ئەنڎاموو کۆمیتەو ڕاوەبەری پەکەکەی موراد قەرەیلان واتش، ڕاوەبەرا ئاکەپە-مەهەپە-ئەرگەنەکۆنی سیاسەتوو پاکتاوی و قڕکەردەیشا ۋەرا ۋەر بە دیواروو مدرامانی هەرەسش ئاوردەن، حەرپۊکەی جە دۆزو کۆبانێنە نەتاواشا ئا سزۍ بسەپنا، کە پلانەشا پەیش بۍ.
ئەنڎاموو کۆمیتەو ڕاوەبەری پەکەکەی موراد قەرەیلان جوابوو پرسیارەکاو رادوێنوو دەنگوو گەلیش داوە. بەشی یووەم و گفتوگۆکەی پی جۆرەنە:
گۆشەگیری سەروو رابەروو گەلوو کوردی عەبدوڵا ئۆجالانی ٣٨ مانگێش ۋییەرنا، چی دماییەنە وەزارەتوو دادوو تورکیای ئەرەیاۋناشا، کە پەی شش مانگا سزاو قەڎەغەو دیڎاری سەپیان. سەروو ئی مژاریە گەرەکتانە چێش واچدۍ؟
سەرەتا سڵام ئاراسەو رابەر ئاپۆی و گرڎوو ۋێڕاگرا زینڎانی مکەروو. ئارۆمانە گرنگتەرین و سەرەکیتەرین قۊرتەو تورکیای و کوردسانی سیستموو ئیمراڵییا. واتە گۆشەگیری و سیستموو قڕکەردەی سەروو کوردسانیا. سیستموو ئیمراڵی، سیستموو جەنگین. ئارۆ مزانیۆ جە تورکیا و سەرنیشتوو کوردسانینە گەل دلۍ هەژارینە مژیۋا، ئینۍ دلۍ ئاورایی و هەژاریێوە قورسینە. سەرەکی تەرین مەڵامەتوو ئانەیچ جەنگا. جەنگ سەروو بنەماو سیستموو ئیمراڵی ڕاوەبەر مکریۆ. حەرپۊکەی سیستموو قڕکەردەی و ئەشکەنجەی و گۆشەگیری جە ئیمراڵینە مەڵامەتوو هەژاری گەلاو تورکیای و کوردسانیا. ۋەروو ئانەیچ سەرەکیتەرین قۊرتەنە جە تورکیا و کوردسانەنە.
تا جەنگ دمایش نۍ، هەژاریچ دمایش نمۍ
تەماشەکەردۍ؛ رژێموو ئاکەپە-مەهەپەی ۋێچش دڎان پانەیرە منیۆ کە قۊرتە ئابوورییەکۍ فرە دژوارۍ بیێنۍ و ماچۆ ئەرەمەرزیاکۍ دەوڵەتی سیاسەتوو کەمکەردەیۆ خەرجیەکا و لەمە فشارای جابەجێ مکەرا. بەڵام کەمکەردەیۆ خەرجیەکاو دەوڵەتی، مەسرەفەکا جەنگی مەگێرۊوە. واتە جگە جە مەسرەفەکا جەنگی، مەسرەف و خەرجیەکا تەری کەمۍ کریاوە. ۋەروو ئانەی ئی رژێمە سەروو بنەماو جەنگی دژوو کوردی ئەرەمەرزیان. هامپەیمانی ئەرگەنەکۆنی و ئاکەپە-مەهەپەی سەروو ئا بنەمایۍ سازکریان. گرڎوو داهاتوو تورکیای پەی جەنگی تەرخان کریان. ۋەروو ئانەینە گەل ئاوراشا. سیستموو ئیمراڵی سەرچەمەو ئی جەنگەینە، پۊکاتی قۊرتەکۍ قۊرتێوە بنەڕەتییەنە. تا ئا وەختەی کوردسانەنە جەنگ بۆ و ئیمراڵینە ئا سیستمە بەردەوام بۆ، ئابوری تورکیای مەگنۆ سەروو ڕای ڕاسۍ. جە هەمان وەختەنە تورکیانە سیستمێوە سەروو بنەماو دیموکراسی و یاسۍ مەچەسپیۆ. گرڎ وەختۍ یاساکۍ قڕکەردەی، کۆلۆنیالیزمی و جەنگی باڵادەسۍ با. چی ئاژەنە جە یاساکانە چێش نویسیابۆ، با نویسیا بۆ، جە کوردسانەنە بەردەوام یاساو جەنگی بە بنەما مگیریۆ. حەرپۊکەی پەی ئانەی گەلاو تورکیای چی هەژاریە نەجاتشا بۆ و جە تورکیانە دۆڵەمەنڎی و وەشگوزەرانی و فەرحانی وەڵۍ گنۆ، مشۊم وەڵۍ گرڎ چێوێنە قۊرتەو کوردی چارەسەر بکریۆ و سیستموو ئیمراڵی دلێنە بریۆ و ئازاڎیی رابەر ئاپۆی و گەلاو کوردسانی دەسەبەر بکریۆ. پی جۆرە گەلا دلۍ سنوورەکاو تورکیاینە، متاوا سەروو بنەماو یەکسانی بژیۋا، تەنیا ڕا ئانێنە.
