ژەنا بە داواو مڎرامانی و ئازادی و ئاشتی، ٨ و ئاداری ڕۊو جەهانی ژەنا کرێکاراش پیرۆز کەرڎ. جە چالاکییەکانە سەرنج وزیا سەرو بانگەوازەکەو ڕابەر ئاپۆی جە ٢٧ و شوباتینە و داواو هەنگامنیای جە دۊڵەتی کریا. 

دیگۆر:

جە بیناو دەم پارتی ناوچەو دیگۆری قەرسی بە درووشمۊو "بە ئەوەکۊشای ئازادیی ژەنا، ئاشتی ڕێکوزمۍ" مەراسیمۍ سازکریا. هامسەرۆکۊو دەم پارتی شارەکەی ئارزو ساڤاش دەرمانە ئەرەیاۋناش مڎرامانوو ژەنا دژو جەنگی بەردەوام بۆ.

پەرلەمانتارەو دەم پارتی ساڵیحە ئایدەنیزە ئەرەیاۋناش ٨ و ئاداری سەرهۊرداین دژو کۆمکوژیی ژەنا. سەرنجش وست سەرو بانگەوازە تاریخیەکەو ڕابەر ئاپۆی، واتش: "ئېژا ئۆجالان بە ئازایۍ گۊرۆ بانگەوازش کەرڎ پەی گلېرگەی دیموکراتیکی. پەکەکەیچ جوابو ئی بانگەوازەیشە داوە. پەنەوازا ئیتر دۊڵەت و ئۆپۆزیسیۆن هەنگامە بنیۆ. پەی ئانەی ئېژا ئۆجالان چی ڕوانگۆ درێژە بە کۊشش و ۋێش بڎۆ، پەنەوازا هەلومەرجی ئازاد بڕەخسیۆ. پەنەوازا گرڎ ئەرکو ۋێشا جا بەجۍ بکەرا".

مەراسیمەکە بە گۆرانیۍ دمایش ئاما. ژەنا بە درووشمۊو "ژەنی ژیۋای ئازادی" تا ۋەردەمو شارەوانی دیگۆری ڕاپیمایشا کەرڎ.

ئامەد: جەمەو کەلتوور و هونەری و ئەدەبی ژەنۍ (KASED) نمایشگاو "ژەنی و جاڎەیش"کەرڎۆ کە بەرهەمەکۍ هونەرمەڼە بەهار موسڵیحی جە وێش گێرۍ. ئەندامەو جەمەکەی نەشێ تۆپراکە جە قسەکاشەنە ژینا ئەمینیەش یاڎە ئاوردۆ و سەرنجش وست سەرو ئەوەکۊشای ژەنا دژو پیاسالاری. هونەرمەڼە بەهار موسڵیحە قسێش کەردۍ و باسش جە دلېینەو بەرهەمەکاش کەرد، هونەرەکەش پېسە ڕێبازێوە مڎرامانی نیشانەدا.

ڕحا: ئەنجوومەنو دەم پارتی لوۍ پەی تەپو مرازی. هامسەرۆکۊو دەم پارتی ڕحای سەما ئایشەئۆغلوە سڵامش جە مڎرامانوو ژەنا ۋەرکۊتوو مېیامینی و جەهانی کەرڎ، جەختش کەرڎۆ، ژەنی ئیسە هەمان ئا دەورەیە گېڵنا کە ١٢ هەزار ساڵۍ چێوەڵی گێڵنانش.

ئەدەنە: پلاتفۆرمو ژەنا جە ئەدەنە ئەرەیاۋنێوەش ۋەناوە، دماتەریچ کتێب و کارتۍ پەشتگیریشا پەی ژەنا زینانیکریای کیاستۍ. پارێزنەرە سەڤیل ئاراجیە بانگەوازو ئاشتی و گلېرگەی دیموکراتیکی ڕابەر ئاپۆیش یاڎئاوردۆ و بانگەوازش کەرد پەی بەشداربیەی جە ڕاپیمای ٨ و ئاداری جە ئەدەنەنە.