شەنگالنە بە دروشموو 'دژوو قڕکەردەی ژەنا بە بە دەنگوو وێپارێزنای' کامپینێوە ئەرەیاونیا. تاژێ داواش وەنەو گردوو ژەنا کەردە کرد پێوە دژوو سیاسەتوو قڕکەردەی ژەنا دەنگ بەرز کەراوە و ڕێکوستەی قەوەت کەرا.
٨وو ئاداری ڕۆو جیهانیی ژەنە خەباتکاران، تەڤگەروو ئازادیی ژەناو ئێزیدی (تاژێ) کامپینێوە تازەش دەس پەنە کەرد. کامپینەکە بە ئەرەیاوناێوە دەسش پەنە کەرد.
ئەرەیاونایەکە پێسنەنە:
"پێسە تەڤگەروو ئازادیی ژەناو ئێزیدی (تاژێ)ێ، سڵام و ڕێزما پەی گردوو ژەنە شۆڕشگێڵنا کیانمێ. پەی گردوو ئا ژەنا کە دژوو تندوتیژیی جەستەیی و فیکری ئەرەپڕێنێ. پەی گردوو ئا ژەنا پەی ئازادیی وێشا ڕێک وستەن. ئیساتێنە جەنگ و دڕندایەتیی دژە ئینسانی کریۆ. ئێمەی ژەنێ ڕووبەڕووێ دەسدرێژی، ورەتەی بیێنمێوە. وەڵات و سروشتما وێران کریان.
وەراوەروو هەر هجوومێوەنە، مدرامان و هێزما ڕۆ بەڕۆ فرەتەر بۆ. ئینە هومێد و هێزما پەنە بەخشۆ، چونکوم گرد یاگێوەنە ئازار و مدرامانوو ئێمە یەک چێوا. ساڵەو ٢٠٢٤ پەی ئێمەی ژەناو ئێزیدی ساڵێوە تایبەتەنە. ١٠ەمین ساڵوەگێڵوو جینۆسایدوو ئێزیدییەکا، کە چەتەکاو داعشی کەرد. جە ٣/٨/٢٠١٤دا بە دەیان هەزار ئێزیدیێ کوشیێ و گیریێ و کریێ بە کۆیلێ. داعش زارۆڵاو ئێزیدییا ناچار کەرێ بابە سوپاو زارۆڵا. هەرپاسە بە سەدان هەزار ئێزیدیێ کۆچشا کەرد. بەڵام بە سەدان بنەیانێ ئێزیدیێ سەروو لووتەو کەشوو شەنگالیوە مەنێوە و خاکوو وێشا جیا ناست و دژوو داعشی گژیێ. پەی ڕزگارکەردەی شەنگالی گژیێ و هێزوو پارێزنای یەکینەکاو مدرامانوو شەنگال (یەبەشە) و یەکینەکاو ژەنا شەنگالی (یەژەشە)یشا مەزنێە. بێگومان گردوو کۆکوشی و فەرمانێوەنە ژەنی فرەتەرین قوربانیشا دان.
ڕاو کوشتەی ژەناوە ئامانجشا ئانەنە کە شناسنامە، چاند و باوەڕداریی گلێرگەی دلێنە بەرا.جە فەرمانەو ٢٠١٤ینە ژەناو ئێزیدی ڕووبەڕووێ دەسدرێژی و بە کۆیلەکەردەی بیێوە بازاڕەکانە ورەشیێوە و بەزۆر کریێ بە هامسەرێ چەتەکاو داعشی. تا ئیساتێچ ٢ هەزارێ و ٩٤١ ئێزیدیی ئینێ لاو داعشیوە، فرێچشا ژەنی و زارۆڵێنێ. ئی هجووم و جینۆسایدێ دژوو شەنگالینە برینێوە فرە قووڵا دڵمانە. ئی ژەنە ئێزیدیێ ڕووبەڕووێ دەسدرێژی و کۆیلەکەرەی بیێوە بازاڕەکانە ورەشیێوە و بە زۆر کریێ بە هامسەرێ چەتەکاو داعشی. تا ئیساتێ٢ هەزارێ و ٩٤١ ئێزیدیێ ئینێ دەسوو داعشیوە، ئی هجووم و جینۆسایدێ دژوو شەنگالی برینێوە قووڵێنێ دڵمانە. ئی هجوومێ سیستموو پیاسالاری بێنێ دژوو گردوو ژەناو جیهانی. ئانەی بە ڕاس مەوینا، کە تا ئارۆ داعش و هامکارەکێش دەوڵەتوو تورکی، پەدەکە کە ئی جینۆسایدەشا کەرد دادگایی نەکریێنێ دادگای میاننەتەوەیینە. وەروو ئینەیە ماچا هجوومی سیستماتیک دژوو شەنگالینە هەر بەردەواما. جە ٣/٨/٢٠١٤ینە پارێزنای شەنگالی جە گەردەنوو پەدەکەینە بێ، بەڵام بە دەسپەنەکەردەی هجوموو داعشی ١٢ هەزار پێشمەرگێ پەدەکەی بێ ئانەیە یەک فیشەک تەقنا ڕەمێ و شەنگالشا دا دەسوو داعشیوە.
