یەپەسە- ژەنی بۊنەو حەوتەمین ساڵیاڎوو مەرزنایرەیشۊ  و ٨وو مارسی ڕۊو جیهانیی ژنە زەحمەتکێشاوە ئەرەیاوناێش وەڵا کەرڎۊ.

جە ئەرەیاوناکەو یەپەسە – ژەنێنە ئامان:

"ژەنی پێکئامایۍ بنەڕەتییەو گلێرگەینە، سەیەو ئادیشانە گلێرگە وەش بۊ، ئادە بەها سروشتییەکاش کۊ کەرۊوە، چونکوم ژەنی ئەخلاق، ویژدان، زوان و کولتوورنە. ئانێنە کە گلێرگەی بە تایبەتمەندییەکاو وێشۊ خولقنۊ، بە گردوو قووەو وێشۊ پەی ژیوای ئاشتییانەی و ئینسانانەی کۊشیۊ. سیستمێوە، کە گەرەکشا گلێرگەی کەرۊ بە بنەمێوە پەی قازانجوو وێش، دەور و هەرمانەو ژەنێش زەوت کەرڎەن و ژنییش کەردێنە بە کاڵا پەی وێش. سەروو ئی بنەمێوە "ڕابەر ئاپۊ" کە خولقنەروو گلیرگەین سەروو بنەماو ئەخلاقی و ویژدانی، ژەنی و بەها بنەڕەتییەکێش ئاردۍ پاڵوو یۊی و کوێش کەردێوە و فرسەتوو کۊشیایش پەی خولقنۍ. جە ٧مین ساڵیاڎوو یەپەسە ژەنۍ و ٨وو مارسی ڕۊو جیهانیی ژنە زەحمەتکێشا سەروو بنەماو بنیاتنیای گلێرگێوە پەشتبەستە بە بنەماو وێڕاوەبەری و وێپارێزنای ژەنا، کە لاو "ڕابەر ئاپۊ"یۊ خولقیان، مەبارەکبایی جە گردوو ژەناو وەرگێری دژ بە فاشیزمی، گەلوو کوردسانی و بەتایبەت "ڕابەر ئاپۊ"ی کەرمۍ.

دەسەڵاتوو ئاکەپە – مەهەپە سەروو بنەماو نەژادپەرسی و ئایینپەرسی هەوڵۍ بنیاتنیای گلێرگێوە فاشیستی مڎۊ، سەرەڕاو گردوو هەوڵەکاشا پەی دلێنەبەرڎەی زوان و کولتووروو گەلوو کوردی، هەوڵێچ مدا جە ڕووەو جەسەییەوە گەلوو کوردی دمایی پەنە بارا، وەروو ئانەیچ جە ساڵەکاو ٢٠١٥ – ٢٠١٦ینە هجووموو چۊکپەنەدایرەیش دەس پەنە کەرد. دژوو ئا هجوومانە مدارامانی وێڕاەبەری دەسش پەنە کەرد و گردکەس بی بە شایەتحاڵوو چالاکیی مدرامان و فیداکاریی ژەناو کوردی. ژەنی سەروو فەلسەفەو "ڕابەر ئاپۊ"ی سەرەڕاو کەمیی دەرفەتی و ئیمکانیەتی جادە بە جادە و کۊڵان بە کۊڵان کۊشیای ئازاڎییشا بەرد ڕاوە و ڕێکوستەیشا زیاڎ کەرد. وەروو ئانەی وێشا پارێزنا  مدرامانۍ گەورەشا نیشانە دا.

 دوژمن کە باوڕۍ فرەش بە تەکنەلۊژیاو وێش بێش، نەتاواش جە زرەپۊش و سەیارەکاشا بەیا جبەر و نەتاواشا سەرەشا سەنگەرەکانە بەرز کەراوە. وەراوەروو  مدرامانوو وێڕاوەبەرینە، کە بە سووروو ئامەدی، نسێبین، جزیر، شرناخ و سەرنیشتوو کوردسانیرە دا وەڵا بییۊ، دەوڵەتی فاشیستی ئەرەگیر ژەنۍ شۊڕشگێڵنێش کەردۍ ئامانج و بە سیاسەتوو پاکتاوکەرڎەی ژەنە شۊڕشگێڵنا نموونەو پاکیزە، سێڤۍ، فاتمە، ئاسیا و دایە تایبەتێش کۊکوش کەردۍ و تەمادار بۍ ورە و ئیرادە و ڕۊحوو مدرامانی ماڕۊ، وەلۍ گەلوو کوردی بە دروشموو ژەنی، ژیوای، ئازاڎی وێش بە مڵکداروو ئا ژەنە گەشمەردا زانا.

