مسەفا قەرەسوو ئەنڎامو دەسەو ۋێڕاۋەبەری کەجەکەی دەسنېشانشکەرڎ کە ئەرەکۊشاو گەلو کورڎی ئەنجامو ۋرچنیاکا تورکېای یەکلایی مکەرۊۋەو ۋاتش؛" ئازاڎیی و دیموکراتی تورکېانە چەسپېۊ، ئاڎیچ بە ھێزو ھامپەیمانی ڕنجو ئازاڎیی بۊ".
مسەفا قەرەسوو ئەنڎامو دەسەو ۋێڕاۋەبەری کەجەکەی جە مېانو بەشڎاریکەرڎەیش جە بەرنامێۋە تایبەتو کەناڵ و"مەدیا خەبەرېنە" ھورسەنگنایش پۍ مژارە گەرمەکاو ڕۊی کەرڎ. قەرەسوو سەرنجش وست سەرو ھورچنیاکاو ترکېەی و دەسنېشانش کەرڎ کە ئەرەکۊشاو گەلوو کورڎی ئەنجامەکاو ھورچنیای یەکلایی مکەرۊۋە. قەرەسوو سەرنجېچش وست سەرو ڕۊو جەھانی ژەناو سەرنجو ڕابەر ئاپۊی پۍ پەرسو ژەنا.
-ھورسەنگناکۍ قەرەسووی پی جۊرەنۍ:
ۋەڵۍ ئانەینە ئاژەو ڕابەرایەتی و کۊنېشتەکەی ھورسەنگنونە، بە ڕێزۊ یاڎو ھامڕێما "ڕاپەڕین ئامەڎ"ۍ بەرز نرخنونە کە ھامنۍ گەشمەرڎۍ بیە و چی چن ڕوۋاو ئاخرینە ھەۋاڵو گەشمەرڎە بېەیش ئەرەیاۋیا. دلۍ خەباتیەنە ھەڤاڵۍ فرە بەنرخەمابۍ. ھامڕێۋە بۍ کە جە ئامەدۊ بەشڎارەو ئەرەکۊشای بېۍ بۍ. جە خانە ۋاڎەو عەزیز ئۊغلۊو فارقېنی بۍ. ئېنسانێۋە فرە خاکیەبۍ، نەبۍ بە عەزیەت پۍ کەسی، چنی ئانەیچ ئېنسانێۋە فرە بە پرەنسېپەبۍ، کرێکارە بۍ. ڕەنجدەرەبۍ، دلۍ گرڎو ھەڤاڵانە یاگۍ حورمەتی و ڕێزو ۋەشەۋیسی بۍ. ۋەردەوام کۊشیاینە بۍ، جە ڕاسی و حەقېقەتو ڕابەرایەتی یاۋێبێنە. قەناعەتش بە خەتەو ئازاڎیی ژەنۍ بۍ، پۍ ئا مەجالەیجە گرڎو ژیۋایش تەرخان کەرڎەبۍ. جە گر مەجالێنە سەرکۊتۍ بۍ و بەڕاسی زەحمەتش کێشا. ۋەرو ئا زەحمەتکێشایشەبۍ پۍ ئەنڎامیەتی دیۋانو کۊنگرەو گەلی ھورچنیا. دیۋانو کۊنگرەو گەلی ئەرەمەرزیێۋە گرنگا. بە تایبەتی پۍ چەسپناو سېستمو کەجەکەی و کۊمۊنو ئەنجومەنەکا حەوڵ دۍ. ھەڤاڵێبۍ کە چا بارۊ فرە قاڵە بېێبێۋە. ھەڤاڵ ڕاپەڕینە پی جۊرە ڕەنجش کێشا. پۊکەی حەجگېز دلۍ کۊشیایمانە جە ۋیر مەکریۊ. بە دڵنېایۊ ئاۋاتەکاش مارمێنە دی. ئەگەر ئێمە ھامڕاو ئایۍ بېمۍ و گەشمەرڎۍ پی جۊرە گۊرێما بۊ، ئا ۋەختە پێسە جمیەری، گەل ئەشۊ خۊتانکەرڎەی جە گەشمەرڎاو گەلوو کورڎی کەرۊنە، ۋەرکۊتو ناۋەنڎی دیموکراتېک کەرمۍ و پاڕادایمو ڕابەرایەتی تەمامو جەھانېەنە ۋەڵاو کەرمێۋە.