گۆشەگیری ئینا قاڵب و چوارچێوەو سیاسەتوو قڕکەردەینە
پېسە مزانیۆ دەوڵەتوو تورکی پەی ئانەی ئی بێ یاساییە پەردەپۆش بکەرۆ، حۆڵی جیاجیاش گێرتەنەنە ۋەر. گرڎ کەسۍ مزانۆ کە رێک ٣٨ مانگێن، حیچ کەسۍ زانیاریش جە بارەو ئیمراڵییوە نییا. پېسە چنی جە یاساکاو تورکیاینە یاگێش نییەنە، جە یاسا جەهانییەکایچەنە ڕاش مەبۆوە. واتە ئاڎۍ بە دەسوو ۋێشا یاساکاو ۋێشا پاشێل مکەرا. گرڎ وەختۍ دلۍ چن مانگێنە ماچا، 'قەرارما دا بە سەپنای قەڎەغەو دیڎاری چنی پارێزنەەر و بنەیانەکا. ئایا سەروو چ بنەمایۍ قەرارشا دان؟ بێگومان ئانۍ گرڎ گەمەن و هۊرخەڵەتناین. هەر پێویس پانەیچ مەکەرۆ ئینسان باس چانەی بکەرۆ. ئانەی گرنگا ئا سیاسەتەنە کە ڕاوەبەر مکریۆ. ئەمڕۆ کوردسانەنە سیاسەتوو قڕکەردەی بریۆ ڕاوە و ۋەروو ئانەیچە ئی سیستموو گۆشەگیری و ئەشکەنجەیە بەردەواما. دژوو ئانەیە مشۊم کۊشیایۍ بەقوەت بریۆ ڕاوە.
ۋەرپرسیاری گردیمانە کە دژوو گۆشەگیری ئەرەکۊشمۍ
ئارۆ پېسە مزانیۆ دژوو ئی سیستمە ئەشکەنجەکاری و قڕکەرەیە، هەڵمەتێوە ئینا ئارانە. ئا هەڵمەتۍ بەردەوامەنە. بەتایبەتی ئەڎایا کوردسانی و ئا هەڤاڵۍ ئینۍ زینڎانەکانە بە شێوازی جیاجیا مدرامان مکەرا، من بەڕێزۆ سڵام جە گرڎوو ئانیشا مکەروو کە بەشداریشا چی هەڵمەتێنە کەردەن. مشۊم ئێمە کۊشیایما دژوو سیستموو ئیمراڵی گەشتەر و بەقوەتتەر بکەرمۍ. ئێمە گرڎما ۋەران ۋەروو ئانەینە ۋەرپەرسێنمۍ. مشۊم گرڎ کەسۍ ۋەرا ۋەر پانەی ۋەرپرسیاری ۋێشا جابەجێ بکەرا و بە پاو ئانەی جماوە. ئارۆ ئا هەڵوێسەی رابەر ئاپۆ ئیمراڵینە گرتەنش ۋەر و کۊشیای ئاڎیی، کۊشیای گەلەکەیمانە و گەریلاش یاونان ئاستێوە. چی چوارچێوەنە هەڵمەتەکۍ سیستموو قڕکەری-فاشیستیش تەنگەتاو کەردەن. پەی هۊرچەرخنای و دلێنەبەردەی ئی سیستمەیە مشۊم کۊشیای زیاتەر بەقوەت بکریۆ.
