دماو وەڵابییەیۆ دیمەنوو دووێ ژەنا کە یاگێ گردیننە تارانوو پایتەختوو ئێرانینە سەما کەرا، میدیاکاو ئێرانی گێرتەی ئا دووە ژەناشە ئەرەیاونا. ئاژانسوو هەواڵوو تەسنیمی، چی بارەوە واتش: "داواکاری گردینوو تارانی بە تۆمەتەو پاشێلکەردەی یاسا کۆمەڵایەتییەکا ئەمرەو گێرتەیش پەی دووێ ژەنا بەرە کەردە، کە مەیدانوو تەجریشینە سەماشا کەردەن".

ژەنەکێ جلی سورێ حاجی فەیروزیشا کەردێبێنینە، کە بەپاو نەریتوو گەلوو ئێرانی دلێ جادەکانە بە سەما و مۆسیقا مزانیی ئامای نەورۆزی مارۆ.

بەپاو یاسا و شەریعەتوو ئێرانی سەماو ژەنا دلێ خەڵکینە قەدەغەن، بەڵام چی دمایۆ چند جارێوە ژەنی یاگە گردینەکانە و چانیشایچ میترۆنە سەماشا کەردەن و میدیای دیجیتاڵنە وەڵاشا کەردەنۆ.

کناچە کوردە ژینا ئەمینییە ئەیلولوو ٢٠٢٢  پۆلیسوو ئەخلاقوو ئێرانی کوشتە، ئینە ڕاش کەردۆ پەی سەرەوردای جمیەروو ژەنی، ژیوای، ئازادی.