ئەنداموو دەسەو ڕاوەبەری کەجەکەی مسەفا قەرەسوو جە میانوو بەرنامێوە تایبەتی میدیا خەبەرینە سەروو چنڎین مژارا گرنگی بەتایبەتی گۆشەگیرکەردەی رابەروو گەلوو کوردی عەبدوڵا ئۆجالانی قسێش کەردۍ.

قەرەسوو ئاماژەش بە گۆشەگیری ئیمراڵی کەرد و واتش، "٢٥ ساڵێن گۆشەگیری سەروو رابەر ئاپۆیرە پەیڕەو کریۆ. پاش وستەن ساڵەو ٢٦ەمینیوە. رابەر ئاپۆ حەر جە یووەم ڕۊوە سیستموو ئیمراڵیش هۊرسەنگنا، ئەرەیاۋناش کە ۋەرپرسیاروو ئانەی سی پی تییا، سیستمەکە چنی ئەوروپای ئاماڎە کریان. ۋێش جە ۋێشەنە بەردەوام چنی تورکیای ئینا پەیوندینە. سی پی تی ئەرەمەرزیێوە یاسایی نییا. ۋێش پا جۆرە نیشانە مڎۆ، بەڵام بە دڵنیاییوە بەسیانۆ ببە ئیراڎەی سیاسیوە. ۋێش وەختۍ سەردای زینڎانەکا کەرۆ، بە بێ ڕاپنەداو تورکیای گوزارشتەکاش وەڵامەکەرۆوە. مامەڵە و نزیکایەتی سی پی تی مامەڵەو ئەوروپایا. مشۊم پا جۆرە هۊرسەنگنایش پۍ کریۆ. ئەوروپا مامەڵێوە سیاسی ۋەرا ۋەر بە تورکیای کەرۆ. سی پی تیچ هەمان ئا چێویە کەرۆ. جە راسینە سی پی تی  پی هەڵوێسەو ۋێش رەوایەتی بە سیستموو ئیمراڵی مڎۆ".

قەرەسوو ئانەش وست ڕووە کە مشۆم ئا راسیە ئیدانە و سەرکۆنە کریۆ و واتش، "ۋەروو ئانەی جەهانی خەڵەتنا، گەلا خەڵەتنا. ماچا سی پی تی ئەرەمەرزیێوە ڕاگیریکەردەین جە ئەشکەنجەی. ملۆ زینڎانەکا، چەمڎاری کەرۆ، ڕاگێری جە ئەشکەنجەی کەرۆ. بەڵام ماوەو یەرۍ ساڵان گۆشەگیری هەن، ٣ ساڵێن دیدار چنی پارێزنەرا و بنەیانەیش ئەنجام مەڎریۆ. بەڵام ئا ئاژەیە بە ئاسایی موینا. نەک ناڕەزایێوە گولانە، بەڵکم هەڵوێسێوەیچ بەرمەبڕا. ۋەروو ئینەی مشۊم ۋەرا ۋەر پا ئاژەیە کۊشیای ئەنجام بڎریۆ. تا نە کۊشیەیمۍ، ئا ئاژەیە شەرمەزار نەکەرمۍ و بەتنی نەلمۍ گژێشەرە، ئێمە مەتاومۍ ئی ئاژەو سیستموو ئیمراڵی ماڕمۍ. واتە مشۊم سی پی تی پی جۆرە رەخنەش ۋنەگیریۆ و ریسوا و ئیدانە بکریۆ. مشۊم ئینسان فرە هیواش سەر هۊرنەچنۆ. سەر بە ئەنجومەنوو ئەوروپاین و پی جۆرە هەرمانە کەرۆ. حۊڵ مڎۆ پێسە ئەرەمەرزیێوە یاسایی ۋێش نیشانە بڎۆ، بەڵام راسەوخۆ بەسیانۆ بە سیاسەتۆ. جە چوارچێوەو ئەمرۍ و رانماییە سیاسیەکانە جمۆوە. ۋەروو ئانەیچە مشۆم بە راسی سی پی تی شەرمەزار و ریسوا کریۆ.