پېسە جمیەرەکەیتا شمە مانگەو ئایاری پېسە مانگەو گەشمەرڎا وەسف مکەردۍ و فرە گرنگیش پنە مڎەیدۍ. پی بۆنۆ چێش ماچدۍ جە بارەو راسی گەشمەرڎاوە؟
راسا؛ مانگەو ئایاری مانگەو گەشمەرڎانە. ١٨و ئایاریچ ڕۊو گەشمەرڎەبیەو هامڕا حەقی کارەریچ ڕۊو گەشمەرڎان. جە کەسایەتی هامڕا حەقی کارەرینە گرڎوو گەشمەرڎا شۆڕشوو کوردسانی یاڎ مارووە و بە رێزۆ سەرەو ۋێم ۋەروودەم و یاڎوو ئاڎیشانە منامنوورە. ئا قەولەی پایشاما دان، جارێوەتەر واوەیش مکەرووە. ئێمە پابەنڎۍ بیمۍ بە هامڕایی ئاڎیشاوە و وەرمەکاو گەشمەرڎاما مارمێنە دی. پەی ئانەی یاڎوو ئاڎیشا جە کۆشیای ئازاڎینە بە زینڎەیی ڕاگێرمۍ، چێشما دەسەنە بۍ ئێمە مکەرمێش و تا سەر ڕاو ئاڎیشا گێرمێنە ۋەر.
پېسە ئێمە ئەرەیاۋنانما، مانگەو ئایاری پېسە مانگەو گەشمەرڎا پەی ئێمە گرنگا. نەک هەر پەی ئێمە، پەی شۆڕشوو تورکیایچ مانگێوە گرنگەنە. جە جمیەرە شۆڕشگێڵنیەکاو تورکیاینە چنڎین سەرمەشقۍ چی مانگێنە گەشمەرڎۍ بیێنۍ. دەنیز گەزمیش، یوسف ئاسڵان، حسێن ئینان، ئیبراهیم کایپاکایا، سینان جەمگیل و فرەو شۆڕشگێڵنۍ سەرمەشقۍ تەری چی مانگێنە گەشمەرڎۍ بیێنۍ. ئیتحاد و تەرەقی جە ٦و ئایارو ١٩١٦ ینە ژمارێوە فرە رۆشنۋیرۍ عەرەبیش جە سوریا و لوبنانەنە دۍ قەنارە و تیرۆرێش کەردۍ، واتە مانگەو ئایاری پەی گەلو عەرەبیچ گرنگەنە.
ئەڵقێوە گرنگەنە جە زنجیرەو شەهادەتی
هەڵبەتە جە کوردسانەنە یاگۍ تایبەتتەرەو ئی مانگۍ هەنە. چنڎین ئەڵقۍ گرنگۍ شەهادەتی، چی مانگەێنە درووسۍ بیۍ. ١و گوڵانی هەڤاڵ عەبدولقادر چووبووکچوو فەلەستینەنە گەشمەرڎە بی. دیسان جە ١و گوڵانینە ڕۊو گەشمەرڎەبیەو فەرماندەو مێردینی هەڤاڵ سەبری (محەمەد ئەمین ئەسڵان)ی و فەرماندەو گارزانی جەلال هۆجا (ڕەمەزان کاپلان)ییا. ٢ۍ گوڵانی ڕۊو گەشمەرڎەبیەو هەڤاڵ محمەد کاراسوونگووری و ئیبراهیم بیلگینیا. فەرماندەو جودی حەمزە ئەرمەنی و فەرماندەو ئامەدی ئازاد سیسەر، چەکڎار ئامەد و هەڤاڵەکێش چی ڕووەنە گەشمەرڎۍ بیۍ. ٩و گوڵانی جە ۋەرکەوتوو کوردسانی شیرین