وەرکەوتوو کورڎسانینە ئاویروو نەورۊزی بە دروشموو "ژەنی، ژیوای، ئازاڎی" گەشیاەوە. فرەو شارەکانە چالاکی کریا. حەرپاسە بە سەرڎای قەبرسانەکا و نیایرەی دەسەگوڵا سەروو قەبرەو گیانبەختکەرڎا سەرەوردایەکاوە یاڎەکە کریاوە.
جە جەموو مەنتێقەکاو وەرکەوتوو كوردستانینە، ئاویروو نەورۊزی كریاوە و ڕەنگۍ و دروشمەكاو سەرەوردای و یاڎوو گیانبەختكەردا، سەروو مەراسیمەكاو ئێساڵوو نەورۊزینە زاڵۍ بێنۍ.
شاروو سەقزینە، خەڵک سەرۍ قەبرسانیشا دا، بەتایبەتی بنەیانەو "ژینا ئەمینی"ۍ و سەدان کەسۍ جە چالاکا و هاموەڵاتییا لوۍ سەروو قەبرەو ئا کناچە کورڎۍ کە بییە بە ڕەمزەو سەرەوردای "ژەنی، ژیوای ئازاڎی" و سەروو قەبرەکێشۊ یاڎش کریاوە و نەورۊز جە بنەیانەو گیانبەختکەرڎاو سەرەورداکەی مەبارەک کریا.
مەراسیمەكەنە سروودی شۊڕشگێڵنیۍ و درووشمۍ دژوو دەسەڵاتی وچیێوە و تاکئد سەروو درێژەدای بە سەرەورداکەی تا یاوای بە ئامانجەكاش كریاوە. حەر چا شارەنە سەروو یۊ جە بەرزاییەكاشۊ بە ئاویر نامۍ ڕابەروو گەلوو كوردی "عەبدوڵڵا ئۊجالان"ی نویسیێبۍ.
شارەكاو "سنە"ی و "بۊكان"یچنە ئەداو گیانبەختكەردا بە دروشموو "ژەنی، ژیوای، ئازاڎی"ی و "گەشمەرڎۍ مەمرا"، ئاویروو نەورۊزیشا كەرڎۊ و سەروو قەبرەو گیانبەختكەردایچۊ مەراسیموو یاڎكەرڎەیۊ لوا ڕاوە.
شەوەی ویەرڎێچ جە شارەكاو "سنە، مهاباد، پیرانشار، شنۊ، بۊكان، سەقز، دێوڵان، كامیاران"ی و چنڎ مەنتێقێوە تەرینە، گەنجۍ ئامۍ سەروو جادەکا و بە واتەیۊ دروشمەكا "ژەنی، ژیوای، ئازاڎی" و "نەمەنەی پەی ئەرەگیری" تووڕەیی و بێزاریی وێشا وەراوەروو دەسەڵاتی نیشانە دا.
بە پاو چنڎ سەرچەمێوە و ئا گێرتە ڤیدیۊییا وەڵی کریێنێوە، جە بەشێوە جە شارەكانە بەتایبەتی "سنە، دێوڵان، بۊكان و سەقز"نە، بۊنەو پەلامارەو هێزەکاو دەوڵەتی پەی سەروو گەنجا شلۊقی ڕووەش دێنە و بڕێوە وێنیشاندەرۍ بریندارۍ بیێنۍ.
س.ز
