گەشمەرڎۍ گوڤەن دۆزا (جانسەل دورسون)ە جە بنەیانێوە ئاگرینە جە کۆجاعەلی جە ئەڎۍ بیێنە. گوڤەن دۆزا پێسە گەنجێوە جە ئامانجەکەیشەنە یەکلاییە بۍ، سەردەموو زانشتگەیشەنە جمیەروو ئازاڎیش ئشناسا. گوڤەنە جە فرەو مەجالەکا کۊشیاینە بەشداریش کەردەن، ساڵەو ٢٠١٦ بە متمانێوە فرۆ پەیوەندیش بە ڕیزەکاو گەریلایۆ کەرد. پێسە ژەنە جەنگاوەرێوە دەوری سەرمەشقش جە جەنگەکانە وینا و چالاکیش ئەنجامدان و گورزەی قورسەش ۋنەو دوژمنی شانێنە. گەشمەرڎە گوڤەنە، دماو ئەزموونە گەریلاییەکاش جە زاگرۆسەنە، ساڵەو ٢٠١٧ ملۆ دلۍ هێزی تایبەتی.

گەریلا گوڤەنە کە بە هەرمانە سەرکۊتەکاش سەرمەشقایەتی گرڎوو هەڤاڵەکاش جە هێزی تایبەتینە کەرد، شۊن پاو زیلانەکا و سەمایاش هۊرگێرت. درێژەش بە گێڵای ۋێش دا پۍ ئانەی عالتەر جە فەلسەفەو ڕابەر ئاپۆی بیاوۆنە و کەرۆش بە بنەماو ژیۋای ۋێش. گوڤەنە گرڎ ڕووۍ بە هەڵوێسی سەروازی و ئایدۆلۆجیاو ۋێش پەرەش بە وەڵێکۊتەیەکاش دا، بە تایبەتیچ سەروو خەتەو ئازاڎیی ژەنۍ، بیە بە گەریلایۍ نمونەییەو یەژا ستاری. گەریلا گوڤەن دۆزا جە مانگەو تەمموزوو ٢٠٢٢ ێنە چنی هەڤاڵێوەش بە نامۍ ڤۆرین قەساسە وەلات (راکپ کوشلو)ۍ پەیوەسە بیە بە قافڵەو گەشمەرڎاوە.

پەنەوازەن گەلەکەما بزانا وڵاتەکەما چنی ئەرەگیرکریان

گەریلا گوڤەن دۆزا وەڵۍ گەشمەرڎەبیەیش، ویروڕاو ۋێش سەبارەڎ بە ڕابەر ئاپۆی و پەکەکەی جە یاداشتنامەکاشەنە پێسە گوزارشت کەردەن: "وەختۍ پەیوەندیم بە جمیەری ئازاڎییوە کەرد، سەرنجم سەروو ئشناساو ڕابەر ئاپۆی و فەلسەفەکەیش بۍ جە نزیکۆ. سەرۆک چێشش جە ئێمە گەرەکا، چێشش جە گەلی و گەنجا گەرەکا؟ ئامانجەکێم هەمیشە جوابدایۆ ئا پرسیارا و بەشداریکەردەی بۍ بە شێوێوە دروس. حەرپاسە پێویس بۍ جە ماناو هەڤاڵیەتی چنی هەڤاڵام بیاوونە. چێوۍ کە سەرەتا گەرەکم بۍ فێرش بوو ئینەبۍ؛ پۍ ئانەی بیاوو بە ئامانجەکام، ئشیۍ لوێنا دلۍ هێزی تایبەتیوە.

ئینسان دلۍ هێزە تایبەتەکانە زیاتەر بە ڕۆحی ئاپۆییوە مژیوۆ. بە مەعنێوەتەر ئینە ئا شۊنێنە کە ئامانجەکاو ڕابەرایەتیش چنە بەدی مۍ. پۊکاتی یاوانینە کە ئینە ئا یاگێنە کە من شۊنیشەرە گێڵێنا. چێوە هەنگامەکێم پۍ ئانەی بوو بە کەسێوە شۆڕشگێڵنۍ نیۍ. دەرفەتێوە بۍ پۍ من کە عالتەر ۋێم، گەلەکەم و وڵاتەکەیم بشناسوو. پێویسا هەر یۆ جە ئێمە ئا دڕندەیۍ کە جە خاک و وڵاتەکەمانە کریا بشناسۆ و بتاومۍ سەروو بنەماو ئا ڕاسییە هەنگامەی شۆڕشگێڵنانۍ بنیا. تەنیا ئا وەختە متاومۍ جوابوو هجووم و ئەرەگیریەکا دوژمنی بڎەیمێوە. پۍ ئانەی دوژمنەکەیت بشناسی فرە گرنگا بزانی وڵاتەکەت چنی ئەرەگیرکریان. ئانۍ کە دوژمنوو ۋێشا مەشناسا مەتاوا وەڵۍ جە ئەرەگیری گێرا و دژوو ئەرەگیری جەنگ بکەرا. جە خەتەی فیدایۍ یاوانینە کە پێویسا چێش پۍ گەلوو کوردی کەرمۍ. ئیتر یاوانینە ئەرکوو منا کە بە دروسی چی ڕاسییە بیاوونە و چەمەڕایی ملوێنان کەسا جە ئێمەن چا مەجالەنە کۊشیای ۋەرفراوان کەرمۍ.

پی بۆنۆ کۊشیای و هەرمانکەردەی پێویسا. وەختۍ چی مژاریە یاوانینە، عالتەر تاوام جە ڕاسییەکا ڕابەر ئاپۆی بیاوونە و بە ئامانجەکام بیاوو. جە ۋەرا ۋەرمەنە ڕاسی سەرۆکایەتی بۍ، ئینەیچ ڕا بەئینسانی مڎۆ دەست بە گێڵایۍ فرە جددی بکەرۆ. هەرچەنڎە من پێسە گرڎ کەسێوە جوابوو پرۆسەکەیم نەڎاوە، بەڵام ڕۆ دماو ڕۊی هەستوو تۆڵە ئەسایم جە دوژمنی پەرەش سانا. پۍ من لووای و بەردەوام بیەیم سەروو خەتەو فیدایی بیەی پا مەعنێنە کە گورزەی قورستەرە جە دوژمنی مڎریۆ. پێویسا بە هەستوو تۆڵە ئەسایۆ جە دوژمنی نزیکۍ بیمێوە. پۍ ئانەی دوژمنەکاما ماڕمۍ، مشۊم جە گرڎ ڕووێوە ۋێما وەڵۍ وزمۍ. "پۊکاتی گرڎوو حۊڵەکام پۍ وەڵێکۊتەی وێمەنۍ جە مێڎانی سەروازینە و گورزە شاناینە جە دوژمنی."