کۆردیناسیۆنو پاژکی ئەرەیاۋناش ٨و ئاداری بە بانگەوازو ئاشتی و گلېرگەی دیموکراتیکی تاجدار بیەن و دەسنیشانش کەرڎ ۋەرپرسیاری ئی قۆناغەیە جابەجی بکەردۍ؛ سەرو نامۍ ئازادیی، دیموکراسی و ئاشتی پەرە بە ئەوەکۊشای بڎەیدۍ.
کۆردیناسیۆنو پارتو ئازادی ژەنا کوردەسانی (پاژک) بە بۆنەو ٨و ئاداری ڕۊو جەهانی ژەنە کرێکاراوە پەیامێوەش وەڵا کەرڎۆ.
پەیامەکەو کۆردیناسیۆنو پاژکی پی جۊرەنە:
"جە کاتێنە پێشوازی جە وەهارێوە تازەو ٨و ئاداری مکەرمۍ، جە ڕۆزیەکا تا کلاراییەکا، جە ساراکا تا ئاسیاکا گرڎوشۆڕشگێڵنا ژەنا کە پەی ئازادیی ئەوەکۊشای و وەشکەرۍ بەهاکاو دیموکراتیکی و سۆسیالیستینۍ، بە وەشەسیایی، ڕێز و پنەزانایۆ یاڎۍ مکەرمېوە.
ئەوەکۊشای ئازاو ئێمەی ژەنا بە ئەوەکۊشای گۊرە، ڕەنج و جەنگو ساکینە جانسزۍ (سارا) و پیمەرەکاشۆ شێوەگیر و گۊرە بی. جە دژو جەهانو پیا سالاری، بە جەهان و زیهنیەتو ژەنۍ هێزو خوڵقنای ئازادی بەرکۊت. ئی ڕاپیما شکۆدارەو ژەنۍ ئارۊنە جە کوردەسانەنە ئینا جوڵەو جەهانی ۋێشەنە. ئا حەقیقەتەی جە ئەنجامو ئەوەکۊشای ژەنێوە بەرکۊت، ئازادی ژەنێش کەرڎ بە بنەماو ژیۋای ئازادی. سەرو ئی بنەمایە ٨و ئاداری ڕۆو جەهانی ژەنا کرێکاری جە تەمامو ژەنا جەهانی، هەمڕایا زینانیما، جە سەنگەرەکاو مڎرامانی کە جە گرڎوو مېڎانەکانە ئینۍ ئەوەکۊشاینە و گەل و دۆساما پیرۆز بۆ.
چنی 'مانیفێستو ئاشتی و گلېرگەی دیموکراتیک'ی ڕابەر ئاپۆی پەی ژەنا کوردی و گەلا، ملمېنە دلۍ وەهارێوە تەری.
چا نامەنە کە ڕابە ئاپۆ پەی پاژکیش نویستەبۍ و یاوابۍ دەسما چنەشەنە دیاریش کەردەبۍ سەرکۊتەی ئی پرۆسە تازەیە پێوەسا بە ژەناوە. ڕابەرایەتیما واتش، "پرۆسەو کۆمۆمینالیستی دیموکراتیک، ئاژەی تازەو ژیۋای گلێرگەیی بیەو ئەڎۍ-ژەنۍ" ئانەی بەروزۆ کە تا کولتوورو دەسدرێژی کە سەرو گلېرگەی داواکاریایرە سەپیان دەرباز نەکریۆ، حەقیقەت بە گرڎو ڕەهەندەکاشۆ جە بوارەکا فەلسەفە، زانست، ئیتیک، جوانیشناسی و ئاینەنە بەرنمەگنۆ. دەسنیشانش کەردەن تا جە سەردەمی تازەنە کولتوورو پیاسالاری کە جە کرۆکو گلېرگەینە نامنشین بیەن هۊرنەشێویۆوە ئانە سۆسیالیزم نمەیاوۆ بە سەرکۊتەی. دەسنیشانیچش کەرڎ بنەماو سەرنەکۊتەی سۆسیالیزمی بنیاڎنریای پرسو دۊڵەت، نەتەوە و دیموکراسی نییا، جە بنەمانە کۆیلایەتی ژەنێن کە پېسە کولتوورێوە زیڼەی ئینا ئارانە. وە شەرتەی بنەڕەتیەو سۆسیالیزمی پېوەسا بە پەرەپنەدای نزیکایەتی پرۆگرامکاری جە عیلاقەو ژەن و پیاینە. ئاماژەش پانەی کەرڎەن جە کاتێنە پیێوە نەزانۆ چنی چەنی ژەنێوە قسۍ بکەرۆ ئانە نمەتاوۆ بۆ بە سۆسیالیست و پیمەرێوەش دیاریکەردەن. ماچۆ، هەتا ژەنی جە کولتوورو کۆیلایەتی دوورە نەگنۊوە کە جە زەینشەنە وەشکریان، مەردەی جە ئاوراینە پېسە چارەنوویسی مېیاچەماشەنە نویسیان، دژمردایۆ جە وەرا وەرو ئی چارەنویسەینە بی بە گوزارشت جە گۊرەیی کەسایەتی ئازادیمانە. دەسنیشانش کەردەن ژەنی خوڵقنەرەو کولتوور و گلېرگەینە و ۋەرو ئینەین پیرۆزی و خوڎاوەنڎی هینو ژەنان. ئی نزیکایەتییەو ڕابەر ئاپۆی کە هێز و جۆش جە گرڎیمانە منیۆ، ئانەی بەروزۆ حەقیقەتو ژیۋای ئازادی ئینا لاو ژەنێوە کە هیچ وەختۍ دەسبەردارەو بەها کاریگەرەکاش نەبیێنە، ئا پرەنسیپە بنەڕەتییەو ژیۋاین کە سەرو پەیا ۋێشۆ مازۆشۆ.