-ھەڵۋێسو ٢٥ ساڵەو ڕابەرایەتی شایەنو ئانەین کە کریۊنە ڕۊمان
ڕابەرما ٢٥ ساڵێن گېریان. ٢٥ ساڵێچ بەڕاسی بەشێۋێۋە ئەفسانەیی ۋیەرڎەن جە ۋەڵېنگەو جەھانی و مرۊڤایەتینە. زینڎانېۍ تەری سېاسی پی جۊرە نېا کە ٢٥ ساڵێش ۋیەرنا بۊ ڕابەرێۋە پی جۊرە بیەیش نېا. ڕاسیچ پەنەوازیش پانەین کە ڕۊمانش سەر بنۋیسېۊ. متاۋو ئانەی ۋاچونە؛ حەتا ئەنەیاۋای سەرو ھەڵۋێسو ڕابەر ئاپۊی جە زینڎانو ئېمڕاڵېنە سازنەکریۊ، ھەست بە ڕاسی ڕابەرایەتی مەکریۊ. ئەنەیاۋای سەرو کەسایەتی ڕابەر ئاپۊی ساز مەکریۊ. بێگومان جبەریچۊ کۊشیای ڕابەرایەتی ھەن. ڕابەر ئاپۊ دەیان ساڵۍ کۊشیا پارتش مەرزنارە. ئەرەکۊشای گەریلایش دەسپنەکەرڎ، گەریلێش پنە یاۋنۍ. جە خەتەو ئازاڎیی ژەنێنە جەنگاوەرێش خوڵقنۍ. بی بە ڕابەرو سەرھورداو گەلەکەیما. ئېنۍ گرڎ ئەنجامو ھەڵۋێسۍ ڕابەرایەتی و کارەکتەرو ڕابەرایەتی و ھونەرو ڕابەرایەتی بێنۍ. بەڵام پێسە وتریۊ گرڎ چێۋۍ جە ۋەختو تەنگو چەڵەمەی و دژوارینە بەرگنۊ. ۋەختە دژوارەکۍ بانە بە مەڵامەتو بەرکۊتەو کەسایەتی و گلێرگەکا. حەرپۊکەی ڕابەرایەتی ٢٥ ساڵۍ جە زینڎانە نېشانەشدا کە ڕابەرێۋە چنېنا پۍ گەلەکەیش، ڕابەرێۋی شۊڕشگێڵی چنېنا. چا ڕوۋانگۊ ٢٥ ساڵې فرە مانادار، شایەنو ئانەین کە چنەشۊ فێرۍ بیمۍ. متاۋمۍ بە ئاسانی ئانەی ۋاچمۍ ئا ٢٥ ساڵە بۊنە بەنمونە، گەلو کورڎیچ ئانەی جە ۋیر مەکەرۊ، جمیەرەکەیچما ۋیرش مەکەرۊ. گرڎما حۊلمرەیمۍ شایستەو ئا ھەڵۋێسەیە بېمۍ.
