ساڵێوە سەروو هجوومەکەو پاریسیرە ملۊ، وەراوەروو ئا هجوومیرە داواوداپەروەری کریا، وەنەپەرسایوەی سەخت ملۊ ڕاوە، پەرسۍ فرۍ چەمەڕوانۍ جوابینێ. وەلۍ وەروو ئانەی داواکاری گردینوو فەڕەنسای وەنەپەرسایوەکاش دما وزۊ، پەرسێوە تەرە ورووژنییۊ.
ساڵێوە چێوەلتەر دژوو ناوەندوو کەڵتووری کوردی ئەحمەد کایای جادەو ئەنگینینە ئامادەکاری کریۍ پەی کۊکوشییەکەی ساڵەو ٢٠١٣. جە ٩ کانوونوو دووەموو ساڵەو ٢٠١٣ دژوو نویسگەو زانیاریی کوردستانی، کە گنۊ نزیکوو ناوەندوو کەڵتووریوە هجوومێوە تیروریستی کریا و یوە جە ئەندامە ئەرەمەرزناو پەکەکەی، ساکینە جانسیز (سارا)، نوێنەرەو کەنەکەی پاریسەنە، فیدان دۊغان (ڕۊژبین)ە و ئەندامەو تەڤگەروو گەنجا، لەیلا شایلەمەز(ڕوناهی) کریۍ ئامانج و بە ٣ فیشەکۍ کە وەروو سەرەیشا کەوتەبۍ تیرۊرۍ کریێ.
بەڵگەنامەکێ، تۊمارە دەنگییەکۍ و شایەتحاڵەکۍ بە ڕۊشنی دەسوو دەوڵەتوو تورکی و میتیشا چی کۊکوشییەنە ئاشکرا کەرد. وەلۍ حیچ وەڵێکەوتەێوە دۊسییەکێنە نەکریان. نە دەوڵەتوو تورکی و نە دەوڵەتوو فەرەنسای هامبەشی پا زانیارییا مەکەرا، کە ئینۍ وەروو دەسینە. هەرپاسە دەزگاوهەواڵگێری دلۍ فەڕەنسایچ وەراوەروو داواکارییەکاو دادوەرینە و گەلوو کوردینە بێدەنگا و هامبەشی پا زانیارییا مەکەرۊ کە هەنێ. بانگەشەو ئانەیە کەرۊ، کە ئی دۊسییە "نهێنیی دەوڵەتیین". ئاستەنگییەکۍ و هامبەشینەکەرڎەی زانیارییەکا بە نامۍ "نهێنییەکاو دەوڵەت"یوە گومانەکێش فرەتەرۍ کەردێنێ. پارێزنەرۍ و ڕێکوستەیە کوردییەکۍ تەسەورشا چانەن ئا بەڵگەنامۍ زانیاریۍ گرنگێشا چەنەنۍ دەربارەو بکوشەکەو عومەر گونەی، کە ساڵەو ٢٠١٦ بە شێوێوە گوماناوی زیندانەنە مەرد. ڕێکوستەیە کوردییەکۍ و دۊسەکێشا چندین جارۍ هۊشدارییشا دان دەسەڵاتداراو فەڕەنسای، کە ئەگەر ئا کەسۍ کە فەرمانەو هجوومەکەیشا بەرە کەردێنە و ئانۍ کۊکوشییەکەشا کەرڎەن ئەنجامداوە سزا نەدریا، ڕەنگا ڕووبەڕووۍ هجوومی تازەی باوە.
ڕاپیمای جە ٢٣ کانوونوو یوەمینە
گەلوو کوردی و دۊسەکێشا پەی بەیاگەیاونای دادپەروەری و ئاشکراکەرڎەی دۊسییەکاشا جە ٢٣ کانوونوو یوەموو ٢٠٢٣ سەعات ١١:٠٠ وەرڎەموو نویسیگەو زانیاریی کوردستانینە جە گاردونۊردوو پاریسینە کوۍ باوە و ئەڤین گۊییە، عەبدوڕەحمان کیزیل و میر پەروەری یادۍ کەراوە.
(سی دی کەی-ئێف) داواش کەرڎە: "پەی بەیاگەیاونای دادپەروەریێوە بێلایەنی و ئەوەکۊڵیەێوە وردی تا ویلیام مالێت و هامبەشە تاوانکارەکاش دادگایی کریا، ڕۊو شەممە ٢٣ کانوونوو یوەموو ٢٠٢٣، جە گاردونۊرڎۊ بەرەو ئا یاگێ، کە هجوومەکەش چەنە کریان ڕاپیماێوە جەماوەری کریۊ".