ڕابەر ئاپۆ تەلارسازی تیۆری و پراکتیکی تەڤگەرو ژەنا کوردەسانیا. جە سەیەو ڕابەر ئاپۆینە، ژەنی جە ساڵۊو ١٩٨٧یوە بیێنۍ بە هێزێوە ڕێکوزیا و سەرو بنەماو ڕوانگەو ئازادیی ژەنۍ، بەدەسئاوردەی ئیرادە و هۆشمەندی ئازادی. سەرکردایەتی ئێمە کە جە ٨و ئادارو ١٩٩٨ی ئایدۆلۆژیاو ڕزگاریوازی ژەناش ئەرەیاۋنا، دەرفەتش بە ژەنا دا کە بێ ئایدۆلۆژیا و ڕێکوستەی مەنێبێنێوە، ژیۋایۍ تازە بە ویر و ئایدۆلۆژیاو ۋێشا ڕاوەبەر بکەرا. ڕابەرایەتی جە گرڎ ٨ێوە ئادارینە مانا و قۆناغێوە تازەش دان بە شۆڕشو ئێمەی ژەنا. ئېساڵ ٨و ئاداری بە بانگەوازو ئاشتی و گلېرگێوە دیموکراتی تاجدار مکریۆ. ئاشتی و ژیۋایۍ ئازاد بیەن بە حەسرەتێوە هەمیشەیی جە جوگرافیاو کوردەسانینە. هەزاران ژەنی کە کۊششا کەردەن پەی بەدیئاردەی ئی حەسرەتا، قوربانی فرەشا پەی وەرمو دیموکراسی و سۆسیالیزمی دان، ئازادی ژەناش کەردەن بە ئامیانو شۆڕشو کۆمەڵایەتی جە سەدەو ٢١ینە. چیسەولای ئێمە پېسە ژەنۍ بەردەوامۍ بیمۍ جە کۊششی پەی جوابدایۆ بانگەوازو ئاشتی و گلېرگێوە دیموکراتیکی. پەنەوازا گرڎو لایەنەکا وەرپرسیاری ئی پرۆسەیە جە ئەستۆ بگێرا و وەرپرسیاری ۋێشا جابەجۍ بکەرا.
ئازادی بەڎەنی ڕابەریما کە گرڎو ژیۋای ۋێش پەی ئازادی ژەنۍ و گلېرگەی بەخت کەرد، مەرجی بنەڕەتی وەڵێوستەی ئاشتی و پێوەرە ژیۋاین. سیستەمو گۆشەگیری ٢٦ ساڵەی مشۊم ئیساتۍ دمایش پنە بۍ. گرڎو ئا ژەنا جە ٨و ئادارینە مەیانە سەرو جاڎەکا، پا هۆشیارییەی کە ئازادیی ڕابەری ماناو ئازادی ژەنان، پەنەوازا ئی ٨ی ئاداریە بکەرا بە ڕۊو کرداری و ئەوەکۊشای پەی ئازادیی ڕابەری. سەرکۊتەی ئی پڕۆسە تازەیە کە بە بانگەوازو ڕابەریما دەسشپنەکەرڎ، بە ئازادی بەڎەنی ڕابەر ئاپۆی و ئا مەرج و دەرفەتۍ کە پەی ڕاوەبەردەی پرۆسەکەی هەنش، ڕاش مشۊنە. ڕابەر ئاپۆ مشۊم جە ڕوو بەڎەنیوە ئازاد بکریۆ و دەرفەتو ئانەیش پنە بڎریۆ کە چالاکانە پەی ئاشتی و دیموکراسی هەرمانە بکەرۆ.