ئەلمهوولیە، فەرزاد کەمانگەر، عەلی حەیدەرییان و فەرزاد وەکیلی بە جە قەنارەدای گەشمەرڎۍ بیۍ. ١١و گوڵانی ڕۊو شەهادەتوو هەڤاڵ هۆزان مزگینیا، ١٣و گوڵانی جە پانیشتوو کوردسانی ڕۊو شەهادەتوو لەیلا قاسمۍ و چوار جە هامڕایاشا کە جە بەغڎانە گەشمەرڎۍ بیۍ. ١٦ و گوڵانی ڕۊو گەشمەرڎاو هەولێریا. جە کەسایەتی ساڵح، هێیلینۍ و ئۆزانانەکانە چنڎین هامڕێما چی ڕووەنە مدرامانشا کەرد و گەشمەرڎۍ بیۍ. ١٧و گوڵانی جە زینڎانوو ئامەدینە ڕۊو شەهادەتوو هەر چواری (فەرهاد کوورتای، مەحمود زەنگین، ئەشرەف ئانیک و نەجمی ئۆنەر)یا. ١٨و گوڵانی پېسە ئانەی دیاریما کەرد، ڕۊو گەشمەرڎەبیەو هامڕا حەقی کارەری و ڕێزان ئامەدیا. ١٩و گوڵانی هەڤاڵ خەلیل چاڤگوون و موسلوم باران گەشمەرڎۍ بیۍ. ٢٠و گوڵانی پەنج هەڤاڵۍ تەرێما بە سەرمەشقایەتی هامڕا سابری گۆزوبویوکی و خدر (محەمەد یەشیللەر) ی، جە بۆزۆڤای گەشمەرڎۍ بیۍ. ٢٥ گوڵانی ڕۊو گەشمەرڎەبیەو هەڤاڵ جەمشید، ساری عومەر و سوڵتان یاڤووزیا. هەر جە هەمان ڕۊنە جە قەیسەرییە هەڤاڵ هێرش و نادۆک چالاکیێوە فیداییشا ئەنجام دا و گەشمەرڎۍ بیۍ. ٢٧و گوڵانی ڕۊو شەهادەتوو قاسم ئەنگینی و هەڤاڵاشا. بە پوختی جە مانگەو گوڵانینە چنڎین شەهادەتۍ گرنگێما هەنۍ. جە کەسایەتی گرڎوو ئی هەڤاڵانە جارێوەتەر بە رێزدارییوە گرڎوو گەشمەرڎا یاڎمکەرووە.
گەشمەرڎە سەرچەمەو قوەتین
هەڵبەت مژاری سەرەکی ئانەنە کە ئینسان چنی نزیکوو حەقیقەتوو گەشمەرڎا بۆوە. بێگومان جە تاریخوو هەر جمیەرێوەنە ماناڎاری شەهادەتی هەن. بەڵام شەهادەت لاو ئێمۆ یاگێوە فرە تایبەتتەرەش هەنە. جمیەرەکەما سەروو بنەماو زینڎە ڕاگێرتەی یاڎوو گەشمەرڎاوە یاوا بە بە ئاستوو پارتایەتی. ئا وەختەی حەقی کارەر گةسمەرڎە بی، ڕابەر ئاپۆ واتش، 'ئیتر ۋنی مجیا، گێڵایۆ نیا' و پەی یاڎکەردەیۆ هامڕا حەقی بەرنامەو پارتایەتیش ئاماڎەکەرد. پەکەکە پی جۆرە ئەرەمەرزیا. پەکەکە پەی زینڎە ئاستەیۆ یاڎوو گەشمەرڎا ئەرەمەرزیا. ۋەروو ئی مەڵامەتینە پەکەکە بیەن بە پارتوو گەشمەرڎا.
