زوبەیر ئایدار ئەنداموو دەسەو ڕاوەبەریی کەنەکەی، جە ڕاو ئاژانسەکەیماوە داواش جە کوردستانییا و دۊسەکاشا کەرڎە، کە جە ئەورووپانە مژیوا، بلا سەروو سندوقەکاو دەنگدای.

ئایدار باسش چانەیچە کەرد، کە پڕۊسێوە گرنگ  وەڵاتنە هەن و واتش، " جە ئەورووپانە و وەڵاتای تەروو جیهانیچنە، ئێمە ئینایمی  چی پڕۊسەنە. هیزی جە فرەو وەڵاتانە دەنگدای دەسش پەنە کەرد، ئێمە جە فرەو وەڵاتانە خەڵکما هەن. بەڵۍ ئێمە ئینایمۍ چۍ، وەلۍ بەشێوە جە ئێمە ئینایمۍ وەڵات و خاکوو وێمانە، ئا قۊمیایۍ چاگە قۊمیا ڕاستەوخۊ کاریگەرییشا سەروو ئێمەوە هەن، پەوکای ئەنجامە ئەرێنییەکا یان نەرێنییەکا کاریگەریشا سەروو ئێمەوە هەن. چی ورچنیەینە مشۊم گەلەکەما جە ئەورووپانە هەڵوێستوو وێش نیشانە بدۊ. مەبۊ وچیۊ 'ئێمە گرنگییش پەنە مەدەیمێ'، 'ئێمە چێگە مەنمێوە' نیشانە دریۊ."

' پەنەوازا بە دەنگوو وێما هەقەو کۊکوشییەکا کەرمێوە'

زوبەیر ئایدار جە درێژەو قسەکاشنە واتش: ئی ڕژێمە کە دژوو ئێمەن، ڕژێمێوە دیکتاتۊر و فاشیستا، ئا ڕژێمەنە کە ئەرڎۊغان سەرۊکایەتییش کەرۊ، چنڎین ساڵێن ونەو ئێمە مجۊ و کوشۊما. بەتایبەتی جە ٨ ساڵی ویەرڎەنە یانۍ جە ساڵەو ٢٠١٥ۊ جە سەرنیشت  وەرنیشت و پانیشتوو کوردسانینە و گرڎوو کوردسانیشا کەرڎەن بە گۊمەو ونۍ، گەنجەکێما، گەلەکەما، بەزیندەیی  چێرزەمینەکانە سووچیۍ، چەکی کیمیاوی دژوو گەلەکەیما بەکار مارا، عەفرین و سەرێکانیی ئێمەشا ورشاناوە، ئێشۍ فرەشا بە گەلەکەیما چەشتەن، ئاکەپە و ڕژێموو ئەرڎۊغانی وەرپەرسێنۍ  چی کۊکوشی و وێرانکارییە، پەوکای ئارۊ ڕۊو هەقکەرڎەیۊن، مشۊم بە دەنگوو وێما، بە ئیراڎەو وێما هەقە کەرمێوە.

'دەنگەکاو ئەورووپای یەکسەر کاریگەرییشا هەن'

ئایدار واتیچش: "ئامانجی یەکەمما هەقکەرڎەیۊن چی دەسەڵاتی. ئامانجی دووەمما پەشتیوانیکەرڎەی هامپەیمانیی ڕەنج و ئازادیین، کە کوردستانیۍ و دۊستەکێشا وەششا کەرڎەن و ئی هامپەیمانێتییە بە بەقووەتی ملۊ پەرلەمانۊ. جە ورچنیەی وەڵیننە دیما، کە جە ئەورووپانە ئێمە یەکەمۍ بێنمۍ چا یاگانە، کە لوایمۍ دەنگدای، وەلێم چا یاگانە کە نەلایمۍ دەنگدای دەنگێما فرە کەمۍ بێنۍ، پەوکای مەبۊ ئانەما هۊس بشۊ، کە دەنگدەراو  ئەورووپای بەشدارییشا جە سەرکەوتەی پەرلەمانتارانە کەرد جە فرەو یاگانە. پەی نموونەی جە کۊجائەلی پەرلەمانتارۍ بە دەنگوو ئەورووپای سەرۍ کەوتۍ. دەنگدایەکەیما یەکسەر کاریگەرییش سەروو ورچنیەی پەرلەمانی بۍ."

زوبەیر ئایدار جە درێژەو قسەکاشنە واتش "داوا جە گەلی و دۊسا و هامڕایاما کەرمۍ، کە چی دەسەڵاتی پەرساوە؛ بلا سەروو سندوقەکاو دەنگدای و دەنگ بە پارتوو چەپی سەوزی بدا".

‌‌