حکومەتو ئەڵمانیای ئەرەیاۋناش؛ کە گروپە نەتەوەپەرسە تونڕەوەکا تورکی قەڎەغە مەکەرا. پەرلەمانتارەو پارتو چەپی کلارا بونگێر چا بارۊ ئەرەیاۋناش، "پۍ قەڎەغېوە چی جۊریە پێۋیسا چېشی تەر رووە بڎۊ؟" و پی جۊرە ناڕەزایش بەربڕی.
دمابەدماو سەرکۊتەی ئەردۆغانی جە هۊرچنیەکانە، گروپەکۍ سەر بە ئاکەپە-مەهەپە جە ئەڵمانیا ۋېنیشاندایشا کەرڎەبۍ. دماو ئا ۋېنیشاندایە بەین بەین روۋەدایۍ تنوتیژی مەیانە ئاراوە. پەرلەمانتارەو پارتو چەپی کلارا بونگەر مژارەکەش بەردەرە پەرلەمان و جە پرسیارېۋنە کە ئاراسەو حکومەتی و راوێژکارو ۋڵاتەکەی ئۆلاف شوڵزیش کەرڎ بە ئاماژەدای بە هەڕەشەکا گروپە تونڕەوەکا تورکی وەران ۋەر بە کورڎەکا و کەمینەکا تورکیای و وەرهەڵسکارا ئەردۆغانی کە ئەڵمانیانە مژیۋا ئەرەیاۋناش، ئایا پېسە حکومەتو فەرەنسای نیازشا هەن ئا گروپا قەڎەغە کەرا یان نا؟
بەنامۍ حکومەتی و وەزارەتو دلېینەی جە ٧و حوزەیرانینە جوابو پرسیارەکا بونگەرېش داوە و بانگەشەو ئانەیش کەرڎ حیچ تەرسېوە سەرو ژیای کورڎی و وەرهەڵسکارا تورکی ئەڵمانیانە بیەیش نییا. وەزارەتەکە بانگەشەو ئانەیچش کەرڎ کە یەکینە ئەمنییەکۍ حەجگیز چەمپۊشیشا جە تنوتیژی و تونڕەوی نەکەرڎەن. ئانەیچش وست ڕووە ئانەی بەشڎاری چا جۊرە تاوانانە کەرۊ خېرا جە چوارچێوەو یاساکانە سزا دریۊ و ئەرەیاۋناش کە سەرەڕاو چن ڕوۋەدایېچ بەڵام ئەرەیاۋناو قەڎەغەی پا جۊرەی کە پەرلەمانتارە بورگەرۍ باسش کەرڎ نیا بەرنامەو هەرمانەو حکومەتینە.
بونگەرە: شمە گەرەکتانە چېش ڕووە بڎۊ؟
پەرلەمانتارەو پارتو چەپی کلارا بونگەرە ناڕەزایش وەران ۋەر بە یاۋنەریەکەو وەزارەتو دلېینەی نیشانەدا و ئەرەیاۋناش، شیاوو قبوڵ کەرڎەی نییا کە حکومەت سەرەڕاو روۋەداکای تنوتیژی و تونڕەویچ پەرسو قەڎەغەکەرڎەی گروپە نەتەوەپەرسە تنڕەوەکا تەرەفدارو ئەردۆغانیش نەوستەن بەرنامەو هەرمانېشۊ. بورگەرە ئانەیچش وست ڕووە کە حکومەت پۍ ئانەی ئەردۆغانی توڕە و بێزار نەکەرۊ قەرارو پارېزناو کورڎا و وەرهەڵسکاراش نەڎان و ۋاتش، "ئی پرسیارۍ جە ۋېم کەرو، پۍ ئانەی 'ئولکوجو' نەتەوەپەرسە تنڕەوەکۍ قەڎەغە کریا مشۊ چ چېۋۍ روۋە بڎۊ؟ 'ئولکوجو' ئەڵمانیانە هەڵای گۊرەتەرین گروپی راستگری تنڕەوا و ئنڎەو نیم نازیەکا مەترسیڎارا".
پەرلەمانتارەو پارتو چەپی بونگەرە ئەرەیاۋناش؛ کە سەرەڕاو هەڕەشەکا سەرو کورڎی و ئەرمەنی و گروپە چەپە وەرهەڵسکارەکا، سەرەڕاو بیەی هەڕەشا سەرو ژیای ئا گروپا و جیای ئانەی گروپە نەتەوەپەرسەکۍ تورکی قەڎەغە کریا، جمیەرو ئازاڎیی کورڎی قەڎەغە کریۊ و ئانەیچش وست ڕووە کە ئینە شیاوو قبوڵ کەرڎەی نییا. بونگەرە گېڵنایۊ سیاسەڎمەدارو کورڎی کەنعان ئایازی جە قوبرسۊ و داڎگایی کەرڎەیش جە داڎگاکا ئەڵمانیای ۋیرئارڎۊ و ۋاتش، "ئارڎەیۊ و داڎگایی کەرڎەی ئایازی جە ئەڵمانیا بەرش وزۊ کە ئانە ئینا خزمەتو ئەردۆغانینە".
هەواڵگری: سەرو ئاشایس و دلېینەی هەڕەشېنە
بە پێچەوانەو یاۋنەریەکەو وەزارەتو دلېینەی، بە پاو فەرمانگەو پارېزنای دەستوری هەمیشەیی گروپە فاشیستە تورکەکۍ هەڕەشېنۍ پۍ سەرو ئاشایس و دلېینەو ئەڵمانیای. فەرمانگەو پارېزنای دەستوری هەمیشەیی جە دما گوزارشتەشەنە جە کانونو دوۋەمو ئېساڵینە جەبارەو گروپە نەتەوەپەرس و نەژاڎپەرسەکا تورکی شیکەرڎەیۊش ۋەڵاکەرڎەبېوە و ئاماژەش پانەی دابۍ کە نەتەوەپەرسە تنڕەوەکۍ تورکی دژ بە کورڎی، ئەرمەنی، رومانی، یەهودیەکا و عەلەویەکانۍ.
هـ . ش
