بە سەدان کەسۍ جە ئەرەنیشتاو هەرێموو فوراتی وەراوەروو هجوومەکاو شەوەی وەڵینەو دەوڵەتوو ئەرەگیروو تورکی ئامۍ سەروو جادەکا و واتشا: "بە گردوو هێزیماوە ڕووبەڕوو ئەقڵییەتوو شۊڤێنیستی بیمێوە."
سوپای ئەرەگیرەو تورکی شەوەی وەڵینە بە فڕۊکەی جەنگی هجوومش کەرد سەروو وێستگە نەوتییەکاو کانتۊنەکاو سەرنیشتی و وەرکەوتوو سوریای و ئەنجامنە زەرەری ماددیش وەنە کەوتۊ و ناوەندەکاو خزمەتگوزاری مردیێنۍ. ئەرەنیشتاو هەرێموو فوراتی بە سەرمەشقایەتیی ڕاوەبەریی وێمانەو دیموکراتیکی، ڕاپیماێوە جەماوەرییشا دژوو هجوومەکا کەرد.
ڕاپیمایە جەماوەرییەکەنە کە مەیدانوو ژەنۍ ئازادێنە بە دروشموو "بژیوۊ مرامانوو جزیرەی" و "بژیوۊ مدرامانوو زاپی" دەسش پەنە کەرد، و ڕسمەکاو ڕابەروو گەلوو کوردی عەبدوڵا ئۊجالانی بەرزێکریێوە و تا مەیدانوو گەشمەرڎە عەگیدی بەرڎەوام بی.
محەمەد شاهین هامسەرۊکوو ئەنجوومەنوو بەیاگەیاونای هەرێموو فوراتی ڕاپیمایەکەنە قسێش کەرڎۍ و واتش:" مەبەست جە هجوومەکا چۊڵکەرڎەی هەرێمەکەین، وەلۍ پێسە هەرێموو فوراتی بە گردوو پێکئامایەکاشۊ دژوو عەقڵیەتی شۊڤێنیستی مردمێوە و هێزوو وێما پارێزنمۍ. دەوڵەتی ئەرەگیروو تورکی گورزی قورسش لاو گەریلاکاو ئازادیی کوردستانیوە وەر کەوتەن. پا بۊنەوە هجووم کەرۊ سەروو هەرێمەکاو سەرنیشتی و وەرکەوتوو سوریای، ئێمە ساڵەو ٢٠٢٣ما بە هەڵمەتەو 'ئازادیی جەستەیی پەی عەبدوڵا ئۊجالانی، چارەسەری سیاسی پەی پەرسەو کورد'ی دمایی پەنە ئارڎە و بە کۊشیای قەوەتتەرۊ ساڵەو ٢٠٢٤دەس پەنە کەرمۍ."
ڕاپیمایەکە بە واتەیوە دروشمەکا دماییش ئاما.