حەرپۊکەی رەوایەتی جابەجێکەردەی سیستموو ئیمراڵی لاواز بیەن. کۊتەن ئاژێوە پا جۆرۆ جە حیچ ڕووێوە مەتاویۆ داکۆکیش چنەکریۆ. ئەگەر بلمۍ گژێشەرە، کۊشیای کریۆ ئا سیستمە متاویۆ وڕنیۆ و کریۆ دەرفەتوو دیڎاروو رابەر ئاپۆی چنی بنەیانەی و پارێزنەراش ڕەخسیۆنە. حەرپۊکەی مشۊم کۊشیای کریۆ. ئا هەڵوێسەو سی پی تی پۍ ئێمە پاڵنەرێوە گوڕداین بە کۊشیای. پۍ گەلا پاڵنەروو کۊشیاین. پۍ تەماموو مرۆڤایەتی پاڵنەروو کۊشیاین".

وەختوو ئانەی ئامان بەرەکۍ ئیمراڵی مەڕیا

قەرەسوو جە درێژەو قسەکاشەنە ئانەش وست ڕووە کە کۊشیای دژوو پیلانگێڵنی یاوان بە ئاستێوە فرە گرنگ و واتش، "جە ١٠و تشرینوو یووەمیۆن هەڵمەتێوە دەسشپنەکەردەبۍ. ۋەنایۆ پارێزنامەکاو رابەرایەتی بێنۍ. جە ڕاو ئینیشاوە گرڎ ئازاڎیی رابەرایەتی بی بە پرسێوە جەهانی. بی بە ڕووۍ چانە کە هێزە دیموکراسیوازەکۍ، گەلاو جەهانی خاوەندارییشا ۋنەکەرد و کۊشیۍ. حەرپۊکەی کۊشیای پۍ ئازاڎیی رابەر ئاپۆی فرە بەقوەت بیەن. کۊشیای دژوو پیلانگێڵنیی یەکجار بەقوەت بیەن. بێگومان ئێمە جارێوەتەر ئانەی وزمۍ ڕووە، گرڎ وەختۍ دەسنیشانش کەرمۍ. ئانۍ کە بە هەڵمەتەو 'شمە مەتاودۍ ڕۊو ئێمە تاریک کەردۍ'، بە کۊشیایما دەوروو رابەریمارە، قەڵغانشا وەش کەرد، گەشمەرڎەکێمانۍ. دماتەریچ ئا هامڕێما کە پەی ئازاڎیی رابەریما گیانشا بەخشا. کۊشیای ٢٥ ساڵەو گەلەکەیمانە. ئا کۊشیایە جە دژوو پیلانگێڵنی یاوا ئی ئاستە. دیارا کۊشیای بۍ مەڵامەت نیا. حیچ کۊشیایۍ بۍ مەڵامەت نیا. ئەگەر ٢٥ ساڵێن ئا کۊشیایە نەکریۍ، کۊشیای دژوو پیلانگێڵنی میان نەتەوەیی نەیاوۍ ئی ئاستە. ئینە ئاستوو ئەنجاموو کۊشیای ئا ٢٥ ساڵەینە. مشۊم پی جۊرە بوینیۆ. ئەنجاموو رەنج و گیانبازیێوە ئێژایا. پی جۆرە یاوان پی ئەم ئاستیە. ئیسە وەختوو ئانەی ئامان کە بەرەکۍ ئیمراڵی مەڕیا. ئا بەرۍ متاویۆ مەڕیا، متاویۆ ۋەروو یۊی هۊرشێویاوە. هەر چێوۍ رەوایەتیش نەمەنەبۆ مەتاوۆ سەروو پەیاوە ۋێش ڕاگێرۆ. راسی پی جۆرەنە. جە ئاستی سیاسیچەنە پی جۆرەنە، جە ئاستی کۆمەڵایەتی و کولتوریچەنە پی جۆرەنە. حەرچێوێوە رەوایەتیش نەبۆ بەناچاری جە ۋەروو یۆی هۊرشێویۆوە. پیلانگێڵنی جە ئیسەنە حەقەتینێوە پا جۆرەنە کە رەوایەتیش نەمەنەن. سیستموو ئیمراڵی بە زۆر سەروو پەیاوە مردان. بەردەوام جە ویژدانوو مرۆڤایەتینە شەرمەزار و سەرکۆنە کریان، گەلوو کوردی قبوڵش مەکەرۆ. ئیسە ئا هێزۍ کە دلۍ پیلانگێڵنیەکەینە بێنۍ، فرەیشا چنی هێزە پیلانگێڵنەکا نیەنۍ. مەتاوا داکۆکی جە پیلانگێڵنی کەرا و پارێزناش. تەنیا تورکیا مەنەن کە پیلانگێڵنییەکەی پارێزنۆ. بە ئاشکرا ماچوو، پەدەکەیچ مەنەن، حەرپۊکەی هامکاری پەدەکەی و تورکیای پەیوەندی و سیاسەتێوەن پۍ درێژەدای بە پیلانگێڵنیی میان نەتەوەیی.

