مېیانو ئەرەیاۋنای و چاپەمەنی هێزەکاو سوریای دیموکراتیک (قەسەدە)ی دەربارەو هرووژموو ئەوەمەڼنەکا ڕژێمو بەعسی پەی سەرو ناوچەکا زیبانو  تەیانی ئەرەیاۋنێوەش وەڵاکەرڎۆ، ئەرەیاۋناش ئەوەمەنڼەکۍ ڕژێمی وەڵینو بەعسی و میلیشیاکاو دیفاع ئەل وەتەنی بەردەوامێنۍ جە تاڵانکاری جە ناوچەکا زیبانی و تەیانی ۋەرکۊتوو دەیرەزۆری. ئاماژە پانەی مکەرۆ، میلیشیاکۍ ڕای سەرەکیەشا گرتێنە و هرووژمشا کەردەن سەرو بنکە ئەمنییەکا و ئەرەمەرزیا خزمەتگوزارییەکا.

قەسەدە ئەرەیاۋناش مەرامو هرووژمەکا زەرەر یاوناین بە هاموڵاتیا و نیایۆ ئاڵۆزی و پشێوییا جە هەرێمەکەنە. جەخت مکەرۊوە، هێزەکاو ئەنجوومەنو سەروازیی دەیرەزۆری بە گرڎو هێزو ۋێشاوە دژو هرووژمەکا مرداوە و هۊرکوا سەرشا و مڎاشا دەسو دادگایۆ.

قەسەدە جەخت مکەرۊوە، هێزەکێشا چنی هامپەیمانی مېیاندەوڵەتی بەردەوامێنۍ جە هەرمانەی هامبەشۍ و ڕا بە جمووجووڵو شانەکا داعشی نمەڎا.

قەسەدە سڵامش ۋنەو هۆشیاری مەردمو دەیرەزۆری و هامکاریشا چنی هێزەکاشا کەرڎ، ماچۆ: "ئەمنیەتو دەیرەزۆری هێڵەی سوورەنە و شۊنەو گرڎو ئا کەساوە بیمۍ کە هەوڵ مڎا زەرەر بە هەرێمەکەی بیاۋنا ".