-ئەندێشەکۍ ڕابەرایەتی تەمامو جەھانېنە ۋەڵاۋۍ باۋە
ئا پاڕادایمەی کە ڕابەرایەتی جە زینڎانە خولقناش، ۋەڵتەریچ بۍ، بەڵام جە زینڎانەنە بەرجەسەش کەرڎۊ، یۊگېرش کەرڎ. پارادایمو گلێرگەو دیموکراتېکو ئېکۊلۊژیکو ئازاڎی پارێزو ژەنێش دەسنېشان کەرڎ. خەتەو مۊدێرنەتەو دیموکراتیکېش نەخشنا. سەرو ئا بنەمایە دژو سېستمو دۊڵەت پەرستی، سېستمو کۊنفېدراڵېزمو دیموکراتېکېش دیاری کەرڎ. نېشانەشدا کە پی جۊرە متاۋیۊ سۊسېالېزم پێک بێنە، نەک بە دۊڵەت، بەڵکم بە کۊنفېدراڵېزمی دیموکراتېک، خەتەو ئازاڎیی ژەنێش دەسنېشانە کەرڎ. ئېنە ئېسە سەرانسەرو جەھانېنە پۍ گەلۍ چێردەساکا، ڕەنجدەرا بۊنە بە خەتەو ئایدۊلۊژی. پێسە چنی ساڵەو ١٨٠٠ی ۋەختۍ سەرمایەداری سەرش ھۊرداو سەرمایەداری ملەملانۍ ئازاڎش دەسپنەکەرڎ و مارکس و ئەنگڵس بېۍ بە جواب دایۊ کۊشیاو ڕەنجدەراو چێردەسا، پۍ دماتەری تېۊرش دیاری کەرڎو ئا تېۊرۍ ١٥٠ ساڵێن بېێنۍ بە تېۊرو نەتەۋە چێردەسەکاو ڕەنجدەرا. ۋەڵۍ ١٥٠ ساڵاوە بێنۍ، بەڵام ۋەڵۍ ١٥٠ ساڵانە سەرمایەداری ئانە ۋەڵۍ نەکەوتەبۍ. زانستو تەکنەلۊجیای ئاڎنە ۋەڵۍ نەکۊتەبۍ. تېۊری سۊسېالېزمی یەکمجار دەسنېشان کریا. حەرپۊکەی کەموکوڕیچش بۍ. ئەگېنا مارکس و ئەنگلس بە ھەستێۋە بەرزۊ ۋەرپەرسیاریەتی ۋێشا وست ڕوۋە. تەئسېرشا کەرڎ سەرو گرڎیما و تەئسېریچشا سەرو ئەرەکۊشاو ڕابەر ئاپۊیچ نېارە. ڕابەر ئاپۊیچ سەرو ئا ھزرو سۊسېالېزمەینە دەسش بە ئەرەکۊشای کەرڎ. ڕابەر ئاپۊ سەرو بنەماو ھورسەنگنای فراوانو سەرمایەداری پاڕادایمۍ تازەش دەسنېشان کەرڎ. ئانەیچ ئارۊ ڕانېشاندەرو مرۊڤەکان. پی جۊرە جەمەوجۋانا، جەمەو ژەنا، گرڎو مرۊڤایەتی، خۊتانکەرڎەیش چنە مکەرا. کۊنېشتەکەو ئەفریقاو پانېشتی پی جۊرە مانا داربۍ.
