بە پاو ئاماروو سەندیکایەکاو فەڕەنسای ٢.٣ ملیۊن کەسۍ بەشدارییشا جە وێنیشاندایەکاو ١وو ئایارینە کەرڎەن، کە بە مەبەستوو شەرمەزارکەرڎەی چاکسازییەکاو حوکمەتی جە مەجالەو خانەنشینینە سازۍ کریێنۍ. جە فرەو شارەکایجەنە پەنجەپێکای دژوار ڕووەش دا.
سەندیکێکۍ تەسەور کەرێنۍ، کە یەکوو ئایارینە ژمارێوە پیمانەیی ٣٠ ساڵی ویەرڎەی پڕنا. حوکمەتوو ئیمانوێل ماکرۊنی، کە عومروو خانەنشینبییەیش جە ٦٢ ساڵاوە پەی ٦٤ ساڵا بەرز کەرڎەنۊ، تا ئیساتۍ بە زیاڎتەر جە ٣٠٠ وینیشاندایا شەرمەزار کریان.
جگە جە شارە گەورەکا پێسە پاریس، نانت، تۊلۊز، بۊرڎۊ، مارسیلیا و لیۊن-ی، جە شارە گولانەکایچەنە بەشداربییەیۍ فرە بۍ.
سەندیکاو" سی ئێف تی" واتش، کە جە سەرتاسەروو وەڵاتەکەینە دووۍ ملوێنۍ و٣٠٠ هەزار کەسۍ کە نزیکەو ٥٥٠ هەزار کەساشا پاریسنە بێنۍ، ئامێنۍ سەروو جادەی و دلۍ مەیڎانەکا.
ئا ئامارە بە پاو وێنیشاندایەکاو ساڵەو ٢٠٢٢ نزیکەو شش پەی حەوت ئێندەی زیاڎتەر بۍ، سەرباروو ئانەی وێنیشانەدای و چالاکییەکاو ساڵەو ٢٠٠٩ بە هامبەشی ٨ سەندیکایا ڕێک وزیا بۍ یەک ملوێن و ٢٠٠ هەزار کەسۍ بەشدارۍ بیێبێنۍ.
جە شارەکاو پاریس، لیۊن و نانت پەنجەپێکایۍ دژوار ڕووە دۍ. بە پاو ئەرەیاونیاو وەزارەتوو دلۍ ١٠٨ پۊلیسۍ و جەندرمۍ بریندارۍ بیێنۍ و ٢٩١ کەسێچ گیریێنۍ. تەنیا جە پاریسنە ١١١ کەسۍ گیریێنۍ.
ڕاوەبەروو "سی ئێف دی" تی لۊرێنت بێرگر واتش، "ئینە مدرامانێوە کۊتایین".
حوکمەت سوورا سەروو ئانەی چاکسازیی یانەنشینی دماو پەسەندکەردەیش لاو ئەنجووومەنوو دەستوریوە جە نیمەو نیسانینە یاوۊ ئاخر 'قۊناغێوە دیموکراتیک'. وەلۍ سەندیکا و پارتە ئۊپۊزسیۊنەکۍ پەی ورشانایۊ چاکسازییەکەی وێشا پەی هەنگامۍ تازۍ ئامادە کەرا.
س.ز