پەکەکە پەی ئانەی کۊشیای گەشمەرڎا بەردەوامی پنەبڎۆ، یاڎکەردەیۆیشا بە زینڎەیی بازۊوە و ئامانجشا بارۆنە دی وەشبی. پارتوو گەشمەرڎا پا جۆرە وەش بی. جە تەماموو تاریخیمانە هیچ وەختۍ گەشمەرڎێما نەبیێنۍ بە مەڵامەتوو نیگەرانی؛ گرڎ وەختۍ بیێنۍ بە زامنکەردەی بەقوەت بیەی. بە پوخت گەشمەرڎێما پەی ئێمە سەرچەمەو قوتینۍ. جمیەرما پەی یاڎکەردەیۆ هەر هەڤاڵێما کە گەشمەرڎەبیەن، هەنگامەی تازێش دەسپنەکەردە. پېسە ئانەی هەڤاڵ خەلیل چاڤگوون جە هیلوان گەشمەرڎە بی، پۊکەی جە هیلوانەنە مدرامانێوە ئێژای و تاریخی سەروو بنەماو ئا شەهادەتیە وەڵۍ گنۆ. دیسان جە زینڎانەکانە شەهادەتوو هامڕا مەزڵومی، کەمال، خەیری و فەرهادی پێکمەیا؛ سەروو بناغەو یاڎکەردەیۆ ئا هەڤاڵانە قەرارداری قۆناغەو ١٥و ئابی فرە عالتەر مسۆگەرە بۆ. دماو گەشمەرڎە بیەو هامڕا عەگیدی؛ پەی یاڎکەردەیۆ هەڤاڵ عەگیدی ئارگەکە (سوپاو ڕزگاری گەلو کوردسانی) ئەرەمەرزیا.
ڕۆحی فیدای دلۍ پەکەکەینە بە تینتەر بۆ
جە بنەڕەتەنە جە ڕۊو دەسپێکیماوە هەتا ئارۆما گرڎ وەختۍ پی جۆرە وەڵۍ کۊتەن. دوژمنا گرڎ وەختۍ پەی ئانەی تەڤگەریما قەڵس بکەرا هجوومشا کەردەن و گەرەکشا بیەن گەشمەرڎێما بکەرا، پۊکاتی تەڤگەرما هەر شەهادەتێوەش کەردەن بە ئەڵقێوە بەقوەتە پەی ۋێش و سەروو ئی بنەمایۍ بەرکەوتەی تازەش کەردەن بە بنەما پەی ۋێش. ئینە جە سەرەتانە پاسە بیەن و حەرپاسەیچ مەنۆوە. جە ئیساتێچەنە چ جە هەرێمەکاو پارێزنای میدیاینە، چ جە سەرنیشتوو کوردسانی جە کەشەکانە و دیسان جە جەنگوو مەڕەکانە بە هەمان ڕۆحیەتۆ کۊشیای ملۊڕاوە. دلۍ پەکەکەینە رۆحی فیدای پی جۊرە بەقوەت بی. یانی دلۍ پەکەکەینە شەهادەت پی جۊرەنە. پەی ئینەیچ ماچمۍ، "گەشمەرڎێما ۋییەردەو، ئیساتۍ و ئاینڎەمانۍ" و پېسە سەرچەمەو قوتیما موینمێشا. ۋەروو ئینەیە، هەنگامنیای جە خەتەو گەشمەرڎانە پەی هەر هامڕێوە و جە هەمانوەختەنە پەی هەر وڵاتپارێزێوە ئاماجێوە سەرەکییا. سەرچەمەو هێزو تەڤگەریمانە. پێویسا پی جۆرە نزیکوو حەقیقەتوو گەشمەرڎا بیمێوە. سەروو ئی بنەمایۍ بیەو گەشمەرڎا بەردەوامی پنەدەروو ئێمەن. پارتما پارتوو گەشمەرڎان. گەشمەرڎێما جە پارتوو پەکەکەیمانە حەقیقەتێوە زینڎێنۍ و گرڎ وەختۍ سەرمەشقۍ نەمریمانۍ. سەروو ئی بنەمایۍ جارێوەتەر ماچوشۆ 'گەشمەرڎۍ مەمرا'.