-ڕابەرایەتی چارەسەر پۍ گرڎو کێشەکاو مرۊڤایەتی مێزۊۋە
جە ئەفریقای پانېشت و ۋڵاتو ماندێلاینە، ھامڕێکۍ ماندێلای خۊتانکەرڎەی جە ڕابەرایەتی مکەرا، جە جەھانەنە ماندێلاو ڕابەر ئاپۊ جە یۊی مشا. ڕاسا، لایەنۍ ھامبەشێشا فرێنۍ. ماندێلایچ ئەرەکۊشایۍ گۊرەش ڕاۋەبەر کەرڎ. ئاڎیچ پۍ ماۋێۋە فرەی زینڎانەنە گېریا. بی بە ڕابەرو ئازاڎیی پۍ گەلەکەیش. بەڵام ئەشۊ ئانەیچ وتریۊ کە ئاژەو ڕابەر ئاپۊی جېاوازتەرا. چونکی ڕابەر ئاپۊ تەنھا پۍ ئازاڎیی گەلەکەیش مەکۊشیۊ. ئاڎ ڕابەرە پا جۊرەنە کە ھەوڵ مڎۊنە پۍ تەمامو کێشەکاو مرۊڤایەتی چارەسەر بێزۊۋە. پۍ ژەنا، جۋانا، چەوەسېاکا و پۍ گرڎ کەسی... حەرپاسە بېرۊکەکێش پەیۋەس بە پەرسو تاڵانکەرڎەو ژیوگەی. ڕابەرایەتی پی جۊرە بۊ بە ڕابەرو مرۊڤایەتی. جەگرڎ یاگێۋەنە پۍ ڕابەر ئاپۊی کۊنېشتەی ساز مکریۊ. حەوڵ دریۊ کە جە ھزرو ڕابەرایەتی بېاۋانە. حەر کە ئەنەیاۋای جە ھزرو فەلسەفەو ڕابەر ئاپۊی ئاما ئاراوە ڕاکۍ ئێستەیۊ چارەسەری پۍ پەرسەکاو جەھانی ئاسانتەرۍ با. متاۋو بە ئاسانی ئانەی ۋاچوو کە جە سەڎەو ٢١ یەنە ڕەوڕەوەو ۋەڵېنگەی خێراتەر سوڕیۊ. ۋەرو ئانە ڕابەرایەتی بناغەو تېۊرێۋە ئایدۊلۊژی و دیموکراسی و ئازاڎییش ۋەردەمو مرۊڤایەتېنە نیانەرە. بێگومان چەرخو ئازاڎیی و دیموکراسی و ئەرەکۊشای سۊسېالېزمی و مرۊڤایەتی خێراتەر ورسوڕیۊنە. عالتەر ملۊ ۋەڵێۋە. جە ساڵا دماتەریەنە ئانەی ۋینمۍ. پی بۊنۊ سڵام جە ڕابەر ئاپۊی مکەرمۍ و ئەرەیاۋنمێش، کە پۍ بە یاگۍ یاۋناو ئا پاڕادایمەیە کە ئاڎیی دەسنېشان کەرڎەن، پۍ ئازاڎیی ۋڵاتەکەیما و دیموکراتیبیەو ۋەرکۊتوو ناۋەنڎی ۋەڵۍ کۊتەو ئەرەکۊشای ئازاڎی و مرۊڤایەتی ئێمە ئەرکو ۋەرپەرسېاری ۋێما بە یاگۍ یاۋنمۍ.
-خەتەو ئازاڎیی ژەنۍ ئاژێۋە تازەن
ھەڤاڵ قەرەسوو، جە سەرەتاو قسەکاشنە ۋاتش؛" ئا خەتەو ئازاڎییە کە ڕابەر ئاپۊ پۍ ژەنا دەسش وست سەر ئاژێۋە تازەن، ئاسۊیۍ تازەش ۋەرڎەمو ژەنانە کەرڎۊ، مەجالۍ چانەش ڕەخسنا کە ئەرەکۊشای ژەنۍ فرە بە خێرایی ۋەڵۍ گنۊنە، متاومۍ ئانەی ۋاچمۍ ئەگەر جەھان فاڕیۊ، ئازاڎ بکریۊ، بە دیموکراسی بکریۊ، ئانە بە ئازاڎیی ژەنۍ دەسەبەر کریۊ".
ھەۋاڵ قەرەسووئەنڎامو دەسەو ۋێڕاۋەبەری کەجەکەی ماچۊ؛" حەتا ژەنی ئازاڎە نەبۊ حېچ کێشێۋە دلۍ گلێرگەینە چارەسەر مەبۊنە، کێشەکۍ چاگە دژوارێبا، ۋەختۍ خەتەو ئازاڎیی ژەنۍ لوۋا ۋەڵێۋە، جە خەتەو ئازاڎیی ژەنێنە ئەرەکۊشای کۊمەڵایەتی ۋەڵۍ کۊت، گلێرگە جە ڕۊحو ئازاڎیی ژەنێنە سەرو بنەماو بەھاکاو ئازاڎیی ژەنۍ مەرزیارە، ئا ۋەختە مرۊڤایەتی متاۋۊ بۊنە بە خۊتان ژیۋایۍ دیموکراتېکو ئازاڎ".