جە دووەم قۆناغەنە مشۊم هەڵمەتەکۍ بە کۆمەڵایەتی و بە جەماوەری کریۆ

جە قۆناغی دووەمەنە مشۊم هەڵمەتەکۍ بە کۆمەڵایەتی کریۆ، بە جەماوەری کریۆ. گەلوو کوردی بە ۋەرفراوانتەرین شێوە بە شێوێوە کۆمەڵایەتی خاوەنداری جە هەڵمەتەکێنە کەرۆ و کۊشیای ڕاوەبەر کەرۆ. جە مەجال و سیاسی، کۆمەڵایەتی، یاسایینە مشۊم ئەرەکۆشۆ. حەرپاسە جە مەجال و دیپلۆماسینە مشۊم کۊشیۆنە. کۊشیای مشۆم بیاوۆ ئا ئاستەی رابەر ئاپۆ ئازاڎ بکریۆ. ېئانە نزیک بیەنۆ. مشۊم ئینسان بڕواش پانەی بۆ".

مستەفا قەرەسوو یاڎش ئاردۆ کە قۆناغەو دووەمی ئەوروپانە دەسشپنەکریان و واتش، "ئانۍ ئاستی یووەمشا دەسپنەکەرد دۆساو گەلوو کوردی بێنۍ، رۆشنۋیرا، دیموکراسیوازا و چالاکا سەندیکایی بێنۍ. ئیسە ئاڎۍ دەسشا بە قۆناغی دووەمی کەردەن. ئانەی گنۆ سەروو شانا ئێمەی کوردی ئانەنە کە مشۊم قۆناغی دووەم زیاتەر بە کۆمەڵایەتی کەرمۍ، فاڕمێش پۍ جمیەرێوە کۆمەڵایەتی و رابەریما چا زینڎانەنە رزگار کەرمۍ.

چالاکیەکۍ گەریلای هەڵوێس بۍ جە دژوو سیاسەتوو قڕکەردەی

چالاکییەکۍ گەریلای جە ساڵەو ٢٠٢٣ێنە و چالاکییەکۍ مانگەکا کانوونوو دووەمی و شوباتی زەنڎەقوو سوپاو تورکیایشا بەرد. سوپای تورکیشا جە هەرێمەکا پارێزنای مەدیاینە یاونا بە بنبەس و چەقۍ. متاومۍ پی جۆرە هورش سەنگنمۍ. حەرپاۊکەی ئا چالاکیۍ جە هەمان وەختەنە ئاستوو کۊشیایچ جە دژوو پیلانگێڵنیچ نیشانە مڎا. چالاکییەکۍ گەریلای حەرپاسە توڕەیی جە ۋەرا ۋەروو پیلانگێڵنیچ نیشانە مڎا. ۋێش جە ۋێشەنە بەردەوامیدای بە پیلانگێڵنی و درێژەدای بە کۆلۆنیالیزمی قڕکەری سەروو گەلوو کوردی پرۆسێوەنۍ. ماڕای ئەرەگیری جە ڕاو ماڕای پیلانگێڵنیوە مسۆگەر بۆ. وەختۍ پیلانگێڵنیی دلێنەبریا، ئا وەختە سیاسەتوو قڕکەردەی ئەرەگیریچ مەڕیۆ. ۋەروو ئانەی چالاکیەکۍ مانگەو شوباتی فرە گرنگۍ بێنۍ، هەڵوێستێوە بێنۍ جە دژوو پیلانگێڵنی. جە ڕاسینە هەڵوێسێبێنۍ جە ۋەرا ۋەروو قڕکەردەی کوردانە".

