جە شاروو کەرکووکیینە، بە پەشتبەستەی بە بەڵگە تاریخییەکا سیمینارێوە دەربارەو ئشناسنامه‌ی نه‌فاڕیا و چه‌سپیاو شاروو كه‌ركووكی، پێسە دێرینە شارێوە كورڎسانی پێشکەش کریا.
وێرەگاو هیزی، جە کتێبخانەوی کارێزی جە گەڕەکەو بارودخانەو شاروو کەرکووکوو پانیشتوو کورڎسانینە، به ئاماده‌بییەی ژمارەێوە کەسایەتییا جە نویسەر، ڕۊنامەوان، چالاک و کەسایەتیی رۊشنویرۍ شاروو کەرکووکی، بە ئامانجوو پەشتیوانی جە ئشناسنامه‌ی نه‌فاڕیا و چه‌سپیاو شارووكه‌ركووكی، پێسە دێرینە شارێوە كورڎسانی، سیمینارێوە بە ناموونیشانوو(تاریخوو كه‌ركووكی جه ئەوەڵوو سه‌ده‌و نۊزده‌یەمیوە تا بۊ به به‌شێوە جه عێراقی پاشایه‌تی جه ساڵەو ١٩٢٥ینە) پێشەکەش کریا،
سیمینارەکە لاو پڕۊفیسۊری یاریده‌یده‌ر د. ڕه‌سووڵ محه‌مه‌د ڕه‌سووڵ خه‌لیفانی، مامۊساو به‌شوو تاریخی جه كولیەو ئه‌ده‌بیاتوو زانكۊو سۊرانیوە پێشکەش بە ئامادەبییا کریا.
دكتۊر ڕه‌سووڵ خه‌لیفانی چا كۊڕه زانستیێنە، به زوانوو به‌ڵگه‌ناما جە باره‌و زیادتەر جه یه‌ك سه‌ده جه تاریخوو كه‌ركووكیوە دوا، جە ڕاو شاشه‌یۊ به‌ڵگه‌نامه تاریخییەکێش وستۍ وەروو دیده‌و مێماناو كۊڕه‌كۍ.
دماو پێشکەشکەرڎەی سیمینارەکەی ڕاو گفتوگۊی کریاوە و پەی بەشداریکەرڎەی ئامادەبییاو کۊڕەکۍ، پەی یاونای حەر پرسیار و سەرنج و تێبینی (چەنەوینایێ) سەروو بابەتوو سیمینارەکەی، پاسە سیمینارەکە دماییش ئاما.
سەبارەت بە سیمینارەکەی، پڕۊفیسۊری یاریده‌یده‌ر د. ڕه‌سووڵ خه‌لیفانی پەی ئاژانسوو هەواڵوو فوراتی واتش: "ئارۊ چی سیمینارەنە باسما جە تاریخوو شاروو کەرکووکی کەرد، جە ئەوەڵوو سەڎەو ١٩یۊ تا بۊ بە بەشێوە جە عێراقی جە ساڵەو ١٩٢٥ینە، باسما جە کورڎستانیبییەی کەرکووکی کەرد بە پاو دۊکیومێنت و بەڵگەنامە ئەورووپیەکا پێسە بەڵگەنامەکاو بەریتانیای، کە گرڎوو بەڵگەنامەکا ئانەیەسەلەمنا کە کەرکووک شارێوە کورڎسانی بییەن تا بۊ بە بەشێوە جە عێراقی جە ساڵەو ١٩٢٥ینە وەختۍ، کە حەریۊ جە عێراقی و بەریتانیای و ڎەوڵەتوو تورکیای کەمالی، ملەملانۍ ئەرەگیریییەکاشا یەکلایی کەراوە سەروو ویلایەتوو موسڵی".
حەر سەبارەت بە بەڵگەنامەکا کە جە سیمینارەکە پێشکەشۍ کریۍ، د. ڕه‌سووڵ خه‌لیفانی، پەی ئاژانسوو هەواڵوو فوراتی ئاشکراش کەرد: "ئا بەڵگەنامۍ کە وستێم ڕووە جە سیمینارەکەنە، کە پێک ئامێبێنۍ جە نویستەی و نەخشەی تاریخی، بەتایبەتی نەخشە ئەورووپییە تاریخییەکا، کە شاروو کەرکووکی جە چوارچوەو پانیشتووکورڎسانینە بییەن، چا نەخشە تاریخییانە سەلەمیۊ، کە شاروو کەرکووکی شارێوە کورڎسانیی دێرینا، بە هەمان شکڵ جە نویسیایەکانە فرە نامۍ کورڎسانیشا ئارڎێنە و کەرکووکیچ بەشێوە بییەن چا نامەئارڎەیەو کورڎسانی".
س.ز
