شلێر ڕەسوڵی، کە پەی پارێزناو کەرامەتیش و جە تەرسەو "دەستدرێژی" پیا هامساکەیشان جە دەلاقەوە وێش فڕدابێڕە واری، جەدمای چنڎین ڕۊان جە ئەوەمەنەی جە چارەسەگانە، گیانش جەدەس‌دا.
زانیان کە ڕۊو پەنجشەمەی ڕۆدیارو ڕ ۱۷ـو ئاوەوەرە (خەرمانان)و ساڵەو ۱٤۰۱ی ڕۆجیاری، "شلێر ڕەسوڵی" تەمەن ۳٦ ساڵانە خەڵکو دەگاو "چەشمید٘ەر"ی سەر بە شارو "سەوڵاوا"ی و ئەرەنیشتۍٚ شارو مەریوان‌ی، جە نەوەشخانەو شارو سنە-یەنە گیانش جەدەس‌دا.
نامبریێ ڕۆو شەممەی وییەردەی ۱۲ـو ئاوەوەرەو ۱٤۰۱ی ڕۆجیاری، ئەزرەتیێ دەستدرێژی پیا هامساکەیشانە، وێش جە دەلاقەو ئا یانەیوە فڕدانرە واری و جە ئاکامەنەمسەخت بریندار مبۆنە و مگنۆنە کۆما و پەی چارەسەری ڕەوانۍٚ شارو سنەی  مکریۆنە.
بە پاو زانیارییەکان، پیا هامساکەشان بەنامۍٚ( گ.ق)، بە بەهانێ نەوەشی هامسەرەکێشەوە، "شلێر"ێ مکێشۆنە یانەکەیشان و هەوڵ مڎۆن تا دەستدرێژی بکەرۆنەسەرش. شلێرە کە پیلانە قێزونەکەیش مزانۆنە، پەی پارێزنای شۆداری وێش ڕووبەڕووش مبۆنە و بەڵام سەرەنجام وێش جە دەلاقەو یانەکەیوە وزۆڕە واری و پاسە کە باسش کریا گیان مسپارۆنە.
شلێرـە، ئەڎایەو دوێ زاڕۆڵان بییێنە و جە سەروەختو ڤییەرەکەینە پیا هامسەرەکەش جە هەرێمو کوردستانینە سەرقاڵو کرێکاری بییەن.
دمابەدمای ڤییەرەکەی ژەنە چالاکوانۍٚ شارو مەریوانی بە وێنیشاندای و گلێرەو بییەی کەردە دژە ژەن و ئانزانیەکەشان شەرمەزار کەرد و دواشان جە دەسەڵاتی کەرد، تا کەسی دەستدرێژیکاری سزا بڎۆنە و ئاساییش و سەقاگیری ژەنا و گلێرگەی مسۆگەر بکەرۆنە و بپارێزنۆنە.