ئەرەنیشتۍ کانتۆنوو فوراتی جە خێمۍ چالاکییەکانە ئەرەیاۋناشا، کە دەوڵەتوو تورکی شکسش ئارڎەن، بەڵام مەتاوۆ شکسەکەیش قبوڵ کەرۆ و ئەرەیاۋناشا، بېجگە جە کۊشیای حیچ هورچنیېوەتەرشا نییا.
زیاڎ جە یەرێ ساڵان ڕا مەڎریۆ حیچ زانیاریېوە جە ڕابەروو گەلوو کوردی عەبدوڵا ئۆجالانیۊ هۊرگیریۆ، جە سەرانسەرو جەهانیەنە چالاکیۍ فرۍ ئەنجامدریېنۍ. جە ١٠و تشرینوو یووەمیۆ هەڵمەتەو 'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی' جە ٧٤ ناوەندۍ جەهانینە دەسشپنەکەرڎ. جە زینڎانەکاو سەرنیشتوو کوردسانی و تورکیای جە ٢٧و کانوونوو یووەمیوە زینڎانیا سیاسیچ پەیوەسۍ بیۍ بە هەڵمەتەو ئازاڎییوە و دەسشا بە مانگرتەیۍ بە نۊبەتی کەرڎ کە تا ١٥و شوباتی بەردەوام بۆ.
جە گرڎوو هەرێمەکاو سەرنیشت و ۋەرکەوتوو سوریاینە، گەلا بە چالاکی جۆراوجۆر پەشتیوانیشا جە مدرامانوو زینڎانەکا کەرڎ. هېزی ئەنجومەنوو بنەیانەو گەشمەرڎا کانتۆنوو فوراتی چالاکیېوە دووە ڕۊیشا جە مېڎانوو گەشمەرڎە عەگیدینە دەسپنەکەرڎ. سەڎان کەسۍ جە مەنتیقە ئازاڎەکاوە سەردای خێمۍ چالاکییەکەیشا کەردە.
ئەرەنیشتۍ بەشدار جە چالاکییەکەینە، قسېشا پۍ ئاژانسوو فوراتی کەردە و ئەرەیاۋناشا حەتا ئازاڎکەردەی ڕابەروو گەلوو کوردی عەبدوڵا ئۆجالانی بەردەوامۍ با جە چالاکییەکاشا.
هامسەرۆکوو دەسەو پەروەردە و فێرکەردەی جە کانتۆنوو فوراتینە بەکر جەرادێ، قسێش کەردۍ و ئەرەیاۋناش کە جە سەرەتاو ئاخېزوو گەلی و ئاخېزوو ۋەرنیشتیۆ، دەوڵەتوو تورکی گەرەکشا ۋېڕاوەبەری خۆسەری دلېنەبەرۆ. بەکر واتش:"وەننگەکۍ و چېرخانەکۍ کریۍ ئامانج. خەڵکێوە فرەی مەدەنی گەشمەرڎۍ کریۍ. ئامانجوو دەوڵەتوو تورکی ئەرەگیری ئانەن کۆچبەری و تەرسی و تۆقنای وزۊ دڵوو گەلیوە. بەڵام گەل ۋەرەن ڕوو هجومەکا مردۊوە. حەتا ئازاڎیی جەستەیی ڕابەر ئاپۆی مسۆگەر نەبۆ ئێمە بەردەوام سەروو پەیاوە بیمۍ. ئی هجومۍ حەجگیز سەرکۊتەی و مدرامانوو گەلەکەیما تێک مەڎۆ، ڕاو ئێمە سەرکۊتەی و مدرامانا و حیچ هۊرچنیېوە تەرما نییا، سڵام جە مدرامانوو زینڎانەکا و گەریلاکا کەرمۍ."
هامسەرۆکەو ئەنجوومەنوو بنەیانەو گەشمەرڎا کانتۆنوو فوراتی، عایشە ئەفەندیە، ئەرەیاۋناش، کە ساڵەو ٢٠٢٤ ساڵەو ئازاڎیی جەستەیی ڕابەر ئاپۆی بۆ و واتش:"مشۊم گرڎوو گەلوو ۋەرکەوتوو دلێڕاسەی سەرهۊربڎا و ئازاڎیی جەستەیی ڕابەر ئاپۆی دەموودەس مسۆگەر کریۆ، پېسە گەلێوە تا دمایی کۊشیەیمۍ ڕێبازوو گەریلای و ڕابەرایەتیما وەرمەڎەیمۍ."
ئەندامەو ئەنجومەنوو بنەیانەو گەشمەرڎا، ڕۆدین محەمەڎە، قسېش کەردۍ و واتش:"دەوڵەتوو تورکی ۋەران ۋەر بە گەریلای شکسش ئاردەن و مەتاوۆ شکسەکاش قبوڵ کەرۆ، گەریلاکېما مدرامان کەرا و بە مدرامانیشا شکسشا بە دەوڵەتوو تورکی ئاردەن."