ھەڤاڵ قەرەسووئەنڎامو دەسەو ۋێڕاۋەبەری کەجەکەی ۋاتش؛" جمېەرەکەما ئەرەکۊشایۍ گۊرە ڕاۋەبەر کەرۊنە، ڕابەرایەتېما حەوڵو تەقەڵای فرەشدا، مشۊ گرڎ کەسۍ جە خەتەو ئازاڎیی ڕابەر ئاپۊی بېاۋۊنە، پۍ ئانەی نەگنی دلۍ تاریکی ئەشۊ جە خەتەو ئازاڎیی ژەنۍ و نەجاڎ داو ژەنۍ کە ڕابەر ئاپۊی دەس نېشانش کەرڎەن بېاۋۊنە، ۋەختۍ جە ڕابەرایەتی یاۋاینە، ئەرەکۊشای ئازاڎیی ژەنۍ جە تەمامو جەھانېەنە ۋەڵێۋە لوۋای گۊرە ۋەشکەرۊنە''.
ھەڤاڵ قەرەسووئەنڎامو دەسەو ۋێڕاۋەبەری کەجەکەی جە دما دمایی قسەکاشنە ۋاتش؛'' ئېنانی چا قەناعەتنە کە ساڵەو ٢٠٢٣ۍ بۊنە بە ساڵێۋە گرنگەو ئەرەکۊشای، ساڵەو ئەرەکۊشاو ژەنۍ بۊ، جە ئۊروپایچنە کۊنېشتەو ژەنۍ بۍ و جە ڕاسېنە فرەیچ زەرور بۍ، حەوڵەکۍ جمېەرو ژەنا جە جەھانەنە پۍ یاۋاینە جە خەتەو ڕابەرایەتی، خەتەو ڕابەرایەتی پەیۋەس بە ژەنا چا باسکریا، فرە زەروربۍ، جە جەھانېچنە بەرەو ۋەڵۍ ملۊ.
ھەۋاڵ قەرەسووئەنڎامو دەسەو ۋێڕاۋەبەری کەجەکەی باسش چانەی کەرڎ، جە جەھانەنە فرۍ جە ڕێکوزیاکاو ژەنا ڕاو ڕێبازو ئەندێشەکاو ڕابەر ئاپۊی گێرانە ۋەر، ئێمە ئېنایمۍ چا قەناعەتنە کە ھزرو فکرو فەلسەفەو ڕابەر ئاپۊی جە ڕوۋانگەو ئایدۊلۊژی و تېۊریۊ بلۊ ۋەڵێۋە، ئەرەکۊشای پڕاکتېکی و کرڎاریچ کارېگەرتەر بۊنە. حېچ ھێزێۋە مەتاۋۊ ۋەلۍ بە خەتەو ئازاڎیی ژەنۍ گێرۊنە، مەتاۋۊ ۋەڵۍ بە ئەرەکۊشاو ئازاڎیی ژەنۍ گێرۊ.