دۆزو کۆبانێ ئەنجامدریا و دلۍ ڕای گرڎینینە گفتوگۆش سەر مکریۆ. دادوەری تورکی بە سەڎان سزێش پەی سیاسەتمەدارا ۋەڵینوو هەدەپەی بڕیێوە. سەروو ئی مژاریە گەرەکتانە چێش بواچدۍ؟
پېسە ڕۊشنا، ڕژێموو ئاکەپە-مەهەپە-ئەردۆغانی پەی ئانەی قڕکەردەی جە کورسانەنە ئەنجام بڎۆ پېسە هامپەیمانێوە دژوو کوردا ئامۍ ئاراوە. بە تەعبیرۍ تەر، ئی ڕژێمە فاشیستە-قڕکەرە ئەرەمەرزیا پەی ئانەی تەڤگەریما تەسفیە بکەرۆ و دەسکەوتەکا گەلوو کوردسانی جە بەین بەرۆ. ۋەروو ئینەینە سیستموو گۆشەگیری جە ئیمراڵینە هەن. هەمدیسان جەنگێوە ۋەرفراوان دژوو گەریلای پی ئامانجۆ ڕێکوزیۆ. جە ساڵەو ٢٠١٦ینە ڕەوتوو بەرەوەی سیاسەتوو کوردی یاسایی-دیموکراتیکی و شەپۆلەو گێرتەیشا سەروو ئی بنەمایە پێکئاما. سەروو ئی بنەمایە هامسەرۆکاو هەدەپەی، پەرلەمانتارا، هامسەرۆکوو شارەوانی، چنڎین ۋەرپەرسۍ هەدەپەی و سۆسیالیستا تورکیای کە پەشتگریی جە دۆزو ئازاڎیی کوردا کەرێنۍ کریۍ ئامانج؛ گرڎ وزیۍ زینڎان. پی جۆرە گەرەکشابۍ گەلەکەیما بێدەنگ بکەرا. ئی گێرتەیە جە بنەمانە پەی ئانەی ئەنجامدریان. گەر سەرنج بڎەیدۍ ئی چن ساڵە هیچ ئیدیعانامێوە تۆمەتبارکەردەی ئاماڎەنەکریان و بە چێوۍ تۆمەتبارۍ نەکریۍ، وەڵێنە گیریۍ، دماتەر تاوانبارکەردەیشا پەی تاشارە. سەروو ئی بنەمایە دۆزو کۆبانێ پېسە تاوانبارکەردەی ئاڎیشا موینا. دیاریکریان کە چا ڕووەدایێنە بە گرڎیی ٣٧ کەسۍ گیانشا جە دەسدان. کاربەدەساو هەدەپەی بە مەڵامەتوو کوشتەی ئاڎیشا تۆمەتبارۍ کریۍ. پەی ئینەیچە پلانەشا متەرە کە ٣٨ سزۍ قورسۍ هەمیشەیی پەی هەر یۆ چانیشا بڕاوە.
نەتاواش ئا سزۍ پلانەش پەی متەبێرە سەپنۆشا
ئەگەر ڕژێموو ئاکەپە-مەهەپە-ئەرگنەکۆنی بیاوێنۍ بە ئامانجوو ۋێشا، واتە ئەگەر تواناو دلێنەبەردەو جمیەرو ئازاڎیی کوردسانیشا بیۍ؛ ئەگەر تواناو ئانەیشا بیۍ مدرامانوو ڕابەر ئاپۆی وهەڤاڵەکاش جە زینڎانەکانە و مدرامانوو گەریلای و هەڵوێس و چالاکییەکاو گەلەکەیما دلێنەبەرا، سزێوە قورستەر سەروو زیندانیا هەدەپەیرە سەپنێنۍ. بەڵام چێش ڕووەشدا؟ ئاڎۍ نەتاواشا شکس بە تەڤگەری ئازاڎیما بارا؛ هجوومی فرە گەورە دەسش پنەکەرد. جە ۋەرا ۋەروو هەڵوێسی یەکلاکەرەوەو ڕابەر ئاپۆینە، مدرامانوو گەریلای کە بە ڕۆحێوە فیداییانۆ وەڵێکۆت، هەڵوێسی وڵاتپارێزنی گەلەکەیما و ئانەی نەتاواشا جمیەری دیموکراتیکی یاسایی کوردی و جمیەروو دیموکراتیکی چەپی جە تورکیانە لاواز بکەرا و ۋەر بە حۊڵەکا پلانەو تەسفیەکەردەی گیریا. پا مەڵامەتاوە دەسەڵات نەیاوا بە ئامانجوو ۋێش و ئیتر نەتاواشا ئا سزۍ پلانەشا پەی متێبێنێرە جابەجێشا بکەرا.