دیموکراسی و ئازاڎیی بە ژەنێوە مەعناش بۆ

مسەفا قەرەسوو جە درێژەو قسەکاشەنە ڕۊو ٨و ئاداریش جە گرڎوو ژەنا پیرۆز کەرد و واتش، "ئانۍ کە پەی کۊشیای ئازاڎیی ژەنا رەنجشا کێشان، سڵام جە گرڎی کەروو. گەشمەرڎا ئی کۊشیایە بە رێز و پنەزانایۆ یاڎ مارووە. ٨و ئاداری تەنیا ڕۊو جەهانی ژەنا نییا، تەنیا ڕۊو پەشتیوانی جە ژەنا نییا. تەنیا ڕۊو کۊشیای نییا. ٨و ئاداری بیەن پا ڕووەیە کە ژەنی جەهانی فاڕا، ڕۊو ئازاڎکەردەی جەهانیا".

قەرەسوو ئانەش وست ڕووە کە ٨و ئاداری کۊشیایۍ پا جۆرەنە کە مرۆڤایەتی رزگار کەرۆ، پیایا رزگار کەرۆ، فاڕیان پۍ رۆ و قۆناغێوە پا جۆرەو کۊشیای و واتش، "گرنگیێوە پی جۆرەشە هەن. پۊکاتی مشۊم چی ٨ و ئادارینە ئا ئەنەیاوایە زیاتەر وەڵۍ گنۆ. ئا کۊشیایە زیاتەر بەقوەت کریۆ. رابەر ئاپۆ واتەبێش، سەڎەو ٢١ بۆ بە سەڎەو ئازاڎیی ژەنا و جە ئیساتێوە ئانە بەرکۊتەن. ئا پەیلووایەو رابەر ئاپۆی ئامان دی. سەڎەو ٢١ بە دڵنیاییوە بۆ بە سەڎەو ئازاڎیی ژەنا و چی ٨و ئادارینە ژەنی جە کوردسان، ۋەرکەوتوو دلێڕاسەی و گرڎ یاگۍ جەهانینە جە مێڎانەکانە نیشانەش مڎا کە هێزی سەرمەشقوو کۊشیای ئازاڎینۍ، هێزی سەرمەشقوو کۊشیای دیموکراسینۍ، بە ئازاڎیی ژەنۍ، بە کۊشیای ژەنۍ، ئازاڎیی ماناڎار بۆ، دیموکراسی ماناڎار بۆ، چی ٨و ئادارەینە ژەنی ئانەی نیشانە مڎا. بڕواما پانەی هەن. ٨و ئاداری و ١و ئایاری، ئا دووە ڕووە ئیتر ئاینڎەو مرۆڤایەتی فاڕا. واتە وچیۆ، 'جەهانێوە جیاواز کریۆ بێنە دی'، ژەنی بە بەرجسڎەیی ئانەی بەروزا. پی بۆنۆ ٨و ئاداری جە گرڎوو ژەنا پیرۆز کەروو".

