ڕێکوزتەو قەرسی دەم پارتی بە نامونیشانو "کاتو ڕێکوزتەیا" یوەمین کۆنگرەو نائاساییش ئەنجامدا.

کۆنگرەکەنە هامسەرۆکەو گرڏی دەم پارتی تولای حاتەم ئۆغۆللارە قسێش کەردە و سەرنجش وست سەرو سیاسەتەکێ قەیومی و جەختش کەردۆ جە نایاسایبییەو سەپناو قەیومی و واتش: "جە ئیسەنە ئاکەپە چێرو پەردەو یاساینە ئینا سەپناو قەیومینە." تولای ئاماژەش پانەیەدا بە گرڏ شێوێ جە دژو سەپناو قەیومی مڏرمێوە.

مشۆم ستاتۆیۆ گەلو کوردی قەبوڵکرینە

جە بەردەوامی قسەکاشەنە تولای ئاماژەش پانەیە کەرد بە پێشئامێکێ سووریای و جەختش چانەیە کەردۆ خواستو گەلا سووریای ئەرەمەزنارەو سیستەمێوە یەکسانی و دیموکراتیکا و واتش: "جە پرۆسەو ئەرەمەرزنارەو سووریای دیموکراتیکنە مشۆم گرنگی ئەوەکۆشای وەرنیشتوو کوردەسانی بە بنەما هۆرگیریۆنە. وەرنیشت مڏرامانێ گۆرەش نیشانەدا. مشۆم ستاتۆو گەلو کوردی دابین کریۆنە. داخەم مەشۆ تورکیا جە ڕاو سوپاو نیشتیمانی سووریا-SNAیۆ هرووژ پەی سەرو وەرنیشتی مکەرۆ."

'پرسو کوردی کاریگەری نەرێنیش سەرو گلێرگەی وەشکەردەن'

هەر جە قسەکاشەنە تولای ئاماژەش بە دیدارەکێ شاندو دەم پارتی چنی ڕابەر ئاپۆی کەرد و دەستنیشانشکەرد مەبۆ پرسو کوردی بە تەنیا پێسەو وەرپرسیارەتی ڕابەر ئاپۆی تەماشە کریۆنە و واتش: "جە پەیامەکاشەنە ئێژا ئۆجالان ئانەش وست ڕووە وەرپرسیارەتی قۆناغێوەن تەنیا جە ئەستۆو دەسەڵاتداریینە نییا بەڵکوم مشۆم ئۆپۆزسیۆنیچ بە ئەرکو وێش هوسۆنە. پرسو کوردی کاریگەری نەرێنیش سەرو گلێرگەو تورکیای نیانەرە و مشۆم پێوەرە ژیوای هامبەش بنیاد بنریۆ."

مشۆم مافو ئازادی و ئاسایشی دابینکریۆنە

جە دماینە تولای حاتەم ئۆغۆللارە واتش: "وەڵێ چارەسەریینە حیچ ئاستەنگیێ نییا، تەنیا مشۆم دۆڵەت چی بابەتەنە چنی ئیمراڵیی گنۆنە دیالۆگ و گفتوگۆوە و پەرە بە هێڵو ئیسەی دۆنە. گەر ئینە دەسش پنە کەرد ئانە گرڏو گەلو تورکیای و لایەنە سیاسییەکێ پەی ئی پرۆسەیە ئامادێنێ. ئینە دەرفەتێوە گۆرەی تاریخین پەی گردیما. ڕاسا دیدار ئینا ئارانە، بەڵام بینەی بە ماناو دمای ئامای بە گۆشەگیری نمێ. پەی خاستەر لواڕاوەو پرۆسەکەی مشۆم مافو ئازادی، تەندروستی و ئاسایشو ئێژا ئۆجالانی مسۆگەر کریۆنە، پەی پێکئاردەو ئاشتی خواستێوە گۆرەتەر نیشانە دریۆنە."