پاڵپەشتیە مېیاننەتەوەییەکې جە پرۆسەو 'ئاشتی و گلېرگەی دیموکراتیک'ی درێژەشا هەن و جە ١ و ٢ې تەممووزی شاندێوە ئۊرووپی جە چوارچێوەو هەڵمەتۆو 'گەرەکما دیدار چنی ئۆجالانی بکەرو' ئامې تورکیا و جەمې گلێرۊبیەیې و دیدارێشا کەردې. ڕامیاریمەداری سویسری و سەرۆک شارەوانی وەڵینو جنێڤی ڕیمی پاگانی یۆبې جە ئەنداماو شاندەکەی. پاگانی کە وەڵتەر جە نزیکۆ چەمڎاری گلېرۊبیەکاو بەینو حکومەتو کۆڵۆمبیای و هێزە چەکدارە شۆڕشگێڵنەکا کۆڵۆمبیای (فارک)یش کەردەبې، پېوەس بە سەرونەداکەیش پەی تورکیای و هەوڵەکا چارەسەری پرسو کوردی پەی ئاژانسو هەواڵوو فوراتی (ANF)ی قسێش کەردې و پەیلوای ۋێش بەربڕی.

پاگانی سەرەنجش وست سەرو ئامایشا پەی تورکیای و جەختش چانەیە کەرڎۆ مەرامی بنەڕەتیشا ئەنجامدای دیداری بیەن چنی ڕابەر ئاپۆی و تا چا ڕێوە دەورشا بۆ جە چارەسەری پرسو کوردینە. هەرپاسە جەختش چانەیە کەرڎۆ گەرەکشا بیەن جە ڕاو دەم پارتیۆ چنی نوێنەراو پارتەکا تورکیای گلېرې باوە. هەرپاسە ئانەش وست ڕووە جە ڕاو پارێزنەرەکا ڕابەر ئاپۆیۆ گەرەکشا بیەن دیدار چنی ڕابەر ئاپۆی ئەنجام بڎا.

پاگانی سەرنجش وست سەرو نامەکەو ڕابەر ئاپۆی کە پەی شاندەکەیش کیاستەبې، جەختش چانەیەکەرڎۆ نامێوە پەر مەعنا بې و چنەشەنە ڕابەر ئاپۆ جەختش جە بەردەوام بیەو پرۆسەکەی کەردەنۆ.

پاگانی مەراسیمو چەک سۊچنای گرووپو 'ئاشتی و گلېرگەی دیموکراتیک'یش بە هەنگامېوە گرنگە نیارە و پېوەس پا ئەزموونەی جە پرۆسەو بەینو حکومەتو کۆڵۆمبیای و فارکیوە ئاماژەش پانەیە دا هەمیشە نیگەرانی و تەرسیش جە هەڵوێسو حکومەتی بیەن، پانگانی ئاشکراش کەرڎ نزیکەو ٤٠٠ چەکڎارا فارکی دماو چەکنیایشارە گێڵێوە پەی دلې ژیۋای مەدەنی و کوشیې واتش: "چالاکییەکەی بەشێوەو پەیامێوە سیمبوڵی موینمې، پەنەوازا چی مژارەنە ئینسان فرە ئاگاڎاربۆ. چونکی جەنگ هەڵای دمایش نامان. قینێوە گۊرې بیەیش هەن، ئی قینێچە فرە بەئاسانی متاویۆ فاڕیۆ پەی جەنگی و تنوتیژی."

هەرپاسە پاگانی مەراسیمو سۆچنا و چەکیش بە ئەرێنی لێداوە و واتش: "هەر وێش ئێژا ئۆجالان بە دمای ئاردەی بە هەرمانە و چالاکییەکێ چێرو نامێ پەکەکەی و دمای ئاردەی بە ئەوەکۆشای چەکداری جە زینانەنە هەرمانێ گرنگە و مانادارەش کەردە. بەڵێ ئینە بانگەوازێوەن پەی درێژکەردە و دەسو ئاشتی پەی دۆڵەتی. بەڵام دیسان ماچوشۆ پەنەوازا ئینسان چی بابەتەنە فرە وریا و ئاگادار بۆنە؛ پەی ئانەی لایەنی وەراوەریشا جواب و ئینەی دۆوە بڕت هەلومەجێ ڕەخسنۆنە.