رابەرایەتی بناغێوە تاریخیش پۍ کۊشیای ژەنا نیارە

قەرەسوو سەرنجش وست سەروو دەوروو رابەروو گەلوو کوردی عەبدوڵا ئۆجالانی پۍ ئی کۊشیایە و واتش، "رابەر ئاپۆ ئایدۆلۆژیاو رزگاریش وست وەروو دەسوو کۊششکارا ئازاڎیی ژەنۍ، پاڕادایمش پاڎیشا بەخشا، بەرنامەش پۍ نیێرە، تیۆریش پۍ ئاماڎە کەردۍ. ئانێش سەروو کۆڵەکۍ تاریخیێوە چەسپنۍ. فاڕێش پۍ هێزێوە سەرمەشقی کە متاوۆ جەهانی فاڕۆ، متاوۆ گلێرگەی فاڕۆ. حەرپۊکەی دەوروو رابەر ئاپۆی جە کۊشیای ئازاڎیی ژەنانە یەکجار فرەن. ئێمە متاومۍ باس چانەی کەرمۍ. جە هێزی تا ئارۆ ئا کەسەی گەورەتەرین دەورش جە کۊشیای ئازاڎیی ژەنێنە بیەن رابەر ئاپۆن. مشۊم ئینسان باس چانەی کەرۆ. رابەر ئاپۆ کۊشیای ئازاڎیی ژەنێ فرە بە گرنگ نیێرە. چێش واچۍ؟ واتش، جە کۊشیای ئازاڎیی نەتەوەیی و چینایەتی گرنگتەرا. پۍ ئانەی گرنگییەکەیش وزۆ ڕووە ئانەش وات. بێگومان کۊشیای چینایەتی یاخوڎ کۊشیای نەتەوەیی چێردەساش بە کەم نەنیارە، بەڵام پۍ ئەنەیاوای جە گرنگی کۊشیای ئازاڎیی ژەنۍ و ئەنەیاوای جە کاراکتەروو ئاڎۍ کە کاریگەری کەرۆ سەروو گرڎوو کۊشیایەکا ئی هۊرسەنگنایشە کەرد".

حەرپۊکەی رابەر ئاپۆ بە دەسنیشانکەردەی خەتەو ئازاڎیی ژەنا و ئەرەمەرزناو پارتوو ژەنا پاژکی بە سەرمەشقایەتی ژەنا کوردی، بە سەرمەشقایەتیێوە تیۆریک ئایدۆلۆژیک کۊشیا و جمیەروو ژەناش جە جەهانەنە وەڵۍ وست.

کۊشیای ئازاڎیی ژەنا، پیایایچ جە کۆیلایەتی نەجاڎ مڎۆ

قەرەسوو جە درێژەنە واتش، "پی بۆنۆ گەرەکما ئانەی واچوو، بەڵێ سیستمێوە باڵادەس جە دژوو ژەنا بیەیش هەن، کۆیلایەتی هەن. بەڵام کۆیلایەتی سەروو پیایا خراپتەرا. کۆیلایەتی پیای سەروو پیایچ هەن. کۆیلایەتی فەرمانڕەوایی و باڵادەسی هەن. کۆیلایەتی مەژگی باڵادەس بیەیش هەن. پیایایچ چنی فەرمانڕەوایا دەسشا تێکەڵ کەردەن، چەپەڵۍ بیێنۍ. بەڵێ ژەنی چێروو باڵادەسی پیاینە کۆیلۍ کریێنۍ، بەڵام چەپەڵۍ نەبیێنۍ. باڵادەسی پیای پیایایچ چەپەڵ کەرۆ. ۋەروو ئانەی کۊشیای ئازاڎیی ژەنا زیاتەر جە گرڎ چێوۍ پیایا جە کۆیلایەتی رزگار کەرۆ. رزگاری پیای جە کۆیلایەتی، رزگاربیەیشا جە بێ ئەخلاقی و بێ ویژدانی، ئازاڎیی ژەنۍ مسۆگەر کەرۆ".

قەرەسوو دەسنیشانش کەرد کە خەتەو ئازاڎیی ژەنۍ، ئایدۆلۆژیاو پیای دلێنەبەرۆ و واتش، "جە حەر شۊنێنە کە خەتەو ئازاڎیی ژەنۍ یاگە گیر کریۆ، چا ڕا بە ئایدۆلۆژیای دماکۊتانەی لەق کریۆ و ڕاش پۍ مەمەنۊوە، ئایدۆلۆژیاو دەسەڵاتدارپەرسی ڕاش مەبۆوە. خەتەو ئازاڎیی ژەنۍ ئا خەتێنە کە دەسەڵاڎداری دلێنەبەرۆ، باڵادەسی دلێنەبەرۆ و نمازۊش".

