سیاسەتمەدارەو کوردی سەباحەت تونجەلە، کە پێوەس بە دۊزوو کۊبانۍ زینڎانی کریێنە ئەرەیاوناش، بەشدارە بۊ جە مانگێرتەی جە وارڎەینە، کە پەی ئازادیی ڕابەروو گەلوو کوردی عەبدوڵا ئۊجالانی دەسش پەنە کەرڎەن.  

سەباحەت تونجەلە جە ڕاو پارێزنەرەکاشۊ پەیامێوەش کیانا و واتش، جەسەوایوە دەس بە مانگێرتەی جە وارڎەی کەرۊ. تونجەلە ئاماژە پانەیە کەرۊ، دەسکەوتوو کوردا چکۊ بۊ، تورکیا هجووم کەروو سەروو واگەی، بەتایبەت سەروو وەرنیشتوو کوردستانی و هەرێموو کوردستانی، ئی هجوومێچشە  شەرمەزارۍ کەردێ.

تونجەلە ئەوەخوایش کەرڎۊ، کە ڕابەروو گەلوو کوردی عەبدوڵا ئۊجالان پەی چارەسەری ئامادەن، داواش کەرڎە، کە گرد لێوە پەی ئاشتیی وەرپەرسۍ با. تیشکەش وستە سەروو مانگێرتەی زینڎانییا و واتش: "ئێمەیچ بە درووشموو "ئازادیی پەی ئۊجالانی، چارەسەر پەی پەرسەو کوردی" دەس بە مانگێرتەی جە وارڎەی کەرمێ. ٢٨ کانوونوو یوەمیوە من و مەلەک کارتالە، کە هەمان ژوورنە مەنمێوە چەنی موقەدەس کاباکۍ دەس کەرمۍ بە  مانگێرتەی جە وارڎەیی بەنۊرە ، کە زینڎانوو ژەناو سینجانینە بەرڎەواما. پی بۊنەوە، سڵام وەنەو زینڎانییە مانگێرتەکا کەرمێ. ورچنییەیە هەرێمییەکۍ جە ئەنجاموو ئی کۊشیایوە یەکلایۍ باوە. ساڵەی تازۍ وەنەو گردوو گەلەکەیما و ژەنا مەبارەکە کەرمێ".