ئا ڕژێمە فاشیستە، کە جە جزیرەنە  خەڵکش  چێرزەمینەکانە بەزیندەیی سۊچنا،  بوومەلەرزەکەنە کە چی ڕوان ڕووەش دا، دیسانۊ خەڵکش چێروو بینا وڕیایەکانە جیا ئاست، بەتایبەتی دەزگاو ئافادی، سوپا و ئەرەمەرزیایەکۍ تەرێچ دیکە، نەک پەی ڕزگارکەرڎەی خەڵکی، بەڵکوم وەروو ئانەی خەڵک مرۊ دەستبەکارۍ بێنۍ. ئا عەقڵییەتە،  چێرزەمینەکاو جزیرەینە خەڵکش بەزیندەیی سۊچنا، ئارۊ کورد، تورک، عەرەب، سوننە و عەلەوییەکێش چێروو بینا وڕیایەکانە جیا ئاستۍ. جەڕاسینە  پا بوومەلەرزەیە خودوو ڕژێمی فاشیستیی ئاکەپە - مەهەپە و ڕەگەزپەرس بی چێروو بینا وڕیایەکاوە. خەڵک تەنیا تاوا بە کۊنفیدراڵیزمی دیموکراتیک، بە سیستموو وێڕاوەبەریی ژیوا و وێشا پارێزنا، بوار و زەمینەو خەباتی و کۊشیای خولقنا و زەخمەکاشا ساڕێژۍ کەرا.

هەوڵەکاو دەسەڵاتوو ئاکەپە- مەهەپەی ماوەو چنڎین ساڵان پەی تێکدای و دلێنەبەرڎەی ئەخلاقی  گلێرگەو تورکیاینە و وەشکەرڎەی ئینسانی بکوشی ، بە هامهەڵوێسی و یۊگێرتەیی و پەشتیوانیێوە، کە وەختوو بوومەلەرزەکەینە وینیا، پووچەڵ کریاوە. ئینەیچ بەرش وزۊ، کە حەتا ونەو ئینسانیەتینە ئەخلاق و ویژدان با، مشۊ کۊشیای  دژوو ڕژێمی فاشیستی کریۊ. بۊنەو ئا بەها سروشتیاوە، کە جە سروشتمانە هەنۍ، ئێمە ئا ژەنێنمۍ، کە وێما پەی خەباتی و کۊشیای پەی گەلی تەرخان کەرڎەن، ئێمە وەڵیوەبییەی پەی ئی پڕۊسەیە کەرمۍ. ئێمە گەلوو وێما دلۍ دەسوو ئا ساختەکارییەینە جیا نمازمۍ و ئێمە پەرسایۊش چەنە کەرمۍ.

حەتا ئازاڎیی جەسەیی "ڕابەر ئاپۊ"ی بەدەست نۍ، کە ئێمە بە ناسنامەو وێماوە خۊمانەوە دەوروو یۊینە کوۍ کەردیمۍ، بوار و زەمینەو کۊشیای بیەییماش پەی خولقنایمۍ، ئێمە مەمردمۍ. گرد ڕوۍ بەقووەتتەرۍ و بەقووەتتەرۍ بیمۍ، وێما ڕێک وزمۍ،  دوژمنما فاشیزموو ئینسانیەتی دلێنە بەرمۍ. جە کەسایەتیی فەرماندە زەریانی، کە وەڵیوەبییەی جە مدرامانوو وێڕاوەبەری کەرۍ، جە حەوتەمین ساڵیاڎوو ئەرەمەرزنای یەپەسە ژەنۍ و ڕۊو ٨وو مارسی رۊو جیهانیی ژنە زەحمەتکێشا، وەعد مدەیمێوە تا دما دڵۊپەو ونێما کۊشییەیمۍ، دەست جە سەنگەرەکاما ور مەگێرمۍ و تۊڵە جە دوژمنی بێڕەگوڕیشەی کەرمێوە".

س.ز