جە لایەنو دژبەریۆ بڕێ هەنگامێ سەرەتاییما وینێ. بەڵام هەڵای ئی چێوێ وەسێ نییەنه پەی سەرکۆتە و پرۆسەکەی. پەنەوازا هەنگامەی سیاسی و یاساییە نریۆنە. وەر و ئانەی تائیسە هەنگامێوە چا جۆرە نەنریان، نیگەرانییەکێم جددییێنێ."

ڕیمی پاگانی سەر و بەرپرسیارێتی گلێرگە و مییاننەتەوەیی، نەتەوە یۆگێرتەکا، وڵاتا ئەورووپای چی پڕۆسەنە واتش: "بەڵێ، وەرپرسیارێتیشا هەن. سویسرا خاوەن وەرپرسیارێتییا چی بابەتانە. وێم پێشنیارم کەرد پەی پەیوەندییەکا چنی خاچی سووری مییاننەتەوەیی، نەتەوە یۆگێرتەکێ و سکرتێرو گرڏی نەتەوە یۆگێرتەکا بەرو بە نێوندگیری. ئامانجم ئانە به پشتگیری پڕۆسەکەی بکەو و بە ڕەسمی کەردەی جە چوارچێوێوە یاسایینە چنی وەرپرسا مییاننەتەوەی و نەتەوە یۆگێرتەکا وئیمزا کریۆ."

پری پرسیارێ "جە نزیکۆ گەواهیدەرو پرۆسەو بەینو حکومەتو کۆڵۆمبیای و فارکی بیێ. بە پەشت بەستەی بە نموونەکا جەهانی، چی پڕۆسەنە ئا چێوەی مشۆم ئینسان ئاگادارش بۆنە چێشا؟ پاگانی ئی جوابەش داوە:

"ئینە بابەتو گفتوگۆکەیم بێ چنی پارێزنەرا ئێژا ئۆجالانی. بەڵێ، پرسیارەم کەردە ئایا ئەوەکۆڵییای جە پرۆسەکا ئاشتی جە وڵاتا پێسە و ئەفریقاو پانیشتی یان کۆڵۆمبیای کەردەن یان نا. ئی جۆرە جەنگێ ئیسفادەشا جە بڕێ ئامرازێ هورگێرتەن. پنەشا واتانی، بەڵێ خاس مزانمێ، بەڵام تورکیا جیاوازا."

بەڕاو من ئی پرۆسێ فرە جیاوازێ نییەنێ. جەنگ جە هەر یاگێنە ڕووەدۆنە هەمان چێوا. ئانەی جیاوازا ئانەن کە چنین ئاشتی بەدی مێ، چنین چەک نریۆرە. جیاوازیی ئینەن. حەر پۆکەی دما و جەنگو جەهانی دووەمی وڵاتا قەرارشا دا یاساو جەنگی کۆد بکەراوە. چونکە وەڵێ ئانەی یاسای نوویسریا چا جۆرە نەبێ.

ئارۆ یاساو جەنگی نوویسیان و گرڏ و لایەنەکا پێناسەشا پێسە و تاوانە جە دژو ئینسانییەتی، تاوانە و جەنگیشا ئیمزا کەردە. دادگاو سزاو مییاننەتەوەیی (DCN) ئی پێناسا جە وێش بار مکەرۆ. تاوانەکا پێسە و قڕکەردەی، تاوانەکا جەنگی جە دژو ئینسانییەتی، تاوانەکا جەنگی. ئی پێناسێ فرە کۆنێ نیەنێ؛ جە کۆتایی جەنگو جەهانی دووەمیۆ وزیێ دلێ یاساو مییاننەتەوەییەکاوە.

ئینە خاڵێوە گرنگەنە. حەرپۆکەی بەڕاو من یاساو مییاننەتەوەیی هەنووکەیی تاوۆنە چوارچێوێوە بۆ پەی پرۆسەو ئاشتی جە لایەنو ئێژا ئۆجالانیۆ دەسش پنەکەردەن. مشۆم ئێژا ئەردۆگان ڕا دۆنە هێزە مییاننەتەوەییەکا چەمدێری ئی پڕۆسەیە بکەرا و بانە نێوەندگیر. مشۆم پەسەنش کەرۆ چنی ئۆرگانی مییاننەتەوەییەکا نەتەوە یۆگێرتەکا گلێر بۆوە. پەنەوازا نێوەندگیریێ جە لایەنو نەتەوە یۆگێرتەکاوە دەستنیشان کریۆ. کەسانی شارەزا مشۆم چەمدێری ئی پرۆسەیە بکەرا. پەنەوازا پەرلەمان یاسایێ ئامادە بکەرۆ پەی جابەجێ کەردە و ئی پرۆسەیە."