-بومەلەرزە کاریگەریۍ قورس سەرو ژیۋای سیاسی منېۊرە
ڕاسی بومەلەرزە بی بە مایەو ئێشو ئازارۍ قورسی، سەڎان ھەزار ئېنسانۍ گېانشا جە دەسدا. ڕەنگە دەیان ھەزار کەسۍ تەریچ چێرو دارو پەردو یانە ۋڕاکانە مەنێباۋە، بە حەفارەو بلدۊزەر لاشەکێشا چنی دارو پەردوی تێکەڵۍ کریانەو فڕە دریا، ئاژێۋە پی جۊرە ئېنا ئارانە. ۋەرو ئانەی جارێۋەتەر ھومێڎەوارەنا کە قوربانېۍ بومەلەرزەکەی گنانە ۋەرو ڕەحمو بەزەیی خوڎاگېانی و سەرەۋەشی جە خانەۋاڎەکاشا و گەلەکەیما کەرمێنە، ھومێڎو خاسبیەیۊ پۍ زامڎارەکا وازمێنە.
ئاژێۋە فرە کارەساڎ بارا، بومەلەرزێۋە ئاسایی نېا. فرە خەڵەتا کە ئانە پێسە بومەلەرزێۋە ئاسایی نریۊرە. ئەشۊ مەرڎەو ئا گر مرۊڤا ۋنەکۊڵیایش ۋنەکریۊ. ئەشۊ ڕۊشن کریۊۋە. حەرپاسە ئەشۊ ئا تراژیدیایچە بە بەقوەتی نېشانە بڎریۊ. کریۊ بۊنە بە مژارو دەیان ڕۊمان و فیلمی سېنەمایی. ئانە بومەلەرزێۋە ئاسایی نېا. پێسە بومەلەرزەکاو ئەرزنجانی و مەرمەرەیچ نیا. پێسە حېچ بومەلەرزێۋە تەری نیا جە ھانەنە. ھەزاران کەسۍ بە مەڵامەتو ۋەرپەرسیاریێۋە نا ۋەرپەرسانەیۊ چێرو دارو پەردو یانە وڕاکانە مەنێنۍ و گېانشا جە دەسدان. ئاشکران حېچ چێۋێۋە ۋەروچەما نەگېریان.
جە چیللی و مکسېک ۋەڵتەر بومەلەرزە ڕوۋەشدان.جە ئېسەیچەنە حەر ڕوۋە مڎا، بەڵام کەمترین ئېنسانۍ مرانۍ، حەرپۊکەی ئەشۊ ۋنەکۊڵیای جە گېان جە دەسداو ئا گرڎ مەرڎانە کریۊو ئەنجامی ۋەرفراوانش چنە وەدەس مۍ. تەئسېر کەرۊنە سەرو ئاژەو سیاسی و ژیۋای گلێرگەو تورکیای. تەئسېر کەرۊنە سەرو تەمامو کایەکاو ژیۋای جە تورکېانە. ڕوۋەدا گۊرەکۍ جە ۋەڵېنگەنە ئەشناسنامەو کەسایەتی گەلی و گلێرگەکا دیاری مکارا. ئەرەکۊشای گۊرە دیاری مکەرا، گلێرگە پی جۊرە مەرزیۊرە. کلتورو ئېدېۊم پی جۊرە ۋەشێبانە، حەرپۊکەی ئا بومەلەرزە ئاسایی نېا. کەس مەتاۋۊ ۋاچۊ ڕوۋەشداو تەمامیا. ئەنجامەکێش فرە گرنگۍ و قورسۍ بێنۍ. ئەشۊ مرۊڤەکۍ ھەستش پنەکەرا ئانۍ ھەستش پنە مەکەرا مەکریۊ مرۊڤۍ با.چێرو دارو پەردو یانەکانە دەیان ھەزار ئېنسانۍ چنی بە ئێشو ئازارۊ مەرڎۍ؟ ئانۍ کە بە زینەیڎی مەنێۋە جە سەرڎانە چێشا سەر ئاما؟ ھەرپۊکەی ئەشۊ ئی بومەلەرزە پی جۊرە ھورسەنگنایش پۍ کریۊو چنەش بیاۋمێنە.
