ئارۆ دماو ئانەی جە لایەنو کاربەدەسا ئاینی دروزییوە داوا جە چەکڎارە دروزییەکا کریا گرڎو چالاکییە سەروازییەکاشا مردنا و ۋێشا تەسلمو هێزە ئەمنییەکا حکومەتو دیمەشقی بکەرا. هێزە ئەمنییەکې دیمەشقی یاوې دلې شارو سوەیدای.

سەرەڕاو ڕێککەوتەی وەڵێوەختەی جارێوەتەر جەنگ جە ما بەینو چەکڎارا دروزی و هێزە ئەمنییەکا سەر بە دیمەشقی قۆمیاوە. بە گوێرەو ئاژانسو سانای کە زمانحاڵی فەرمی حکومەتیا، هەر ئارۆ ئیسرائیل بە هرووژمی ئاسمانی چن یاگێوە شارەکەیش کەرڎەن ئامانج.

وەزیرو وەرگیری سووریای، مەرهەڤ ئەبو قەسرە، سەرو پەلیانەو ئێکسیۆ پېوەس بە پشێویەکا پەیامێوەش وەڵا کەرڎۆ.

قەسرە جە پەیامەکەشەنە ماچۆ: "دماو گلېرۆبیەیما چنی ڕیش چەرما شارەکەی، ئایېربەسی تەمامەتیما جە سوەیدانە ئەرەیاۋنا."، بەڵام دیار نییا ماوەو ئایېربەسەکەی چن خواینۆ.