هۊرچنیەی دلێینەی پۍ کوردی گرنگا

مسەفا قەرەسو جە درێژەو قسەکاشەنە هۊرسەنگنایش پۍ هۊرچنیە دلێینەکا جە تورکیا و سەرنیشتوو کوردسانینە کەرد و واتش، "کورد بە گرنگیوە تەماشەو هۊرچنیە دلێینەییەکا کەرۆ. لاو کوردیۆ هۊرچنیە دلێینەییەکۍ جە هۊرچنیە گرڎینیەکا گرنگتەرێنۍ. کورد قۊرتەو ئازاڎییش هەنە. قۊرتەو ۋێڕاوەبەریش هەن. پرسوو خاوەنداری جە بەهاکاش هەن. وەڵۍ گرڎ چێوێنە پرسوو خاوەنداریش جە ۋێش هەن. ۋەروو ئانەیچ هۊرچنیەو دلێینەی پۍ کوردا فرە گرنگا. ۋەروو ئانەیچ خودوو کوردا ئا گرنگیە موینا. ئەگینا جە پەرلەمانەنە وەشکەردەی فراکسیۆنی، چاوە سیاسەت کەردەی گرنگا. ئانەیچ بۆ، بەڵام پۍ کوردا ڕاوەبەری دلێینەی، شارەدارییەکا فرە گرنگتەرێنۍ. راسەوخۆ پەیوەندیش بە گلێرگەی و جوگرافیایۆ هەن، پەیوەندیش بە ئینسانەکاوە هەن. یاگێوەنە کە متاوۆ چنی گلێرگەو ۋێش پێوەرە سیاسەت کەرا. حەرپۊکەی ڕاوەبەری دلێینەی گرنگا.

ۋەروو ئانەینە ئاکەپە کۊتەن گەمە گەورەکۆ. ئانا سەروازۍ، پۆلیسێش کەردێنۍ بە دەنگدەرۍ، فشار مارۆ. ئینێچە گرڎ بەرش وزا کە ئا هۊرچنیەیە چن گرنگێنۍ. کۆلۆنیالیستی قڕکەریچ فرە بە گرنگی تەماسەش کەرۆ. پۊکەی پۍ کوردایچ گرنگا. پۊکەی ئانەی ئێمە ماچمێش ئانەنە، کە بێگومان مشۊم پرۆسەو هۊرچنیەی جە کوردسانەنە بە گرنگ بنریۆرە. ماچا، ئێمە قەیومەکا کیانمێوە. بەراسیچ مشۊم ئا پا گیریەو ۋێشا نیشانە بڎا. مشۊم شکس بە قەیومەکا بارا، ڕوانەشا کەراوە. مشۊم کورد ویستوو ۋێش نیشانە بڎۆ. قبوڵنەکەردەی قەیومی جە هەمان وەختەنە مردایۊن جە ۋەرا ۋەروو سیستموو کۆلۆنیالیستینە. گەلوو کوردی مشۊم ئانەی بزانۆ و بەشداری جە هۊرچنیە دلێینەییەکانە بکەرۆ. هەرمانە راسەکێچ ئینێنە. دەسەڵاتداری ئاکەپە-مەهەپەی حۊڵ مڎا، پۍ ئانەی بڕۍ جە شارەوانیەکا کوردسانی بەدەسبارا گەرەکشانە فشار وزا سەروو گلێرگەی و نازا کورد سیاسەت کەرۆ. لاو کوردیۆ گرنگتەرین یاگۍ کە بتاوا چا سیاسەت کەرا، شارەوانیەکێنۍ.

