هامسەرۆکەو دەسەو پەروەردەو هەرێموو جزیرەی گوڵستان ئیسماعیل-ە ئەرەیاۋناش، کە سەرەڕاو هجومەکاو دەوڵەتوو تورکی پەروەردەی فرەزووانی بەردەواما و واتش، "جە هەرێموو جزیرەی ٢٠٠ هەزار زارۊڵۍ چېروو هجومەکا دەوڵەتوو تورکینە بە کوردی، عەرەبی و سوریانی پەروەردە موینا"
لە هەرێمی جزیرە ١٦ هەزار مامۆستا لە هەزار و ٧٨٢ خوێندنگەی قۆناغە جیاجیاکان، نزیکەی ٢٠٠ هەزار خوێندکار پەروەردە دەکەن.
هامسەرۆکەو دەسەو پەروەردەو هەرێموو جزیرەی گوڵستان ئیسماعیل-ە جەبارەو ئاژەو پەروەردەی و کاریگەریی هجومەکاو دەوڵەتوو تورکیۆ قسېش کەردۍ و ئەرەیاۋناش، کە یووەمین هەنگامەی بنچینەییەو ئاخېزوو وەرنیشتی بریتی بیەن جە ئاخېزوو زووانی و چا ڕوانگۆ ئەرەیاۋناش، "جە سەرەتانە دەزگاو زووانی کوردی دەوری ئەساسیش گێڵنا و ژمارېوە فرە مامۆسۍ زووانی کوردیش پەروەردەکەردۍ. ئا مامۆسۍ خولوو پەروەردەی کوردیشا تەمام کەرڎ، ڕووانەو وەننگەکا کریۍ. جە سەرەتانە تەنیا چن سەعاتېوە پەروەردە بە زووانی کوردی دریۍ، تا ئا وەختە پرۆگراموو ۋەنای و کتێبۍ ئاماڎۍ نەکریېبێنۍ، بەڵام دماتەر پرۆگرام و کتێبۍ پۍ گرڎوو قۆناغەکا ئاماڎۍکریۍ".
بە یەرۍ زووانۍ دەرز وچیۊوە
جە درێژەو قسەکاشەنەگوڵستان ئیسماعیل-ە ئاماژەش پانەی کەرڎ کە تەماموو دەرز و پرۆگرامەکا ۋەنای بە یەرۍ زووانۍ کوردی، عەرەبی و سوریانی ئاماڎۍ کریېنۍ و پا یەرە زووانەیە دەرز وچیۊوە، واتە زارۊڵۍ کوردی گردوو دەرزەکاشا بە زووان و ۋېشا و بەهەمان شێوەیچ زارۆڵۍ عەرەبی و سوریانیچ بە زووانوو ۋېشا دەرزەکاشا مووانا. حەرپاسە جە پۆلوو چواریۆ زاڕۊڵۍ کوردی فێروو زووانی عەرەبی و زارۊڵۍ عەرەبیچ فێروو زووانی کوردی کریا و زارۊڵۍ سوریانیېچ بە شێوېوە ئارەزومەندانە زووانێوە هۊرچنا. بە گرڎی زارۊڵۍ بە پاو ئا زووانەی کە وېشا حەزش پنەکەرا، پەروەردە کریا. پۍ حەر زووانێوە وەننگەی جیا و تایبەت بیەیش نییا. جە حەر وەننگېوەنە حەر کەسۍ بە زووانوو ۋېش جە پۆلی جیاجیانە مووانۆ".
دەوڵەتوو تورکی ناوەندەکاو ۋەنای کەرۆ ئامانج
گوڵستان ئیسماعیل ئانەش ویرئارڎۆ کە گەمارۆ و هجومەکۍ کاریگەری نەرێنیشا کەرڎەن سەروو پرۆسەو ۋەنای و چا ڕوانگۆ زیاتەر واتش، "گەورەتەرین کێشەو ئێمە پېسە بنەیانەی و پېسە خۊنکارا و مامۆسایا، بریتیا جە هجومەکاو دەوڵەتوو تورکی پۍ سەروو هەرێمەکەی. ئا هجومۍ کاریگەری نەرێنی فرەشا کەرڎەن سەروو سیستموو پەروەردەی، بەتایبەتی کە دەوڵەتوو تورکی جە هجومەکاشەنە بیناسازی مەدەنی و بە تایبەتی ناوەندەکاو پەروەردەی و وەنای کەرۆ ئامانج. ئا هجومۍ کاریگەری دەرونی خراپ سەروو زارۊڵاوە منیۊرە و با بە مەڵامەتوو ئانەی جە وەنای بڕیارە. بە تایبەتی چا مەنتیقانە کە نزیک بە سنوورینۍ زارۊڵۍ پۍ ماوېوە فرەی جە وەنای بڕیارە. چونکی بەردەوام زارۊڵۍ ئینۍ تەرسی و دڵە تەپېنە بە ماڵامەتوو هجومەکاو دەوڵەتوو تورکیوە و جە ئیسەیچەنە بە هەزاران زارۆڵۍ بە مەڵامەتوو ئا هجوماوە جە وەنای بێ بەش کریېنۍ".
جەختیچش کەردۆ، کە "هجومەکۍ جە وەختوو وەناینە ئەنجام مڎریا و پا مەڵامەتیچۆ زارۊڵۍ جە وەنای دوورۍ گناوە. ئینە جیا چانەی بەمەڵامەتوو ئا هجووماوە، بیناو بەشێوە جە وەننگەی و ناوەندەکاو وەنای بە تەمامەتی وڕېنۍ. پېسە دەسەو پەروەردەی و مامۆسایا حۊڵ مدەیمۍ کەمێوە چا بارگرانیەو سەروو خۊنکارا کەمکەرمېوە و تا حەدېوە ئاسەواری نەرێنی هجوومەکا سەروو ئاڎیشاوە کەم کەرمۍ، بەڵام حەرچیېوەیچ کەرمۍ مەتاومۍ بە تەمامەتی ڕا جە کاریگەر بیەو زارۊڵا چا ئاژەیە گېرمۍ".
پەروەردە سەروو بنەماو نەتەوەی دیموکراتیکیا
گوڵستان ئیسماعیل-ە واتش، "ئا سیستموو پەروەردەیە کە چېروو چەترەو ئیدارەو ۋېڕاوەبەرینە خوڵقیان سەروو بنەماو سیستموو نەتەوەی دیموکراتیکی ئەرەمەرزیان، حەر پۊکەی دەوڵەتوو تورکی وەڵۍ گرڎ چېوېنە ئەرەمەرزیا پەروەردەییەکا کەرۆنە ئامانج. بەڵام هەم ڕاوەبەرا وەننگەکا و هەم ئیدارەو ۋېڕاوەبەری گرڎوو دەرفەت و سەلیقەیشا وستەن خزمەتوو کەرتوو پەروەردەی، سەرباروو ئانەیچ مەتاومۍ واچمۍ کە گرڎوو دژواریەکاما ویەرنېنۍ. بەتایبەتی ئا زارۊڵۍ کە جە کەمپەکانە مژیوا کێشە و گرفتەکېشا چی ڕوۆ دووۍ ئنڎەو زارۊڵەکا تەرینۍ، حەرچنڎە حۊڵەکېشا پۍ کەمکەردەیۆ کێشەکاشا چڕ کریېنۍ، بەڵام ۋېش جە ۋېشەنە ژیۋای دلۍ کەمپینە دژوارا".
