سەبارەڎ بە یاساو ھورچنیەی و جیاوازی ئامارەو دەنگدەرا هەرێمو کورڎسانی، حەریۊ جە سەرۊکو فراکسیۊنو یەنەکەی جە پەرلەمانو کورڎسانی و نوێنەرا یاسایی پارتەکەی، چن شەکوېوەشا جە داڎگای فیدراڵی عێراقینە تۊمارەکەرڎ، پێشبینی کریۊ قەرارو داڎگای جەبارەو درێژکەرڎەیۊ ماوەو پەرلەمانی دما وزیۊ .

ئارۊ یەرەشەممە، یەنەکە ژمارېوە شەکوېش جە بارەو یاساو ھورچنیەی كورڎسانیۊ سەرو پەرلەمانو كورڎسانی و سەرۊكەكەیش جە داڎگای فیدراڵینە تۆماركەرڎ، پێشبینی کریۊ قەرارو داڎگای جە بارەو درێژکەرڎەیۊ ماوەو پەرلەمانی پۍ وەختۍ تەری دماوزیۊ، حەتا شەکواکۍ یەنەکەی جەبارەو ھورچنیەکاوە یەکلاییۍ باوە.

یەنەکە جە داڎگای باڵای فیدراڵی عێراقی یەرۍ شەکوېش سەرو یاساو ھورچنیەکا هەرێمو كورڎسانی تۊمار کەرڎ، ئاڎێچ یۊشا جەبارەو یەک بازنەیی ھورچنیەی دلۍ یاساو ھورچنیەکا کورڎسانی و شەکواکۍ تەرۍ جەبارەو جیاوازی ئامارو دەنگدەرا هەرێمی بەراورد بە تۊمارەکا عێراقی .

سەبارەڎ بە ئشناسنامەو شەکواکەرەکا یەنەکەی، یۊشا زیاڎ جەبارا، سەرۊکو فراکسیۊنو یەنەکەی جە پەرلەمانو کورڎسانی و ئەوۍ تەرۍ نوێنەرۍ یاسایی پارتەکەینۍ.

تۊمارکەرڎەو ئی شەکوایا ئینا وەختېنە کە، سۊران عومەریچ پېسە ئەنڎامو ئەنجومەنو نوێنەرا عێراقی جەبارەو پێکئاماکاوە، شەکواش سەرو حکومەتو هەرێمی تۊمارکەرڎەن.

ھاموەخت قەرارا سەبای چوارشەممە، داڎگای باڵای فیدراڵی عێراقی قەرارو ۋېش جە بارەو ئا شەکوایاوە ئەرەیاۋنۊ، كە جەبارەو درێژكەرڎەیۊ عومرو پەرلەمانیۊ تۊماركریېنۍ، بەڵام پێشبینی کریۊ، داڎگای فیدراڵی سەبای ئەرەیاۋناو حوكمو ۋېش جەبارەو درێژكەرڎەیۊ عومرو پەرلەمانی پۍ وەختۍ تەری دما وزۊ، تا ئا وەختەی ئەنجامو شەکواکا یەنەکەی، جەبارەو یاساو ھورچنیەیۊ یەكلا بۊوە.

ھ .ش