"ڕاپیمای گۊرەو ئازڎیی" کە ١ و شوباتی پۍ ئازاڎیی جەسڎەیی ڕابەروو گەلوو کوردی عەبدوڵا ئۆجالانی دەسش پنە کەرد جە ڕۊو ١٣ ەمینینە بەردەواما. سیاسەڎمەدارۍ و نوێنەرۍ و ڕێکوزیا دیموکراتیکەکا جە ئامەڎەنە گلێرۍ بیێوە.

گەل بە واتەیۆ گۊرانیۍ و درووشمۍ و هەلهەلەی چەمەڕاو ڕاپیماکەرا بێنۍ.

پۆلیس مێڎانەکەش تەوقە دا. بەمەڵامەتوو ئاستەنگوو پۆلیسیوە گرژی و پشێوی وەشبی. پەرلەمانتارەکۍ قۆڵشا کەرد قۆڵوو یۊیرە و ۋەران ۋەروو ئاستەنگی پۆلیسینە مدرامانشا کەرد.

هامسەرۆکوو دەبەپەی کەسکین بایندەر ئەرەیاۋناش ئی ڕاپیمایە میاوۆ ئامانجەکەیش و سەرە مەنامنمێرە، مەتاوا گەلەکەیما بە چەوەسنایۆ و تەرسنای مردنا.

ئەڎایا ئاشتی تەوقەو پۆلیسیشا ماڕا و بەشدارۍ ڕاپیماکەی بێنۍ و بە گوڵێوە پێشوازیشا جە ڕاپیماکەرا کەرد و درووشمەکۍ بەرزۍ کرییوە. 

دماو هەڕەشۍ "دەسوەردا"ی پۆلیسی، پەرلەمانتارەکۍ ڕاو ئاماو لوایشا گێرتە، دماو هۊرگێرتەو تەوقەکۍ ڕاپیمای دەسش پنە کەردۆ.

حەرچنە هەزاران پۆلیسۍ ڕاو ڕاپیماکەیشا تەوقەدابۍ، بەڵام نەتاواشا جۆشوخرۆشوو گەلی ئاستەنگ کەرا و هاموڵاتیۍ جە یانەکا ۋێشا و جاڎەکانە سڵامشا جە ڕاپیماکەرا کەرد.

دماو ڕاپیماکەی پەرلەمانتارەو دەم پارتی نەورۆز ئویساڵە واتش: "ئی زمسانە جە وان و قەرسۆ کۊتیمۍ ڕا. ئێمە پۍ ئازاڎیی بەڕێز ئۆجالانی و چارەسەروو پرسوو کوردی ئینایمۍ چۍ، ئی ڕۍ، ڕاو ئازاڎیی بەڕێز ئۆجالانیا".

هامسەرۆکوو دەبەپەی، کەسکین بایندەر سوپاسوو پەشتیوانی گەلیش کەرد و ناڕەزایەتیش ۋەران ۋەر بە تەوقەو پۆلیسی بەربڕی، ئەرەیاۋناش ئی ڕاپیما و مدرامانە سەڎێوەن بەردەواما و واتش: "داوا جە هەر کەسۍ کەرمۍ کە ڕا و ڕێبازێوە پۍ چارەسەری ئاشتیانەو ئی قۊرتەیە بێزاوە. ئی قۊرتۍ ئیسفاڎەش پۍ کەسی نییا. مەبۆ چارەسەری شکۆدار و ئاشتیانەو ئی قۊرتۍ تەنیا جە ئەستۆو ئێمەنە بۆ. هەرکەسۍ ئاشتی ئی وڵاتەیشە گەرەکا، پێویسا ۋەرپرسیاری ۋێش جابەجێ کەرۆ".  

بایندەر سەرنجش وست سەروو کۊشیای ١٠٠ ساڵەو کوردا و واتش: "ڕابەروو ئی مدرامانەیە بەڕێز ئۆجالانا. پێویسا گۆشەگیری مەڕیۆ و ئازاڎیی جەسڎەیی بەڕێز ئۆجالانی مسۆگەر کریۆ. بێجگە چینەی ڕێوەتەر نییا. داواو ئێمە ئاشتیێوە شکۆدارا. ئارۆ گەلوو وانیما پەشتگیریش ۋنە کەردیمۍ. بێگومان داواو گەلەکەیما بەدی مارمۍ". وتارەکۍ بایندەری بە واتەیۆ درووشمۍ و فڕنای کاوەترا دمایش ئاما.

ڕاپیماکەی ١٥ و شوباتی جە دەگاو ئامارای یاگۍ جە ئاڎابیەو ڕابەروو گەلوو کوردی عەبدوڵا ئۆجالانی دمایش پنە مۍ.