نوعمان کورتوڵموش سەرۆکو پەرلەمانو تورکیای جە چوارچێوەو چالاکیەکا ١٩و ئایارینە سەبارەت بە پرۆسەو چارەسەریی پەرسە و کوردی قسێش کەردێ و جەختش جە چارەسەری پێوەرەی پەی تورکیای کەردۆ.
جە چوارچێوەە چالاکییەکا ١٩و ئایارینە جە پەرلەمانە تورکیاینە بەرنامێوە لواڕاوە. سەرۆکو پەرلەمانی نوعمان کورتوڵموش جە چالاکییەکەنە قسێش کەردێ و ئەرەیاوناش: "زیاتەر جە ٤٠ هەزار کەسێ جە جەنگەنە گیانشا جەدەسدان. چنی تورکی و کوردی و گرڏ و نەتەوە جیاوازەکاما، پێسە و تورکیای پێوەرە درێژە بە هەوڵەکاما مڏەیمێ و پێوەرە تورکیایێ بەهێزی بنیات منییەیمێ."
دووێ ڕێما ئینێ وەڵێنێ
کورتوڵموش دەسنیشانش کەرد دماو دەسوەردای ئەمریکای جە عێراقی وردە وردە تەمامو وڵاتەکا هەرێمەکەی بەرەو پارچەبییەی لوا و واتش: "دماو ئا دەسوەردایە فرە و وڵاتەکا رووبەڕوو پارچەبییەیۆ بییوە و کەوتێ دلێ پرۆسەو هورشانایۆ، ئیسەیچ ئێمە دووێ ڕێما ئینێ وەردەمەنە یان پارچەبییەی یان پێوەرە بییەی."
کورتوڵموش جە بەردەوامینە واتش: "عێراق و سوریا پارچە بیێ، هەرپاسە لوبنان مەتاوۆنە پێسە و وەڵێ حوکمڕانی کەرۆنە، لیبیا، سودان، سۆماڵ گرڏ پارچە بیێ، گرڏ و ئا وڵاتا سەر و بنەماو جیاوازی نەتەوەیی یان پێکئامای و ئایینی دابەشێ بیێ، بڕێشا جەلایەنو ڕێکوزیا تیرۆریستییەکاوە پارچە بیێ، یان ئێمەچ پێسە و گایەوە زەردی چەمەڕاو ئانەی بیمێ سەرەما یاوۆنە و پارچە بیمێ، یان پێسە و گەلوو تورکی و کوردی و گرڏ لایێ جە دەورو یۆی گلێرێ بیمێوە و ئی پڕۆژە ئیمپریالیستە تێکمشۆ. ئێمە ئی ڕاو دووەمەیە ژپهورچنمێ و سەرو ئی ڕێ بەرەو وەڵێ ملمێ."
ئێمە دژو هەر جۆرە هاندانێ و ئاژاوەگێڵیێ ڕاوشۆنێ پەنەوازما گێرتەن وەر
کورتوڵموش ئانەش دەسنیشان کەرد تورکیا ڕای پەنەوازە و گرنگەش گێرتێنەرە وەر و واتش: " ئامانج و داواو ئێمە ئانەن کە بە زووترین کات ئی ڕێ یاونمێ ئەنجام و پێوەرە بە واڵە-برایەتی درێژە بە ڕێکێ وێما دەیمێ. بێگومان بڕێ کەسێ ماچانە با ئی بابەتە سەرنەگنۆنە، تەرسانە و بڕێ جە لایەنە جیاوازەکا هەوڵ مڏانە ئی پرۆسەیە هورشاناوە و ڕاگیری جە پرۆسەکەی بکەرا. بەڵام ئێمەچ چی چوارچێوەنە گرڏ ڕێوەما گێرتێنەرە وەر. هیوادارێنمێ ئی پرۆسەیپ بە زووترین کات یاوۆنە ئەنجام."
