ئەنجوومەنو ئەڎایا ئاشتی جە بیناو ڕێکوستەو دەم پارتینە جە ناوچەو جزیرەو شڕناخینە ئەرەیاۋنێوەشا ۋەناوە.

جە چالاکیی ئەرەیاۋناکەینە چڼین کەسۍ و ئەڎۍ بەشدارۍ بێنۍ و جەخت چانەی کریاوە ئاشتی بە یەکلایانە نمەیاوۆ ئەنجام و پەنەوازا دۊڵەت جددیەتی پراکتیک نیشانە بڎۆ.

جە ئەرەیاۋناکەینە یووە جە ئەڎایا ئاشتی خەدیجە بایتورە قسێش کەردۍ و ئاماژەش پانەی دا کە پەنەوازا گرڎو لایەنەکا ئایێربەس ئەرەیاۋنا و واتش: "گەرەکمانە تەرمو ڕۆڵەکاما هۊرگێرمێوە. ئی پرۆسە بە شێوێوە یەکلایانە نمەیاوۆ بە ئەنجام. پېسە ئەڎایا ئاشتی دەسو واڵە و برایەتی درێژ مکەرمۍ. کاتو ئانەینە واچمۍ ئیتر وەسێن مەردەی. ئێمە دەسو ئاشتییما درێژکەرد، ئیساتێچ مشۆم ئەڎایا سەروازا دەسو ئاشتی درێژ بکەرا."

ئەدەنە

ئەنجوومەنو ئەڎایا ئاشتی جە پارکو ئینونی ئەدەنەی بە چالاکیێوە ئەرەیاۋنێوەشا ۋەناوە. واتەواچەو ئەنجوومەنی سوفیا بایاڤە ئاماژەش پانەی دا ئاشتیی بە ساڵێوە نمەبۆ، پەی ئانەی کەس نەمرۆ پەنەوازا چەکەکۍ بێدەنگۍ بکریا و دۊڵەت هەنگام بنیۆ.

عەزیزە گوڵتەکینە یووە جە ئەڎایا ئاشتی واتش: "ئایێربەس بە یەک لایەنە نمەبۆ، پەنەوازا هەر دووە لا ئایێربەس ئەرەیاۋنا. پەنەوازا هەردووە لا چەکەکاشا بێدەنگ بکەرا. داوا جە ئەڎایا سەروازا و پۆلیسا مکەرمۍ، ماچمۍ پڕۆسێوە تازە دەسش پنەکەرڎەن. شمەیچ بەیدۍ، یۆگێرمۍ. با ئیتر یەهەرو کەسیما نەسۊچۆ. پېوەرە ئاشتیی بنیاڎ بنیەیمۍ. ئەر دۊڵەت ئاشتیێوە حەقەتینش گەرەکا با ئی جەنگە مردۆ."