ئۆپراسیۆنە شۆڕشگێڵنییەکۍ گەریلاکاو ئازاڎیی کوردسانی جە ۋەرا ۋەروو سوپاو تورکی ئەرەگیرینە سەرەمڕە بەردەوامێنۍ. ئۆپراسیۆنە شۆڕشگێڵنییەکۍ کە جە ساڵیاڎوو ٤٥ەمین و ئەرەمەرزناو پەکەکەینە جە مانگەو تشرینوو دووەمینە زیاڎشا کەرد، مانگەکاو کانوونوو یووەمی، کانوونوو دووەمی، شوبات و ئادارەنە جە زاپ، خواکورک و مەتینانە بەردەوامۍ بیۍ و هیوا وئاواتوو ئا هێزا تەمەن پۍ پەکەکەی دیاری کەرێنۍ، سەروو دلیشاوە مەنۆ. حەرپاسە حکومەتوو فاشیستی ئاکەپە-مەهەپەیچش شۆکۍ کەردۍ، فەرماندەیی قەرارگەو ناوەندی پارێزنای گەلی (نەپەگە) جە ٢٠و ئادارینە ڕووەدایێش پێسە مزانی ونەورۆزانەی پۍ رای گرڎیی وەڵاکەردۆ. جە ئەرەیاۋناکەینە ئامابۍ، "گەریلاکاو ئازاڎیی کوردسانی بیۍ بە تواناو بێکاریگەرکەردەی فڕۆکەی بێفرۆکەوانی هجوومکەری. هێزەکێما بە گرڎیی ١٥ درۆنۍ سیهایشا وستێنێرە واری". دمابەدماو ئا ئەرەیاۋنایە، گەریلا تیڤیچ دیمەن و وستەیرەواروو سیهاکاش وەڵاکەردۆ.

دیمەنەکاو مێڎانەکا جەنگی و ئا ئامارۍ کە وەڵۍ کریاوە، بەرش وزا کە سوپاو تورکی ئەرەگیری سەرەڕاو پەشتیوانییەکا پەدەکەیچ مەتاوۆ جە ۋەراۋەروو هێزەکاو گەریلاینە ۋێش گێرۆ و جە جەنگەنە دەسوەڵێوستەی ئینا دەسوو گەریلاکاو ئازاڎیی کوردسانیوە. جە ئۆپراسیۆنی شۆڕشگێڵنی گەشمەرڎۍ دۆغا ڤیانێنە کە ١٧و شوباتی زاپەنە کریا، جە دیمەنەکانە وینیا کە گەریلاکۍ داواو ۋۍ دایدەسۊەی جە سەروازا کەرا.

بە پاو ئامارەکا ساڵەو ٢٠٢٣ کە فەرماندەیی قەرارگەو ناوەندی پارێزنای گەلی (نەپەگە) وەڵاش کەردێنۍ، گەریلاکاو ئازاڎیی کوردسانی ١٧١٢ چالاکیێشا کەردێنۍ و ٩٢٨ ئەرەگیرۍ کە ٧شا دەرەجەدارۍ پلەباڵۍ يێنێ بە سزا یاوێنۍ. ئەرەگیرەکێچ بە گرڎیی ٢٩٦٩ هجوومێشا کەردێنۍ کە بڕێشا جە ڕاو بەکارئاوردەی چەکی کیمیاۋیی و قەڎەغەکریایۆ بیێنۍ. ١٧٩ گەریلۍ گەشمەرڎۍ بیێنۍ. تەنیا جە مانگەو تشرینوو دووەمینە ١٩٣ چالاکی دژوو هێزەکاو سوپاو تورکی ئەرەگیری کریێنۍ، ١٢٤ ئەرەگیرۍ بەسزا یاوێبێنۍ، بڕێوە فرە چەک و تەقەمەنیچ دەسشا سەرەرە گیریابۍ یاخوڎ دلێنەبریێنۍ. جە جەنگەکا ئا مانگەنە چوار گەریلۍ گەشمەرڎۍ بیێبێنۍ.

ئۆپراسیۆنە شۆڕشگێڵنییەکاو هێزەکا گەریلای مۆرەو ۋێشا جە مدرامانی دا. دیمەنوو دەیان چالاکیا جە تەرەفوو گەریلا تیڤیوە وەڵاکریێوە.

ئۆپراسیۆنە شۆڕشگێڵنیەکۍ کە گەریلاکاو ئازاڎیی کوردسانی جە مانگەو تشرینوو دووەمی بەدماوە ئەنجامشا دۍ پی جۆرەنۍ:

ئۆپراسیۆنی شۆڕشگێڵنی گەشمەرڎۍ لەیلا سورخوێن ئامەدۍ

ئۆپراسیۆنی شۆڕشگێڵنیی گەشمەرڎە ئامەد روباری

ئۆپراسیۆنی شۆڕشگێڵنیی کەش و ئامێدی

ئۆپراسیۆنی شۆڕشگێڵنیی گەشمەرڎۍ مەلسا موشۍ

ئۆپراسیۆنی شۆڕشگێڵنیی گەشمەرڎە هەڵمەت دێرەلوکی

ئۆپراسیۆنی شۆڕشگێڵنیی گەشمەرڎۍ دۆغا ڤیانۍ

ئۆپراسیۆنی شۆڕشگێڵنی گەشمەرڎە جوان- گەشمەرڎە ئاندۆکی