێوە جە هۊشیاری و کرڎەی شۊڕشگێڵنانە و ئازادیوازانە یاوان، کە تواناو وەرگێریکەرڎەی و پارێزنایش جە وێش هەن. بە سەرەمڕ کۊشیای، بەتایبەتی کۊشیای ژەنا، کریۊ گرڎوو تاوانەکا و تەرسەکاو فاشیزمی کۊنترۊڵ کریۊ.
س.ز