-بۍ ئانەی شەرم کەرا ڕاگېری جە ۋۍ بەخشەکا مکەرا
پێچی(دەسەڵات) ئانە ھجوم مکەرۊ؟ ڕاسی دماو ڕوۋێۋە بە توڕەیۍ فرۊ ھجومشا کەرڎ. ۋەرو ئانەی ئاسەوارۍ فرە دژوارێش دماو ۋێشەرە ئاوردۍ. ئا ئەرەمەرزیاو دۊڵەتیە کەپنەش ۋتریۊ دەزگاو ۋەرەن ڕوو بیەیۊ کارەساتە سروشتېەکا. گرڎ وڕۍ، تاۋانەکێشا ڕۊشنۍ بېۍ و ۋینېۍ. ۋینیا کە بە مەڵامتو ئایشاۋە بومەلەرزەکە چ زەرەرۍ گېانی و ماڎیش ۋنە کۊتۊ. گلێرگەیچ ۋیناش گەلیچ دی و جەھانیچ ۋیناش. پۍ پەردەپۊسکەرڎەو ئانەی ھورئێستۍ ھجومشا ئەنجامدا. ۋەرو ئانەی ڕاسی سېاسەتەکاو ۋێشا بشاراۋە ھجومشا کەرڎ سەرو گرڎ کەسی سوکایەتېشا کەرڎ. ۋەرو ئانەی کەرڎشا مرۊڤەکۍ سەرەتا چێش ۋاچێنۍ؟ ۋاچێنۍ دۊڵەت چێگە حزورش نیا، کەس نمۍ دەمماۋە قسۍ ۋاچێنۍ. بەتەمامی توڕۍ بێنۍ. دماتەر ۋاتشا جە ۋەختو ۋێشەنە نامایمۍ، چن ڕوۋۍ دما کۊتېمۍ. چن ڕوۋۍ چێشی؟ بەڵۍ، دماو ٣-٤ ڕوۋا لوۋایدۍ. دەزگاو ئافادی دماو ٣-٤ ڕوۋا لوۍ. چنی لوۍ ، ئانەیچ لوۋای نەبۍ. ھەزاران بېنۍ وڕۍ بێنۍ لوۋۍ سەرو ٤ بېنایا نەلۍ پۍ دەگایەکایچ. جە ھەر شارێۋەنە تەنیا سەرو ١٠ بېنایا لوۋۍ. ئاخر ئانە لوۋای بۍ؟ جە ڕاسینە ھەر نەلۍ. لوۋای ئایشا دماو ٣-٤ ڕوۋا کەما. ئانە ئاشکران ئانەی کە لوۋا گلێرگەبۍ. ڕێکوزیێکۍ گلێرگەی مەڎەنی بێنۍ. جە کورڎسانۊ ھەدەپە لوۋا. گلێرگەی بە ڕێکوستەکریا لوۋا. موھەندېسۍ لوۋۍ ژەنی لوۋۍ جوۋانۍ لوۋۍ. جە ۋەرنېشتوو تورکېایچۊ جوۋانۍ ۋێبەخشۍ لوۋۍ. بۍ ئانەی تەریقۍ باوە
ڕا جە ھامکاریەکایچ گێرێنۍ. ئەگەر ئا گەلە نەلابیۍ و شارەوانی و گۊرە شارەکا تورکېای نەلێنۍ، کارەساتەکە گۊرەتەربۍ. ناچارۍ بێنۍ کە مەرڎەو سەڎان ھەزار کەسا قبوڵ کەرانۍ. ۋەڵتەریچ ۋاتم، ئەگەر پاڵپەشتی گلێرگەی نەبیۍ، ئا گەلە ئی حکومەتەیە بەرکەرۍ، ئەگەر لوۋۍ. گەل ھەم ھامکاریش یاۋناو ھەم ۋنەقۊمېێچش چێرو یانە وڕاکانە بەرئارڎۍ، جە سەرڎاو ئاورایچ پارێزنێشا. ڕۊو ئەوەڵی گەل ڕزگارش کەرڎۍ.
درێژەش ھەن
ھ.ش
