٨ هەرێماو سەرنیشت و وەرکەوتو سوریاینە بە درووشمو "ئازادیی پەی ڕابەر ئاپۆی، چارەسەری سیاسی پەی پەرسەو کوردی" نەورۆز مەبارەک کریا.

دەگایەکاو مەشمورو دێرکینە، حەلیقی گەرکی لەگی، دەرجیکو دەرباسیەینە، شارەکڵەو حیمۆی قامیشلۆینە، دەگاو چاغیربازاڕی عامودا، سەد غەربی (بەنداوو وەرنیشتی) حەسەکەنە، دەگاو چۆڵستانی دەرباسیەی، ساحەو شارەوانیی قامیشلۆینە، ئاهەنگەکاو نەورۆزی کریێ.  

ئاهەنگەکەنە پەی ئازادیی ڕابەرو گەلو کوردی عەبدوڵا ئۆجالانی پەیام دریا، هەرپاسە پەیام دریا پەی دماییئاردەی بە ئەرەگیرکاریی دەوڵەتو تورکی و بنیاتنیای سوریایێوە لامەرکەزی و فرەڕەنگی.  

هەرپاسە سڵام کریا وەنەو مدرامانو گەریلای و گەلاو سەرنیشتی و وەرکەوتو سوریای دژو هجوومەکاو دەوڵەتی ئەرەگیرکەرو تورکی.

دلێشنە  تیشکە وزیا سەرو پرۆژەو ئیدارەو وێراوەبەری و ئەوەخوای کریاوە پەی چارەسەرو ئاڵۆزییەکاو سوریای و دماییئاردەی بە ئەرەگیرکاری ئی پڕۆژە ڕای حەرە گونجیێنە.

ئاخرو ئاهەنگەکەینە مۆسیقا و شانۆ و ورپڕای پێشەش کریا.

ئاهەنگەکاو نەورۆزی کۆبانێ و حەلەب و شەهبانە بۆنەو هەلومەرجو کەشوهەوایۆ دماوزیێ.

لاێوە تەرۆ لوبناننە، کوردستانیێ و دۆسەکێشا و نوێنەراو پارت و کۆمەڵەکا هەرێمو دەمورو بەیروتینە  دەورو ئاویرو نەورۆزینە کوێ بیێوە. ئاهەنگەکە لاو کۆمەڵەو چاندو نەورۆزیوە کریا، مەیدانەکە بە پۆستەراو ڕابەرو گەلو کوردی عەبدوڵا ئۆجالانی و گەشمەردە مەزڵوم دۆغانی وعەلەمەو پەکەکەی ڕازییاوە.