کۊششو ئێمە پەی ئازادی ژەنا کە جە ئەنجامو خولیایش پەی ژیوایۍ ئازادو ڕابەر ئاپۆی و ئا دەرفەتا کە پێشکەش بە ژەناش کەرۍ پەرەش ئەسا، ئیرادە و هۆشیاریێوە گرنگش جە ژەنا کوردینە پەرە پنەدا. ئێمە سەرمەشقیما جە ژیوایۍ شکۆدارانە، ئازادی و ئەوەکۊشایۍ شایستەینە کەردەن. ژەنا کوردی هیچ وەخت هیواشا بە ژیۋایۍ هامبەشی چنی گەلاو کوردەسانی و تورکیای، چنی ژەنا ۋەرکۊتوو مېیامینی و جەهانی جە دەس نەڎان. هەمیشە سەرمەشقایەتی ژیۋای ئاشتی و ئازادی و ژیۋایۍ ئازادیشا کەردەن. بە ئازایێوە فرۆ هومێڎشا بەرزکەردۆ و پەرەشا بە کولتوورێوە دیموکراتیکی دا. ژەنا ئارۊیچ سەرمەشقەکۍ سەردەمو ئاشتی و گلېرگێوە دیموکراتیکینۍ سەردەمو گلېرگەی دیموکراتیکی سەردەمو ژەنان. مانیفێستو گلېرگەو دیموکراتیکی مانیفێستو ئازادییا. سەرو بنەماو ئا هۆشیارییە ۋەرپرسیاری پرۆسەکەی جابەجێ مکەرمۍ و کۊشش پەی ئازادی و دیموکراسی و ئاشتی چڕتەر مکەرمېوە.
سەدەو وسو یەکی سەردەمو ئازادی ژەنا بۆ. جمېیەرە ڕزگاریوازەکۍ ژەنا کە جە ڕاو ملەملانێ جێندەری و فێمینیستیوە قووڵیشا بەدەسئاوردەن، دینامیکو سەرەکی کۊششو ئی سەردەمەینۍ. 'ژەنی ژیۋای ئازادی' بیەن بە دروشمۊو سەرەکی ئی سەردەمەیە. ئی دروشمۍ کە گوزارشت جە حەقیقەتو ئا پێکئامایە قووڵەی مکەرۆ و جە کوردەسانۆ بە جەهانەرە وەڵا بیەنۆ، ئانەی بەروزۆ کە کوردەسان بە جەهانی بیەن. چنی وەڵێکۊتەی ئازادی ژەنا گلېرگە ئازادتەر بۆنە و ژیۋایۍ تازە بە ژەنەو ئازادی و پیای ئازادی بنیاڎ منیۆ. پارادایمی تازە گرڎو حەقیقەتە ئایدیۆلۆژی و فەلسەفی و سیاسییەکا ئینەی ئاشکرا مکەرۆ.
کولتورو جەنگی و تنوتیژی زیاتەر جە دژو ژەنا پەرەش پنەدریان و کەردێنەش بە کۆیلە. پۊکەی پەنەوازا کۊشش پەی ئاشتی و ژیۋایۍ ئازادی دژ بە جەنگی بە پلەی یووەم جە لایەنو ژەناوە بەرەو وەڵۍ بلۆ. هرووژمەکۍ سەرو ژەنا جە لایەنو عەقڵیەت و سیستەمو باڵادەسی پیایاوە کە هەزاران ساڵېن دژوو ژەنێن، جە سیستەمو مۆدێرنیتەی سەرمایەداری و واقیعو جەنگی جەهانی یەرەمینە یاوێنۍ بە قولەپۊپە. کۆمکوژی ژەنا و گرڎ جۆرە هرووژمێوە پەی سەرو جەسە و ڕۆح و بیەو ژەنۍ بە شێوێوە پلان پەی متەیرەی و سیستماتیک پەرە مسانۆ. ئیستغلالکەردەی هەرمانۍ، هەژاری، نایەکسانی و نادادپەروەری زیاتەر جە دژو ژەنا وەڵابیەنۆ. سیستەمو پیاسالاری فرە جە کۊششو ژەنا و ئا دەسەڵاتیە تەرسۆنە کە دلېشەنە بەرۆ. پۊکەی واقیعو ژەنۍ پېسە خوڵقنەرو کولتوور و ژیۋای و کۆمەڵایەتیبیەی ئینا چېرو هرووژمێوە گۊرەینە. بەڵام ژەنی دەس جە ئەوەکۊشای ئازادی هۊرنمەگێرا، سەرەڕاو قوربانی قورسی، بەردەوامێنۍ جە ئەوەکۊشای جە دژو پیا سالاری و سیستەمو دەوڵەتوازی و پاوانوازی. ئەوەکۊشای ژەنا بناغەو سیستەمو پیاسالاری دلېنەبەرۆ. گۊرەتەرین وەرگیری ژەنا جە دژو فاشیزمی و قڕکەردەی ژەنا، ڕێکوستەو ئاڎیشان. هەر ژەنێوە گەرەکشا ئازاڎە بۆ، مشۊم ڕێکوزۆ. پەنەوازا ۋێپارێزنای بکریۆ بە ڕاو ڕزگاری. ئەوەکۊشای جە دژوو سیستەمی باڵادەس و کولتورو خراپ بەکارئاوردەی و قڕکەردەیی ژەنا چڕتەر بکریۆوە.
