یانەو فەرهەنگ و ئەدەبیاتوو بێسارانی هەورامانی بەبۆنەو ڕۆو جیهانی زاوانی ئەڎایی بەیاننامێوش دان و جە میانشەنە  ئاشکراش کەردەن: "زوان وەسیلێوەن، کەرەسێوەن کە ئێمە کەمتەر سەرو هەرمان و بارو قیافەو زوانی مەفکریەمێنە. ئەگەر "زوان" جە جامیعەو ئینسانی بگێریەیۆ، چەرخەو  کۆمەڵگای یەکسەرە مەمرۆ و مەمدرۆ جە جمەنە. ئێمە چوون یانەو فەرهەنگ و ئەدەبیاتوو بێسارانی ڕۆو زوانی ئەد٘ایی بە ڕوێ موقەدەس مەزانمێ".

تەمامی بەیاننامەکەی:

"زوانوو ئەد٘ایی و ڕۆ 2 سیاوکامی"

هەم ڕەگەزەو زوانی و کۆمەڵگای؛

"محەمەدڕەزا باتنی خەڵکوو ئێرانی" مەواچۆنە: ئەگەر زوان و کێ بیەیمان جە جامیعەی ئینسانیەنە بگێرانێوە چێش مەقۆمیۆ؟
جوابوو ئی پەرسێ بە ڕازێوە جە تەوراتی دەس مەکەرۆن پەنە.
داستانەو (برجەو بابلی) دلێنەکەش پی جۆرەنە؛ جە درێژایی دنیای ویەردێنە، زاڕۆڵێ ئاد٘ەمی گرد٘ بەزوانێو قسێشان کەردێنە. وەختش یاوا بۆ ئیتر جە وەرکەوتەنە باروبنە هۆر بکەنان و کۆچ پێچانێوە. لوەی تا یاوەی بە بنکێوی جە وەڵاتوو شەنعاری و یەکجانشینێ بیێ. ئیجار چاگەنە کەوتێ بە مەقۆ مەقۆ کە بەیدێ با شارێو وەش بکەرمێ و سەراونشەو برجێوە، قەڵایێوەی بەرزە بینا بکەرمێ تاکوو بیاوۆ لاو عەرشی ئەعلای و پی جۆرە ئێمە نامێ بەربارمێ و عاڵەم پەنەمان بزانۆ و ئیتر کەم پژگیەیمێ پی سەربیساتەنە. چی قسانه بێنێ؛ دیشان خەبەرشان جە لاو خۆدایوە سەر ئاما کە بنەچەو ئاد٘ەمی گەرەکشان بۆ شارێو یان برجێوەی بەرزە وەش بکەران بوینۆش.
خۆداوەن جە یەهەرداری ئی قەومی خۆفیش کەرد٘ەو بە وێش 
واتش ئی خەڵکە یەکدڵ بیەن و زوانێوی تایبەتوو وێشان هەنشان و پی یەکدڵی و یۆوە بیەی و هامزوانیشانوە گرد٘ هەرمانێوە دەسشانە بەر مەی. 
ئیتر خۆد٘ای گەورە پەی شێوناو ئی تەکبیر ڕاوێژیشان فکرێوش کەرد و بە جۆرێو حیچ کام زوانوو هەنگەریشان حاڵی نەوێ. چوونکای جە فاموو زوانوو یەکترینی بێ دەسەڵات مەنێوە. 
ناعیلاجێ کەوتێ و دەرندوویێ بیێ و نەشان تاوان برجەکێ وەشە بکەران و هەر کەسێوشان کەوت دوورە وەڵاتانێو.
شایەد ئی داستانی برجێ، ئەفسانێ ببۆ. بەڵام حەقێقەتوو زوانوو کۆمەڵگای مەواچۆنە. ئی ئەفسانێ عاڵتەر جە هەر ڕازێوە حەقێقیە، سەرئاماو زوانوو  ئێمەش درکنان.
زوان پەی ئێمە وەسیلێوەن،کەرەسێوەن کە ئێمە کەمتەر سەرو هەرمان و بارو قیافەو زوانی مەفکریەمێنە." پی بۆنەوە ئیتر نیەن وەرەچەمانوە،( ئەگەر "زوان" جە جامیعەو ئینسانی بگێریەیۆ، چەرخەو  کۆمەڵگای یەکسەرە مەمرۆ و مەمدرۆ جە جمەنە.) 
تەمەدۆنێ و فەرهەنگێ مەمران و ئینسان هۆرمەگێڵۆنێوە پەی ئا سەردەموو ویەردەو وەڵێشە کە زوانشان نەبیەن. 
پی بۆنەو ئارۆی بە یۆ جە ڕوە موقەددەسەکانوو وێمان مەزانمێ و زوانوو میللەتوو گۆرانی جە جامیعەو گۆرانی و سەرجەموو ئینسانەکان مبارەک باد٘ی مەواچمێ.
ڕۆمانەو ژیواو میللەتوو گۆرانی شاکارێ فرێش خۆڵقنەینێ. زوانوو ئێمە بەشێوی فرەش، پاڵپشتی جە فەرهەنگوو زەریفوو وێمانەن.
واگژە ئێمە مەبەرۆ، ئەر نەژنەومێ ئی وزەو واو نەزانی و وێ خلافنای.
 فرەینەو ئێمە پەشتەو دەلاقەیەنە وەهاری جەژنە مەگێران، بەڵام چن نادیارەن ئی نیگەرانی من و تۆیه. 
وا ئێمە چەنی وێش مەبەرۆن. ئەرێ  ئێمە مەبەرۆن... حینجێ ئەلف و بێ گرفتوو ئێمە نیەن. نەهەو ئێمە نمەگێرۆوە، ئێمە لەم ئێشەمان وێ کەم زانایەن و بێ کێ بیەیمان. هەزار تۆ خیاڵاتیەنە بەر بەیمێ و بزانم واقعیەت ئاشکران ئەو سەردیارو واسۆگایەکانوو خزمەت بە زوانیمان. 

یانەو فەرهەنگ و ئەدەبیاتوو بێسارانی هەورامانی