قەسەدە ئا هەواڵێشە وستې دروې کە باس چانەی مکەرا هێزەکێشا جە بیابانو سوریاینە ئۆپەراسیۆنێوە دژو چەتەکا داعشی دەس پنە مکەرا، تەئکیدش کەردۆ، ئاڎې هەمیشە ئاماڎێنې پەی بەشداریکەردەی جە هەر هەڵمەتێوە نیشتیمانیی سوریی و مېیاننەتەوەیی دژو داعشی.
مېیانو ئەرەیاۋنای هێزەکاو سوریای دیموکراتیکی (قەسەدە) سەرو ماڵپەڕی ڕسمی ۋێشۆ ئەرەیاۋنێوەش وەڵاکەرڎۆ، تەئکیدش کەرڎۆ، ئا هەواڵې باس جە ئامادەکاریی هێزەکاشا مکەرۊ پەی ئەنجامدای ئۆپەراسیۆنێوە دژو چەتەکا داعشی جە بیابانو سوریای، دوورێنې جە حەقەتینیۆ.
جە ئەرەیاۋناکەو قەسەدەینە، وچیان: "چن دەزگېوە یاونەری زانیاری ناڕاسشا وەڵاکەردەنۆ کە گوایە هێزەکېما ئامادەکاریی مکەرا پەی ئەنجامدای ئۆپەراسیۆنێوە دژو ئەوەمەڼنەکا ڕێکوزیاو تیرۆریسی داعشی جە بیابانو سوریای. تەئکیدش مکەرمېوە، کە ئی زانیاریې دوورېنې جە حەقەتینیۆ، گرڎو جمووجووڵەکاو هێزەکاما جە چوارچێوەو ئاسایی ۋێشانە ئەنجام مڎریا.
هێزەکېما تەئکیدش مکەراوە، هەمیشە ئاماڎێنې پەی بەشداریکەردەی جە هەر هەڵمەتێوە نیشتیمانیی سوریی و مېیاننەتەوەیی دژو داعشی. هێزەکېما هەر هەڵمەت و ئۆپەراسیۆنێوە ئەنجام بڎا جە ماڵپەڕ و پلاتفۆرمە ڕسمیەکا ۋێشاوە ئاشکراش مکەرا".
