وەزارەتوو كۆچ و كۆچبەرا عێراقی ئەرەیاۋناش، نزیكەو ٥٣٣ خێزانا ئاوارۍ جە كامپەكا هەرێموو كوردسانیوە پۍ ماواو ۋێشا گێڵاوە، ژمارەو ئا كەسایچە کە بەشێوۍ ئارەزوومەندانە گەرەکشانە گێڵاوە رووەشا جە زیاڎبیەین.
عەلی عەباس جیهانگر، واتەواچوو ڕسمی وەزارەتوو كۆچ و كۆچبەرا عێراقی، جە بارەو ئامادەكارییەكاشۆ پۍ گێڵنایۆ سەڎان ئاوارا جە كامپەكا هەرێموو كوردسانیۆ پۍ ماواو ۋێشا ئەرەیاۋنێوەش ۋەڵا کەردۆ.
جە ئەرەیاۋناکەینە ئامان، جە سەرەتاو ئێساڵیوە و جە دەسپنەکەردەو پلانەی نیشتیمانیۍ پۍ گێڵنایۆ ئاوارەكا جە سەرەتاو ئێساڵیوە، وەزارەت سەرنجوو زیاڎبیەی ژمارەو ئا كەساشە دان ، كە ئارەزوومەندێنۍ پۍ گێڵایۆ پۍ ماواو ڕەسەنوو ۋێشا، چی حەفتەنە نزیكەو ٥٣٣ خێزانا ئاوارۍ كامپەكا هەرێمی گێڵاوە ماواو ۋێشا.
ئاماژەش پانەیچ کەرد،کە ٣٤٣ خێزانۍ ئاوارۍ تەرۍ هەنۍ، كە ئارەزوو گێڵایۆی ۋۍ بەخشانەیشا جە كامپەكا (حەسەن شامی و خەزەیر)ی جە پارێزگاو هەولێریۆ پۍ مەنتیقەکا ۋێشا کەرا.
باسش چانەیچ کەرد، وەزارەت پرۆسەو گێڵنایۆ ئاوارەكا پۍ مەنتیقەکاشا بە شێوەو وەجبەی یۆ دماو یۆی گێرۊنە ئەستۆ، دماو ئانەی جە ڕوو ئەمنییوە مەنتیقەکێشا پۍ حازر کریۍ با، حەرپاسە ڕەزامەنڎیی فەرماندەیی ئۆپەراسیۆنە هامبەشەكایچ پۍ گێڵنایۆ ئاوارەكا هۊرگیریان.
ئانەیچش وست ڕووە، پەنەوازیەکۍ گێڵایۆ پۍ نزیكەو ٧١ خێزانا ئاوارەی جە كامپوو (كبارتۆ)ی جە پارێزگاو دهۆكینە حازر کریان، ئاڎیچ دماو ئانەی نامێشا تۆمارەكریا کە بە ئارەزوومەندانە گێڵاوە پۍ ماواو ۋێشا.
جە دمادماینە واتش: نزیكەو ١١٩ خێزانا ئاوارۍ ئەرەنیشتۍ كامپوو تازەدێ جە مەنتیقەو كەلاری سەر بە پارێزگا سلێمانی نامێشا تۆمارەكەردێنە گێڵاوە ماواو ۋێشا.
یۆ چا مەنتیقا کە ئاوارەکۍ گێڵاوە پەیش شەنگالا و جە ماوەکا ۋیەردەینە سەڎان خێزانۍ ئاوارۍ ئێزدی جە کامپەکا هەرێموو کوردسانیوە گێڵێنێوە پۍ ئا شاریە.