ئەڵبەت ۋەرگیریەکۍ کاریگەرۍ بێنۍ، بەڵام ئاژێوە گونجیا نەبۍ کەئا سزۍ بڎریۆ. پۊکەی ڕژیم گەرەکش نەبۍ بەبێ سزا جە دادگانە بەیا بەرۆ، ئینەیچ بە ماناو دڎانیای بە شکسەکاشارە مۍ. هەر پا بۆنۆ سزای بێ بنەماشا پەی ۋەرپەرسا هەدەپەی بەرکەرد کە هیچ بنەمایۍ یاساییشا نییا. پەی نموونەی ئی کەسۍ سەرەتا بە چێش تۆمەتبارۍ کریۍ؟ واتشا: شمە کەستا کوشتەن. بەڵام سەروو ئا کەسا کە کوشیێ بێنۍ سزا نەدریۍ. بە وەشکەردەی تۆمەتۍ چێگەو چا و بە واتەی 'شمە ئەندامۍ ڕێکوستەیندۍ' و هتد، ئی قەرارەشا سەروو ۋەرپەرسا هەدەپەیرە سەپنا.
ئەردۆغان ئشیۍ سزا دریۍ
ئەگەر یاسێوە بێلایەنە بیۍ، نەک سەڵاحەدین دەمیرتاش و فیگەن یوکسەکداغە و نەک ۋەرپەرسا تەروو هەدەپەی سەروو ناڕەزایەتییەکا ٦-٨و تشرینی یووەمی پەی کۆبانی سزا دریێنۍ، بەڵکم ئانەی سزا دریۍ ئەردۆغان بۍ، چونکی ئەردۆغان جە سەردایشەنە پەی عەنتابی واتش کۆبانی کەوتەن و وڕۆ. ئی قسۍ تووڕەیی گلێرگەیش ۋنە کۊتۆ و مجیێرە سەروو جاڎەکا. گلێرگە دژوو هجوومەکا داعشی گەرەکش بۍ پەشتیوانی جەگەلو کۆبانێ بکەرۆ. ۋەروو ئی مەڵامەتەیچە داوا جە تورکیای کەرێنۍ سیاسەتوو گەمارۆدای کۆبانی مردنۆ. بە پوختی گلێرگە دژوو داعشی و پەشتیوانی جە مدرامانوو کۆبانێ ئامۍ سەروو جاڎەکا و چالاکیشا کەرد. بەڵام ئەردۆغان ئەمرەش بە پۆلیسا کەردە تەقە بکەرا و کوشانە. بە مەعنێوەتەر هەم تاوانبار و هەم تۆمەتبار خودوو تەیب ئەردۆغانیا. هەم ئەجێنداش وەش کەرد و هەم وەختۍ گەل ئامۍ سەروو جادەکا ئەمرەو تەقە کەردەیش بەرکەردە.کەواتە ۋەرپەرسا هەدەپەی نە بەشدارییشا جە پێوەرەداکانە کەرد و نە دەسوورو پێوەرەدایشا دا، ئانەی جە هەر دووە لاوە تاوانبارا و تۆمەتبارا خودوو ئەردۆغانین.
ئا بەشەی پەیوەندیش بە حزبوڵایۆ هەن ناڕۆشنا
بابەتێوەتەر بەرکەوتەی حزبوڵاین چا وەختەنە. پەی چی و چنی چا وەختەنە بەرکۆتۍ؟ ئایا کەسێوە زەرەرش ۋنە دێبێنۍ؟ ئەو کەسۍ کێنۍ کە هانەو حزبوڵای دێنۍ پەی ئانەی هجووم بکەرا سەروو گەلی؟ کێ ئەمرەش کەردێبێ بە تفەنگۆ بەیا دلۍ جاڎەکا؟ ئینێچ مژارۍ ئەوەکۊڵیاینۍ. چونکی ئانڎەی ئێمە بزانمۍ کەس مەبەسوو بە ئامانج گێرتەی حیزبوڵایش نەبیەن. گەل بە گرڎیی گەرەکشابۍ پەشتگیری کۆبانۍ بکەرا. ئینە ئامانجوو گەلی بۍ، بەڵام کێ هانیش دا و ئا ڕووەدایۍ پەی چی ڕووەشادا؟ ئی بەشە هەڵای ناڕۆشنا.