دە ساڵێ ملوو فەرمانەو جینۆسایدیرە ویەرۆ، هەڵای هجووم سەروو سەرچەمەکاو ئێمە بەردواما. دەوڵەتوو تورکی بە هامکاریی پەدەکەی هجوومەکا کەرۆ. ساڵەو ٢٠١٧یۆ بە دەیان کناچێ و کوڕێ ئێزیدیێ بیێ بە قوربانیی ئی هجووما. هەرپاسە دەوڵەتوو عێراقی و پەدەکە هەوڵێ مدا جە ڕاو ڕێککەوتەینامەو ٩ تشرینوو یوەمیوە ئیدارە و ڕێکوستەیما دلێنە بەرا. پەی گرد گەلێوە چەوسیاوەی و بندەسی مافوو پارێزنای وێش هەن دژوو جینۆسایدی. سەروو ئی بنەمێوە ماچمێ، شەنگالنە پارێزنای جڤاکی و ژەناو ئێزدی، یەبەشە و یەژەشە و ئاسایشوو ئێزیدخانی، ئینە مافێوە ڕەوان.
داواو بەرزکەردەی کۆشیایشا کەرد
پێسە تاژێ و یەژەشەی، دژوو نەتەوەپەرسی، ئاینپەرسی و بەتایبەت دژوو زایەندپەرسی کۆشیا و تا جارێوە تەر جینۆساید دژوو ژنا، گلێرگەی ڕووە نەدۆوە. بە ئەرەمەرزنای دیموکراسی، ئازادی و ئاشتی. پێوە دژوو قڕکەردەی ژەنا و پەی پارێزنای وێما داواو بڵندکەردەی کۆشیای کەرمێ.
داواو کامپینەکەی:
داوایەکاو ئێمە ئینێنێ:
١-قڕکەردەی ژەنێ تاوانوو جەنگین و بە قڕکەردەی ژەنا بشناسیۆ، گردوو تاوانبارا و هامکارەکاشا دادگایێ کریا.
٢-مافوو ژەنا پەی پارێزنای ژیوای وێشا و نیشتمان و کولتووروو وێشا لاو گردوو گلێرگەی و ئەرەمەرزیایەکاوە بشناسیۆ.
٣-فەرمانەو ٣/٨/٢٠١٤ کە لاو چەتەکاو داعشیوە کریا بشناسیۆ، گردوو تاوانبارا و هامکارەکاشا پێسە داعش، پەدەکە، دەوڵەتوو تورک، دەوڵەتوو عێراقی دادگایێ کریا.
٤-ئیرادەو گلێرگەو شەنگالی، ڕاوەبەریی وێمانە، یەبەشە، یەژەشە و ئاسایشوو ئێزیدخانی ددانشا بنریۆ پۆرە و بشناسییا.
٥- گردوو هجوومەکاو سەروو شەنگالی، بە تایبەت هجوومە عاسمانییەکاو دەوڵەتوو تورکی دماییشا پەنە بێ.
ئی هەنگامێ، ٣/٨/٢٠٢٤ دەس پەنە کەرۆ، تا ٣/٨/٢٠٢٤ دەیەمین ساڵوەگێڵوو کۆکوشییەکەو شەنگالی بەردەوام بۆ. دەنگ، ئیمزا و بەشداریی ژەنێ و ڕێکوستەیەکاو ژەنا کوێ کەرمێوە و داوا جە گردوود ژەناو جیهانی کەرمێ: بەیدێ بە ڕوحوو ژەنێ، ژیوای، ئازادییوە دەنگما کەرمێ بە یۆ و دژوو قڕکەردەی ژەنێ، وێپارێزنایما بەرزتەر کەرمێ. داوکارێنمێ تاوانباراو قڕکەردەی ژەنا شەنگالنە و حەریاگێونە کە ژەنێش چەنە کوشیا، دادگایێ کریا."