ئێمەی ژەنا جە گرڎو پرۆسەو ئەوەکۊشاینە دەوری سەرمەشقما بیەن و سەرکردایەتی فاڕیایە کۆمەڵایەتییەکاما کەردەن. ئیساتێچ کۊشش و هەوڵ و مانیایما جە سەرکۊتەی ئا سەردەمە تازەینە کە پېسە پارادایمێوە ژیۋای ئازادی شێوەش گێرتەن، یەکلاکەرەوە بۆنە. دماو ئا گرڎ ساڵا هێزی سروشتی و ئیرادەی سروشتی و هۆشیاری هێزو فاڕای گلېرگەی و فاڕای سیستەمیشا هەن. ئێمە چی مژارەنە متمانەما بە ۋێما هەن.
جوانۍ سەرمەشقۍ ئی پرۆسەینۍ و هێزی بنەڕەتی خوڵقنەرۍ ئایندەینۍ. ئێمە مزانمۍ و باوەڕیما هەن کە جوانۍ پا هێزەی کە جە ڕابەر ئاپۆیۆ هۊرشا گېرتەن، متاوا بە چالاکتەرین شێوە بەشداری جە ئەوەکۊشای سەردەمی تازەینە دەور گێڵنا.
ئەڎایا گەشمەرڎاما و گەریلاکېما قوربانیێوە فرەشا دا و بەهای گۊرەشا خوڵقنا. ئاڎۍ بە بە بەهێزتەرین شێوە سەرمەشقایەتی هەڵمەتۊو ئازادیی ڕابەریشا کەرڎ. پەنەوازا ئەڎایاما دارای ئا پرۆسەیە بکەرا کە سەرکردەکەما هێڵەش پە کێشتەن و ۋێشا ڕێکوزا و بە سەرمەشقایەتیشا سەرکۊتەی بەدەس بارا.
داوا جە ژەنا تورکیای مکەرمۍ کە حەز بە دیموکراسی و ئاشتی مکەرا، چی پڕۆسەنە دەورشا بۆ و ۋەرپرسیاری ئاشتی و دیموکراسی جە ئەستۆ گێرانە. پێوەرە جە گرڎ کاتێ بەهێزتەرۍ بیمۍ و پێوەرە شۆڕشو ژەنا بنیاڎ بنیەیمۍ.
دیسان هەڤاڵا و دۆسە ئینتەرناسیۆنالیستەکېما هێزێوە فرەشا بە کۊششو ئازادی ژەنا کوردی دا و هەمیشە پاڵمانە مردێبێنۍ. دەورشا دی جە جەهانگیری پارادایمو دیموکراتیک-ئیکۆلۆژی و ڕزگاری ژەنانە. جەهانو سۆسیالیستی ئازادی بە سەرکردایەتی ژەنا وەڵۍ گنۆ. چی پڕۆسەنە داوا جە گرڎو هەمڕایاما مکەرمۍ کە پېوەرە سەرو بنەماو دروشمو "ژەنۍ، ژیۋای، ئازادی" ڕێکوزا و پێوەرە کۊشش پەی ژیۋایۍ ئازادی ڕاوەبەر بکەرا.
سەرو ئی بنەمایۍ پێشوازی جە ٨و ئادارێوە تازەی بە ڕۊشنایی وەهاری، هیواو سەردەمو ئاشتی و گلېرگەی دیموکراتیکی مکەرمۍ.
بە باوەڕی چەمپنەکۊتەی ئازادی چنی ڕابەرایەتی سڵام جە گرڎو ژەنا و گەلەکەیما مکەرمۍ. جارێوەتەر ٨و ئاداری ڕۊو جەهانی ژەنە کرێکارا جە گرڎ کەسێ پیرۆز مکەرمۍ.
بژیۋۆ ڕابەر ئاپۆ!
بژیۋۆ ٨و ئاداری!."
