مییانو ئەرەیاوناو هێزەکا سووریاو دیموکراتیکی (قەسەدە) بە ئەرەیاونێوە ئامارو دماین ٢٤ سەعاتا مڏرامانو جەنگاوەرا و هرووژمە ئەرەگیرییەکا دۆڵەتو تورکی و چەتەکاش وەڵا کەردۆ.

ئەرەیاوناکەو قەسەدەی پی جۆرە بێ:

"هیزی (دووەشەممە) چەتەکێ دۆڵەتو تورکی ئەرەگیری جە دەوروبەرو سردەو قەرەقۆزاقی هرووژمشا کەرد سەرو خاڵێوە هێزەکاما و، بەڵام جەنگاوەرەکێما گرڏو هرووژمەکێشا پوچەڵکەردێوە.

سوپاو تورکی ئەرەگیرو و چەتەکا دەگاکا تینا، جعدە، بیر حسۆ، خەسەق، دیکان، مەلحە، قەلهیدە، سیا، کەژ و بەرزاییەکێ سێڤێ و سردەو قەرەقۆزاقیشا بۆمبواران کەرد. یاگێ ئاماژەینە زیاتەر جە ٦٠ گولـلە هاوەنێ، تانک و مووشەکێشا سەرو ئا ناوچارە وارنار. جەئەنجامو بۆمبوارانەکەینە، زەرەری ماددی فرە وەرو یانە و موڵکو ئەرەنیشات ناوچەکەی کەوت. هێزەکا ئەرەگیرا بە پەشتیوانی تۆپخانەکاشا هرووژمشا کەرد سەرما . بەڵام جەنهاوەرەکێما جوابو هرووژمەکەیشا داوە و جەنگێ تن ئاما ئاراوە. جە ئەنجامەنە چەتێ فرە کوشیێ و ئنەیچ کە ڕۆشن بییەنۆ ٣ ئەندامی چەتەکا زامڏارێ بیێنێ. هەرپاسە یەکینەکێ گەشمەرڏە هاروونی گورزەشا جە تڕۆمبێلێوە سەروازی چەتەکا شانا. هەرپاسە جەنگاوەرەکێما جە دەوروبەرو سردەکێنە هرووژمی دووەمشا ماڕا. جە ئەنجامەنە ژمارێوە جە چەتەکا کوشیێ و ژمارێوە تەریچ زامڏارێ بیێ، یاگێ ئاماژەینە ژمارەو کوشییاو زامڏارا نەزانریان بە ڕۆشنی

جە قۆڵو عەین عیسای؛ سوپاو ئەرەگیرو تورکیای و چەتەکا دەگاو ئەبو سراشا جە وەرنیشتوو عەین عیسای بە چڕی بۆمبوران کەرد. جە ئەنجامو بۆمبوارانەکەینە زەرەری ماددی بە یانە و موڵکو مەدەنی هاموڵاتیا یاوا. هەرپاسە فڕۆکە بێفڕۆکەوانو دۆڵەتو ئەرەگیرو تورکی بە درێژای ڕۆی سەرو ئاسمانو عەین عیسای، شارو کۆبانێ و دەوروبەری خولیانۆ."