گەریلاوهەپەگەی ئازاڎ تۆڵهەڵدان یاڎو زەینەب کناجی-ش کەرڎۊ کە بە مەڵامەتو چالاکییە گیانبازییەکەیشۊ بیېنە بە ڕەمز و چا بارۊ ئەرەیاۋناش، "چالاکیەکەش بە ئیراڎە و بڕوا و پا گیریۍ گۊرۊ ئەنجامدا، ئێمەیچ جە کەشەکا کورڎسانینە سەرو خەتەو گەشمەرڎە زیلانۍ کۊشش کەرمۍ".
گەریلاو هەپەگەی ئازاڎ تۆڵهەڵدان جە ساڵیاڎو گەشمەرڎەبیەو زیلانۍ (زیلان کناجی)نە یاڎو ئاڎېش بەرزڕاگرت و باسش جە کاریگەری چالاکییە گیانبازییەکەیش کەرڎ.
گەریلاو هەپەگەی ئازاڎ تۆڵهەڵدان باسش چانەی کەرڎ کە ساڵەو ١٩٩٦ ی دەوڵەتو تورکیای بە حۊڵو تیرۊرکەرڎەی جە دژوو رابەرو گەلوو کورڎی عەبدوڵا ئۆجالانی گەرەکش بۍ گەلوو کورڎی و جمیەری ئازاڎیی پاکتاو کەرۊ و ئانەش وست ڕووە کە زیلانە بە چالاکیەکا ۋېش شکسش بە هجومەکا دوژمنی ئاورڎ. ئازاڎ تۆڵهەڵدان ۋیرش ئارڎۊ کە جە دژوو ئا حۊلەو دوژمنی پۍ تیرۆرکەرڎەی، جە ٣٠ حوزەیرانو ١٩٩٦ی زیلانە جە دێرسیم چالاکی گیانبازیش کەرڎ و ۋاتش، "هەڤاڵە زیلانە چالاکیەکەش بە ئیراڎە، قەناعەت و پاگیری گۊرۊ ئەنجامدا. چالاکیەکەش کاریگەری گۊرەش کەرڎ سەرو دوژمنی. دوژمن تووشو شۆکی بی و جە ئاستێوە باڵانە شکسش ۋارڎ. حەرپاسە دلۍ جمیەرەکەیچمانە پاسەش کەرڎ کە خەتەو کۊشیای و مدرامانو رابەرایەتی سەرگنۊ.بە تایبەتی جە زاپ، ئاڤاشین و مەتینا هامڕېکێما کە جە کەشە سەرگەشەکا کورڎسانینە ئەرەکۊشا، سەرو خەتەو گیانبازی هەڤاڵە زیلانۍ ئەرەکۊشا.جە مېڎانەکا جەنگینە، هامڕېکێما سەرو خەتەو گەشمەرڎە زیلانۍ ۋېڕاگری کەرا. پېسە جەنگەوانا هەپەگەی و یەژاستاری ئێمە سەرو رێبازو هەڤاڵ عەگیدی، زیلانۍ، دەلال ئامەڎۍ ڕاکەرمۍ و کۊشیایما بە قەناعەتېۋە گۊرۊ حېقم کەرمۍ".
هـ . ش
