سڕی ساکیک سەبارەڎ بە گۆشەگیری سەروو رابەروو گەلوو کوردی عەبدوڵا ئۆجالانی، ڕاپیمای ئازاڎیی و هۊرچنیە دلێینەییەکا ٣١و ئاداری قسێش پۍ ئاژانسوو هەواڵوو فوراتی (ANF)ی کەردۍ.

سڕی ساکیک ئانەش وست ڕووە کە گۆشەگیری ئیمراڵی هەم دژ بە یاساکا دلێینەو تورکیای و هەمیچ جە دژوو یاسا میان نەتەوەییەکان و واتش: "ئێمە ماچمۍ گۆشەگیری سەروو بەڕێز ئۆجالانی نایاساییا، نا ویژدانیی، نا مرۆڤانە و نا ئیسلامییانەن. واتە سیاسەتێوە کە جگە جە پا گیری سەروو چەقبەستەی و بە بنبەس یاوای حیچ بەهانۍ و مەعنێوەتەرش نییا. حکومەت کە جە وەختوو گفتووگۆکانە ئیمراڵیش کەردەبۍ بە ڕاو هانەی، ئیسەیچ پێسە ڕەمزوو بە بنبەس یاوای، بەرەکۍ ئیمراڵیش وستێنێرە. ئا ئاژە جە روو ئاینڎەو گەلا و ئیراڎەو پێوەرە ژیۋایۆ جە وڵاتەکەنە مەکریۆ بەردەوام بۆ.

ئا پێشوازیە گۊرەی کە خەڵک پۍ ڕاپیماو ئازاڎیی نیشانەش دا داواکاری و ویستوو ئاڎیشا پۍ چارەسەری و ئاشتی نیشانە مڎۆ. حەرپاسە چالاکیەکۍ مانگرتەی جە واردەی و ئێشکگیریی داڎپەروەری کە پەی دماییئاردەی بە سیاسەتوو گۆشەگیری و رەڎکەردەیۆ سیاسەتوو بە بنبەس یاوای، لووۍ ڕاوە. گەلوو کوردی و گرڎوو ئا پێکئامایۍ داکۆکی جە دیموکراسی و ئاشتی کەرا گەرەکشانە سیاسەتوو گۆشەگیری دمایش پنە بۍ و دەس بە پەیجوری و گێڵای شۊنەو چارەسەریێوە هەمیشەییرە کریۆ".

'ئێمە سیاسەتوو ڕاو یەرەمی درێژەپنەمڎەیمۍ'

سڕی ساکیک جەختش کەردۆ، کە ئاڎۍ پێسە دەم پارتی بەردەوامۍ با سەروو گێرتەی ۋەروو سیاسەتوو خەتەو یەرەمی کە سیاسەتوو یەکسانی و ئاشتیانەین سەروو بنەماو دیموکراسی و دوور جە سیاسەتوو نەژاڎپەرسانەی. باسش چانەیچ کەرد، ژیۋای ئێمە دلۍ ۋنۍ و ئێشیرە ۋیەردەن، ناچارێنمۍ کە ئایندێوە ئارام و دوور جە جەنگی پۍ زارۊڵا ئی وڵاتیە بنیاڎ بنیەیمۍ، ڕاو خوڵقنای ئانەیچ دیموکراسی، ئاشتی، یەکسانی و داڎپەروەرین. پۊکەی ئێمە درێژە بە سیاسەتوو ڕاو یەرەمی مڎەیمۍ".

'بەڕێز عەبدوڵا ئۆجالان ئینا گۆشەگیرینە'

جە درێژەو قسەکاشەنە سڕی ساکیک ئاناش وست ڕووە کە پرسوو کوردی یاوان بە ئاستێوە جەهانی و پی جۆرە بەردەوامبۍ: "هەڵبەتە مشۊم قۆناغێوە تازۍ سەروو چارەسەری دیموکراتیکی بۍ ئاراوە، بەڵام جە ئیسەنە ئاژێوە پا جۆرە نیا ئارانە. داواکارییەکۍ چێوێنۍ و قەراروو دەوڵەتی چێوۍ تەرا. ئیسە حیچ وەڵێکۊتەیۍ کە ویستوو بەدیموکراتیکبیەی بۆ نیا ئارانە. زینڎانیا نەوەشی جە ژووری تاکەکەسینە مازاوە و ژمارێوە فرە جە زینڎانیا ۋەروودەم و مەردەینە جیامەنێنۍ. بەڕێز عەبدوڵا ئۆجالان ئینا چێروو گۆشەگیرینە و ئانەیچ پێچەوانەو یاساکا تورکیاین. ئێمە، بنەیانە و پارێزنەرا داواکاریما پێشکەش کەردەن، بەڵام گرڎشا بێ جواب مەنێنۍ. وەختۍ دەوڵەت یاساکاو ۋێچش جابەجێ مەکەرۆ ئینسان مەتاوۆ باس جە حیچ پرۆسە و قۆناغێوە تازەی کەرۆ. بەڵام پۍ چارەسەری پرسوو کوردی کەردەیۆ کەناڵۍ گفتووگۆی پێویسا".

'چی هۊرچنیەینە کەموکوڵیەکاما ویەرنمۍ'

ساکیک جە دمادمایی قسەکاشەنە سەبارەڎ بە هۊرچنیەکایچ واتش، "دماو هۊرچنیەو ٣١و ئاداری گرنگتەرین چێو پۍ ئێمە ١و نیسانیا ڕۆو ئاشتی. جە ڕۆو دماو هۊرچنیەینە ئێمە گەرەکمانە ئا زەرەرەی جە هۊرچنیەی گرڎینە ۋەرما کۊت قەرەبووش کەرمێوە و کەموکوڵیەکا ویەرنمۍ و دمایی بە رژێموو قەیومی بارمۍ، کەشێوە بارمۍ ئاراوە کە چی خاکەنە ئاشتی چەسپنۆنە و دیموکراسی بارۆ ئاراوە. ۋەروو ئانەی ٨ ساڵێن جە جوگرافیاو کوردانە، ئیراڎەو هۊرچنیاو کوردا زەوت کریان و دلێنەبریان، گرنگا ئێمە جە هۊرچنیە دلێینەییەکانە بە سەربڵندی بەیمۍ بەر. ئا سەرکۊتەیەی چا هۊرچنیانە بەدەسمۍ، بەرش وزۆ کە گەلوو کوردی درێژە بە هێزوو کۊشیای ۋێش مڎۆ".