بەرگی یوەموو مانیفێستۆو شارستانییەتی دیموکراتیکوو ڕابەروو گەلوو کوردی عەبدوڵا ئۆجالانی ٥ بەرگانە بە نامێ "شارستانییەتی، سەردەموو خواوەندە دەمامکدارەکا و پاشا پۆشیایەکا" بە زوانی ئەرمەنی ورگێڵنیا.

 یەریڤانوو پایتەختوو ئەرمەنستانینە کۆمەڵەو یۆبییەی نویسەرا، چالاکیێوە پەی ئشناسای کتێبەکەی لوا ڕاوە.  مەراسیمەکەنە یاگەداروو ئەرمەنی کینیاس حەسەنۆڤی، هامسەرۆکوو کۆمیتەو کوردستانی سیلۆ دربۆیانی و ئەنداموو یۆبییەی نویسەراو کوردی سەیران جەلادی، تارێخنویس جیڤۆرگ خودینیان و ئەوەکۆڵەر و کوردۆلۆگ کارین هۆڤانیسیان قسێشا کەردە، هەرپاسە چندین ڕۆشنویرێ و نویسەرێ ئامادێ بێنێ.

ئەندامەو یۆبییەی نویسەراو کوردی سەیران جەلادە واتش: " ئی بەرهەمە نەوەک تەنیا پەی گەلوو کوردی، بەڵکوم پەی گردوو ئینسانیەتین. ڕابەروو گەلوو کوردی عەبدوڵا ئۆجالانی بە ئەرەمەنەی قووڵی فەلسەفی وێش شۆڕشێوە گەورەش دەس پەنە کەرد.  کتێبەکێ پەنج بەرگنێ یوەم  هەنگامەو ڕابەر ئاپۆینێ بەرەو ئایندێوە ئازاد. دەوڵەتوو تورکی بە ئەشکەنجەدای و گۆشەگیرکەردەی ڕابەرما هەوڵێ بێدەنگکەردەی کوردی مدۆ".

سەیرانە واتش ڕابەروو گەلوو کوردی عەبدوڵا ئۆجالان گەلوو کوردییش جە دلێنەشییەی پارێزنا و ژیواێوە تازەش دێ پەنە، بە ئەرەمەنەی قووڵ ڕاو کوردیش ڕۆشنە کەردۆ، واتش: "پەوکای کتێبەکە بەروزوو ڕۆحی نەرم و کەسایەتیی قارەمان و خەسڵەت و هێزوو ڕابەرێوە شۆڕشگێڵنی ئەڤینداروو ئازادیین".

هامسەرۆکوو کۆمیتەو کوردستانی سیلۆ دربۆیان ئەرەیاوناش تا ئیساتێ کتێبەکاو ڕابەروو گەلوو کوردی عەبدوڵا ئۆجالانی پەی ١٠ زوانا ورگێڵینێ، وەرکەوتوو دلێڕاسەینە و جیهان گرنگیێوە فرە بە فیکریش مدۆ، مشۆم کورداو ئەرمەنستانی و گەلوو ئەرمەنی کتێبەکا واناوە، تا ئاشناو شناسنامە و تاریخوو وێشا با.

تارێخنویس جیڤۆرگ خودینیان تیشکەش وستە سەروو مدرامانوو ڕابەروو گەلوو کوردی عەبدوڵا ئۆجالان  هەلومەرجی گۆشەگیری و واتش: پێویسا ئینسان جە مدرامانی بیاوۆنە و ماناش بدۆ پەنە. سیستموو سەرمایەداری ئیمپریالیستی باڵادەسی، بەرەو ورشانایۆ ملۆ. یاگێ ئی سیستەمەینە، سیستمێوە تازەی جیهانی گنۆ وەڵێ".

ئاخروو چالاکییەکەینە کتێبەکاو ڕابەروو گەلوو کوردی عەبدوڵا ئۆجالان لاو کینیاس حەسەنۆڤیوە ئیمزا کریا و سەروو ئامادەبیارە بەش کریا.