ئاکەپە حۊڵ مڎۆ تەڵە بنیۆوە، باس جە قۆناغوو چارەسەری کەرۆ. پێسە ئانەی متاوۆ قۆناغی تازەو چارەسەری ئەنجام بڎۆ. یان ئەگەر ئانەیچ نەواچۆ بە واتەی، 'پرۆسەو چارەسەری بۍ، جە بەینبریا، پەکەکەی جە بەینبەرد' حۊڵ مڎۆ گلێرگەی هۊرخەڵەتنۆ. بێ ئانەی شەرم جە ۋێش کەرۆ ئانەی ماچۆ. ئانێچ ئانەی ماچا شەرم مەکەرا و تەریقۍ مەباوە. مشۊم وچیۆ. ئایا کێبۍ جە ئەنەیاوای دۆڵمەباخچەیش ڕەڎکەردۆ؟ ئاکەپە و دەوڵەت ڕەڎشا کەردۍ. رابەرایەتی حۊڵ دۍ ئاڎیشا بارۊنە دلۍ پرۆسێوە چارەسەریۆ. جە دۆڵمەباخچە رێککۊتۍ باسوو پرۆسەو چارەسەری کریا. کێ ڕەڎش کەردۆ؟ دماو ٥و نیسانی کێ بۍ گۆشەگیری تنش سەروو رابەر ئاپۆیرە سەپنا. بۍ ئانەی شەرم جە ۋێشا کەرا باس جە پرۆسەو چارەسەری کەرا. ئاڎۍ ئەنەیاوای دۆڵمە باخچەیشا بە نەبیەی نیارە. ئانەبۍ دماتەر گرڎ چێوۍ دمایش پنە ئاما. پێسە ئانەی کوردەکۍ  یا هەدەپەییەکۍ یا ڕابەرایەتی ئەنەیاوای دۆڵمەباخچەیشا بە نەبیەی نیابۆرە، پا جۆرە نیشانەشا دا. رابەرایەتی ماقووڵتەرین هەڵسوکەوت و مامەڵەش ئەنجامدا و ڕاش پۍ جابەجێکەردەی ئا ئەنەیاوایە وةس کەرد. بەڵام ئانەیچ ڕەڎ کریاوە. ۋەروو ئانەی مەخزوو دەوڵەتوو تورکی کۆلۆنیالیست و قڕکەرا.

با گرڎ کەسۍ بزانۆ، پرسوو کوردی تەنیا بە کۊشیا چارەسەر کریۆ. جە ڕاو دیموکراتیکبیەیۆ مۍ دی. قۊرتێوە پا جۆرە نییا کە کەسێوە بە تەنیا چارەسەرش کەرۆ. بە بێ کۊشیای چارەسەر مەبۆ.

مشۊم کورد ئیراڎەو سیاسی ۋێش نیشانە بڎۆ

رابەرایەتی ئا وەختەیچە بە گومانۆ تەماشەش کەردێبێنۍ. واتەبێش، 'ئایا ئاکەپە، ئەردۆغان ئانەی کەرا، متاوا کەراش یان نا'.واتە بەردەوام نیگەرانیەکۍ ۋێش باس کەردێبێنۍ. ۋەروو ئانەی ئاکەپە، ئەردۆغان ئا مەخزوو ویرکەردەیۊیشا نییا، خاوەنوو ئا ئاستەیە نیەنۍ. پۊکەی مشۊم گەلوو کوردی گۆش پۍ ئا لایەنا نەگێرۊ. حەرپاسە بڕۍ مەیاو ماچا مەزانوو هەدەپە چنی ئاکەپەی دیدار سازکەرۆ.

کێشەو کوردی کێشێوە پا جۆرە نییا کە بە شەو و ڕووۍ چارەسەر کریۆ. کێشێوە پا جۆرە نییا کە بە کۊبیەیۆ چن کەسێوە و چارەسەر کریۆ. کێشێوە پا جۆرەنە کە بە کۊشیای چارەسەر بۆ. ئانەیچ پەنەوازش بە فاڕیای گەورەو مەخزی هەن. مشۊم مەخزی قڕکەر فاڕیۆ.

قەرەسوو دەسنیشانش کەرد کە مشۊم گەلوو کوردی ئیراڎەو ۋێش نیشانە بڎۆ و واتش، "مشۊم جە هۊرچنیەکەینە ئیراڎەشا نیشانە بڎا. ئانە تەنیا هۊرچنیەو شارەوانییەکا نییا. مشۊم گەلوو کوردی واچۆ، ئینە ئیراڎەو منا. من ئازاڎیی، ئشناسنامە و کولتوروو ۋێمم گەرەکا. گەرەکما ۋێم ۋێم ڕاوەبەر کەروو'. دەسنیشانکەردەی ئیرادەی بەقیمەتتەرین چێوا. دۆزوو کوردی جە شارەوانیێوە، جە پەرلەمانتاریێوە فرە گرنگتەرا. مشۊم ئیرادەی سیاسی ۋێشا نیشانە بڎا، هەڵوێسوو ۋێشا نیشانە بڎا. ئێمە قەناعەتما هەن، کە جە هۊرچنیەکانە ئانەی کەرا ".

