هامسەرۊکوو پژاکی "سیامەند موعینی" ئەرەیاوناش: شۊڕشوو ژەنی، ژیوای، ئازاڎی نەکوشیانۊ و درێژەش هەن ئەرەیاونایچش، پژاک هیچ مەنشوورێوە کە بنەماو ناوەنگەرایی و لاڕارەبەرڎەی تایبەتمەندییەکاو ئی شۊڕشی بۊ قبووڵش مەکەرۊ.
بۊنەو ٤وو نیسانی (١٥ی خاکەلێوە) ڕۊو پەیدابییەی ڕابەروو گەلوو کوردی "عەبدوڵا ئۊجالان" و ساڵڕۊو ئەرەمەرزنای پارتوو ژیوای ئازاڎوو کورڎستانی (پژاک)یوە، بە ئاماڎەبییەی هامسەرۊکوو پژاکی "سیامەند موعینی" شاروو یۊتێبۊریی سوید-ینە ڕاوڕەسمێوە ساز کریا.
ڕاوڕەسمەکە بە مرڎای یەک دەیەقە بێدەنگی پەی ڕێزگێرتەی جە یادوو ڕاو گەشمەرڎاو ڕاو ڕزگاریی کورڎسانی بەتایبەتی گەشمەرڎاو ئی دماییەو شۊڕشوو ژەنی، ژیوای، ئازاڎی دەسش پەنە کەرد. دمای خێرامای لایەنە سیاسییەکا، ڕێکوزیا مەدەنییەکۍ و کەسایەتییەکاو بەشڎارا جە کۊڕەکێنە، لاو کۊمیتەو پژاکیوە بەشوو یووەموو بەرنامەکەینە چنڎین بەرهەمۍ هونەریۍ بۊ بەرزئرمانای ٤وو نیسانی و یادوو گەشمەرڎا، لاو هونەرمەندا "فەریبورز"ی و "شاپور"یوە پێشکەش کریا.
جە درێژەو بەرنامەکەینە هامسەرۊکوو پژاکی بە ڕۊشنایی وستەی سەروو ڕۊو ٤وو نیسانی، ئی ڕوەشە پێسە ورچەرخنایۍ تاریخی جە بواروو سیاسی، کۊمەڵایەتی و فەلسەفینە دەسنیشان کەرد. هامسەرۊکوو پژاکی جە بەشوو یووەموو قسەکاشنە شرۊڤەو ئەگەرەکاو ئایندەو شۊرشوو ژەنی، ژیوای، ئازاڎی-یش کەرد، هامسەرۊکوو پژاکی ئی شۊڕششە پێسە ڕێنسانسێوە زهنیەتی و کۊمەڵایەتی باس کەرد، کە تا ئیساتۍ تاوانش فاڕیایۍ چا بوارانەدا وەش کەرۊ، هاموەخت باسوو ئا تەرسێشە کەرڎە، کە ئەگەر بەرەی چەپ و ئازاڎیواز وریۍ نەبا ئی شۊڕشە حەوڵۍ دەسملەرەگێرتەیش لاو بەرەی ڕاسوو سەر بە ڕەوتوو پاشایەتیوە دریۊ. حەرپاسە جە درێژەو شرۊڤەو ئی تەوەرەینە هامسەرۊکوو پژاکی واتش ئیشۊرشە نەکوشیانۊ و حە رگڕۊ ، گرڎوەختێوە ئیمکانوو ئانەیە هەن، کە خەڵکوو ئێرانی بەقووەتتەر جە چنڎ مانگی ویەرڎەی مجیارە سەروو جادەکا، ئی شۊرشە حەتا ماڕای کۊماری ئەرەگیر و دیکتاتۊروو ئێرانی درێژەش بۊ. هامسەرۊکوو پژاکی ئاماژەش پانەیە دا، کە ڕژیموو ئێرانی پێسە دەسەڵاتی و دەوڵەتی تەنیا نامەکێش و هێزێوە تۊتالیتری مەنەن، جە لایە ئابووری، سیاسی، کۊمەڵایەتییەکەوە و شەرعیەتش نەمەنەن ، چێولای کۊماری ئیسلامی ئا هێزە نییا، کە باوڕ بە دلێنەشییەیش مەحاڵ بۊ.
هامسەرۊکوو پژاکی جە درێژەو شرۊڤەکاشنە باسوو گرنگیی پێکئارڎەی هامپەیمانی یان بەرێوە کورڎسانیش چەنی حیزبە سیاسییەکاو وەرکەوتوو کورڎسانی کەرد. هامسەرۊکوو پژاکی، ئانەی فرە بە گرینگ زانۍ، کە مشۊم پێک بۍ، چی قۊناغەنە وەروو ئانەی کورد بتاوۊ مافەکاش ئایندەو ئێرانینە دەستەبەرۍ کەرۊ، ئاماژەیچش پانەیە دا کە پێسە پژاکی سەروو دووۍ خاڵە گرنگاوە جە مەیڎانوو کورڎسان و ئێرانینە هەرمانە کەرا. یووەمم: هەرمانە پەی پێکئارڎەی پێکهێنانی بەرێوە کورڎسانی، دووەم؛ وەشکەرڎەی یۊبییەی و هامپەیمانیی گەلە ستەموەنەکریایا ئێراننە.
بەشێوە تەروو قسەکاشنە هامسەرۊکوو پژاکی ئاماژەش پانەیە دا، کە پژاک هیچ مەنشوورێوە، کە بنەماو ناوەنگەرایی و لاڕارەبەرڎەی تایبەتمەندییەکاو ئی شۊڕشییە بێت قبووڵۍ مەکەرۊ، پەوکای حیچ لایەن و هێزێوەیچ حەرچەندۍ ئیمکانوو ئەرەیاونای و دیپلۊماسی جبەرۊ بۊ، مەتاوۊ داواکاری و ڕاسییەکاو گەلاو ئێرانی نەوینۊ. دمادمایی قسەکاشنە هامسەرۊکوو پژاکی "سیامەند موعینی" چنڎین کەسۍ جە بەشڎاربییا جە دیالۊگێوە کریاوەنە، ڕا و پەیلوای وێشا جە چوارچووەو ڕەخنەی و وەڵێوینای و سەرنجێنە پەی ئی بارودۊخە و پژاکی وست ڕووە.
س.ز