ئەردۆغان بە ئاشکرا دروۍ مکەرۆ
حەرپاسە جە بڕۍ شۊنانە بە کرێگرتەکۍ لووێڼۍ جاڎەکا و تەقە جە گەلی کەرێنۍ. کەسانێوەشا گەشمەرڎۍ کەردۍ. جە هەمان وەختەنە ژمارەو ئا کەسا کە جە تەرەفوو پۆلیسیوە گەشمەرڎۍ کریۍ کەمۍ نییەنۍ. وەختۍ پۆلیس گەلەکەماش کۆمکوش کەرد، گەلی وڵاتپارێز بە تووڕەیی و قینێوە زیاتەرۆ مجیێرە جاڎەکا. گەلەکەما پی جۆرە گەشمەرڎۍ کریۍ. بە ڕێز و حورمەتۆ گرڎوو ئا کەسا کە چا مدرامانانە گەشمەرڎۍ کریۍ یاڎشا مارووە. بەڵام ڕژێموو ئاکەپەی و خودوو ئەردۆغانی ۋەرپرسیارۍ سەرەکی گرڎوو ئی ڕوودایانۍ. ئاڎۍ ۋێشا تاوانەشا ئەنجامدان، بەڵام گەرەکشانە بە دۆسیەو کۆمباسی کۆبانۍ ئەنداماو هەدەپەی تاوانبار بکەرا. چن ڕووۍ چێوەڵتەر تەیب ئەردۆغان واتش: "ئاڎۍ دژوو دەوڵەتی ئەرەپڕۍ، ئاڎۍ تاوانبارێنۍ." بە ئاشکرا دروۍ مکەرۆ، چێوۍ چانە بیەیش نیا.
لایەنی کوردی گرژییەکێش کەمۍ کەردۍ
کەواتە کێ گرژییەکێش کەمۍ کەردۍ؟ بە هەوڵوو ڕابەر ئاپۆی گرژییەکۍ کەمۍ بیێوە. دیسان جمیەرەکەما و ئەنداماو هەدەپەی پا ئاراستەرە حۊڵەکێشا بەکار ئاردۍ. چونکی ئا وەختە جە لێوە مدرامانوو کۆبانێ بۍ و جە لێوەتەریچۆ پڕۆسەو گفتووگۆی بەردەوام بۍ. پی جۆرە لایەنی کوردی گرژییە پەرەئەسایەکێش کەمکەردێوە. تەیب ئەردۆغان ۋێش ئینەی مزانۆ، بەڵام ئیساتۍ حەقەتینەکا پێچەوانە مکەرۆوە و بە ئاشکرا دروۍ مکەرۆ و ماچۆ "ۋەروو ئانەی ڕووەشدان، چونکی ئاڎۍ دژوو دەوڵەتی ئەرەپڕۍ". بەڵام جە حەقەتینەنە ۋێش عال مزانۆ کە پاسە نییا.
ئانەی کە تاوانەش ئەنجامدێنە خودوو ڕژێمین
جە بنەڕەتەنە پلانەشا پەی دلێنەبەردەی کۊشیای ئازادیوازی کوردسانی و گرڎوو دەسکەوتەکا گەلوو کوردی نیابێرە، حەرپاسە سزای قورسەشا سەروو ۋەرپەرسا هەدەپەیرە سەپنا پەی ئانەی گەلی تەرسنا و ئیتر کەس باسوو کوردی و کوردسانی نەکەرۆ و پەی دیموکراسی و ئازاڎیی کۊشیای نەکەرۆ. گرڎ مزانا کە دمایین قەرارەکێشا هیچ بنەمایۍ یاساییشا نییا و چی قەرارانە بە هیچ جۊرۍ دادپەروەری بەکار نامان. جە حەقەتینەنە دەسەڵات پی جۆرە ۋێش نیشانە دا. ۋێڕاگری گەلەکەیما و نەدۆڕیای کۊشیای ئازادیوازیی کوردسانی پلانەکۍ ڕژێموو فاشیستیشا پووچۍ کەردێوە. ئانە ئەنداماو هەدەپەی و گەلو کوردی نیەنۍ کە تاوانەکێشا ئەنجامدێنۍ، بەڵکم ئانە خودوو ڕژێمی فاشیستیا.
بەردەوامیش هەن......
