پەرلەمانتاروو پارتوو یەکسانی و دیموکراسیی گەلا (هەدەپ)وو مێردینی، ساڵیحە ئایدەنیزە، چەنی ژەناو چەندوو شاروو سەرنیشتوو کوردستانی بەشداری چالاکییەکەی بێنۍ.

چالاکییەکەنە، درووشموو "ژەنی، ژیوای، ئازادی" و "بژیوۊ مدرامانوو ژەنا" و هەلهەلە دژوو گەمارۊو پۊلیسی بەرزۍ کریێوە.

نامونیشانوو چارەسەر عەبدوڵڵا ئۊجالانا

ژیان ئۊنەرە بە نامۍ تەژەئایۊ، قسێش کەرڎۍ، ئەوەخوایش کەرڎۊ،  پەی ڕاگێری جە ڕێکوستەی ژەنا، گۊشەگیری سەروو ڕابەروو گەلوو کوردی عەبدوڵڵا ئۊجالانی تندتەر کریۊوە.

ئاماژەش پانەیە کەرد، بە قووڵبییەیوە گۊشەگیری، کێشەکاو جڤاکیچ گەورەتەرۍ با و قەیرانی زیاترێچ مەیا وەڵیوە، جە ڕاو گۊشەگیرییوە، پارادایموو ئازادیی ژەنۍ  ڕابەروو گەلوو کوردی عەبدوڵڵا ئۊجالانی کریۊ ئامانج.

هەرپاسە واتش: "ئێمە پا گێرمێرە جە ماڕای گۊشەگیری و بونیادنیای ژیوای ئازادوو ژەنا".

داوا پەی بۊ فراوانکەرڎەی ئازادیی جڤاکی

ئۊنەرە، واتش، با جە ڕاو کۊشیای و ڕێکوستەیۊ، ئی سەدەیە بکەرمۍ بە سەدەو شۊڕشوو ژەنۍ، واتش: "سەروو ئی بناغەیوە، "ژەنی، ژیوای، ئازادی" کۊشیایما چەنی ژەناو جیهانی وزۊ یۊ. بە سەرمەشقبییەی ژەنا. داوا وەنەو گردوو ژەنا کەرمۍ، ئازادیی جڤاکی گەورە کەرا و ٢٥وو تشرینوو دووەمی بەشدارۍ با جە کۊشیاینە".

دەس جە کۊشیای ورمەگێرمێ

پەرلەمانتارە ساڵیحە ئایدەنیزە واتش، کە دژوو پیاسالاری و میلیتاریزمی و ڕەگەزپەرسی، درێژە بە کۊشیای مدەیمۍ.  

ئایدەنیزە واتش: "گۊشەگیری بەرڎەواما، کۊشیایما ئەوەڵ پەی ورگێرتەی گۊشەگیریین. مەتاوا هێزوو ژەنا ماڕا، مەتاوا ڕا جە ئازادیی ژەنا گێرا. تا هامپەیمانیی ژەنۍ و جڤاکی وەش کەرمۍ دەس جە کۊشیای ورمەگێرمێ".