گەرەکشانە عێراقی و جمیەرەکەیما رووبەڕوو یۊترینی کەراوە

قەرەسوو ئاماژەش بە هامکاریەکا پەدەکەی پۍ دەوڵەتوو تورکی ئەرەگیری  و جموجوڵوو هێزەکاو پەدەکەی جە مێڎانەکا گەریلاینە کەرد. قەرەسوو واتش، " چەمڎاری پێشئامایەکا بنەوستەو پێشمەرگەکا کەرمۍ. جە تەرەفوو ڕاوەبەرایەتیوە بڕۍ لێدوانۍ و ئەرەیاۋنۍ دریۍ. ئانە تازە نییا. وەڵتەریچ جە هەرێمەکاو پارێزنای مێدیاینە یەکینەکۍ پاسەوانوو سنووری ئاڎیشا بێنۍ. گرڎ پەدەکەیۍ بێنۍ. بەڵام ئا وەختە کەمۍ بێنۍ، بەڵام گرڎ پەدەکەیۍ بێنۍ. حەرپاسە متاومۍ واچمۍ، بڕۍ چاڎیشا ۋەروو ئانەی گەمەکۍ پەدەکەیشا دیێبێنۍ، دۆسانە مامەڵە چنی جمیەرەکەیما کەرێنۍ. پەیوەندیشا بۍ. ئا وەختە پا جۆرەبۍ. ئیسە تورکیا و پەدەکە گەرەکشانە گەمەی تازە کەرا. گەرەکشانە عێراقی و جمیەرەکەیما رووبەڕوو یۊترینی کەراوە. دەوڵەتوو تورکی یاوان بە بنبەس چەقان، پەدەکە رسوا بیەن. جە ڕاسینە گەرەکشانە ۋێشا چا ئاژەیە قوتار کەرا. ۋەروو ئانەی بە نامۍ یەکینەکاو پاسەوانوو سنووریوە ملا بڕۍ یاگۍ. بە نزیکەی گرڎ پەدەکەیێنۍ. ئا ئاژە چنی دەسشپنەکەرد؟ ئانە جە سەروو عێراقیوە جە راو فشاروو پەدەکەیۆ ئەنجامدریا. پەدەکە فشار وزۆ سەروو عێراقی. زیاتەر جە تورکیای پەدەکە فشار وزۆ سەروو عێراقی. پەدەکە سەپنۊنەش. پۍ ئانەی ۋێش چا ئاژەیە رزگار کەرۆ ئاڵاو عێراقی بەکار مارۆ. گوایە گەرەکشا عێراقی و جمیەرەکەیما رووبەڕوو یۆی کەرۊوە. ئینە گەمەن. قەناعەتما پاسەن کە عێراق مەگنۆ دلۍ ئا تەڵەیۆ، ئینە جە مەسڵەحەتوو هەردووەلاینە نییا. ئاشکران کە دەوڵەتوو تورکی چەمێش بڕیێنۍ کۊگەی. گرڎ ڕووۍ ماچا میساقی میللی هینوو ئێمەن. ماچا تا کەشەکاو واری پانیشتی هینوو ئێمەن. حەرپۊکەی ئینە گەمەن.

حیچ چێوۍ نیا جە بارەو پەدەکەیۆ وچیۊنە. ۋێش جە ۋێشەنە تا ئیسەیچ هامکاری و داردەسەیی کەرۆ، ئیسە گەرەکشا ئا هامکاریە بیاونۆ قولە پۊپە. ئێمە قەناعەتما چانەن کە عێراق مەگنۆ ئا دامێوە، مەبۆ گنۆ دامەکێوە. تورکیا و پەدەکە جە ڕاو فشارەکاشاوە حۊڵ مڎا عێراقیچ تێکەڵ پا جەنگەیە کەرا".